| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
២៧. គោតមពុទ្ធវំសោ
27. Gotamabuddhavaṃso
១.
1.
បធានំ បទហិត្វាន, បត្តោ សម្ពោធិមុត្តមំ។
Padhānaṃ padahitvāna, patto sambodhimuttamaṃ.
២.
2.
ព្រហ្មុនា យាចិតោ សន្តោ, ធម្មចក្កំ បវត្តយិំ;
Brahmunā yācito santo, dhammacakkaṃ pavattayiṃ;
អដ្ឋារសន្នំ កោដីនំ, បឋមាភិសមយោ អហុ។
Aṭṭhārasannaṃ koṭīnaṃ, paṭhamābhisamayo ahu.
៣.
3.
តតោ បរញ្ច ទេសេន្តេ, នរទេវសមាគមេ;
Tato parañca desente, naradevasamāgame;
គណនាយ ន វត្តព្ពោ, ទុតិយាភិសមយោ អហុ។
Gaṇanāya na vattabbo, dutiyābhisamayo ahu.
៤.
4.
ឥធេវាហំ ឯតរហិ, ឱវទិំ មម អត្រជំ;
Idhevāhaṃ etarahi, ovadiṃ mama atrajaṃ;
គណនាយ ន វត្តព្ពោ, តតិយាភិសមយោ អហុ។
Gaṇanāya na vattabbo, tatiyābhisamayo ahu.
៥.
5.
ឯកោសិ សន្និបាតោ មេ, សាវកានំ មហេសិនំ;
Ekosi sannipāto me, sāvakānaṃ mahesinaṃ;
អឌ្ឍតេឡសសតានំ, ភិក្ខូនាសិ សមាគមោ។
Aḍḍhateḷasasatānaṃ, bhikkhūnāsi samāgamo.
៦.
6.
វិរោចមានោ វិមលោ, ភិក្ខុសង្ឃស្ស មជ្ឈគោ;
Virocamāno vimalo, bhikkhusaṅghassa majjhago;
ទទាមិ បត្ថិតំ សព្ពំ, មណីវ សព្ពកាមទោ។
Dadāmi patthitaṃ sabbaṃ, maṇīva sabbakāmado.
៧.
7.
ផលមាកង្ខមានានំ , ភវច្ឆន្ទជហេសិនំ;
Phalamākaṅkhamānānaṃ , bhavacchandajahesinaṃ;
ចតុសច្ចំ បកាសេមិ, អនុកម្បាយ បាណិនំ។
Catusaccaṃ pakāsemi, anukampāya pāṇinaṃ.
៨.
8.
ទសវីសសហស្សានំ, ធម្មាភិសមយោ អហុ;
Dasavīsasahassānaṃ, dhammābhisamayo ahu;
ឯកទ្វិន្នំ អភិសមយោ, គណនាតោ អសង្ខិយោ។
Ekadvinnaṃ abhisamayo, gaṇanāto asaṅkhiyo.
៩.
9.
វិត្ថារិកំ ពាហុជញ្ញំ, ឥទ្ធំ ផីតំ សុផុល្លិតំ;
Vitthārikaṃ bāhujaññaṃ, iddhaṃ phītaṃ suphullitaṃ;
ឥធ មយ្ហំ សក្យមុនិនោ, សាសនំ សុវិសោធិតំ។
Idha mayhaṃ sakyamunino, sāsanaṃ suvisodhitaṃ.
១០.
10.
អនាសវា វីតរាគា, សន្តចិត្តា សមាហិតា;
Anāsavā vītarāgā, santacittā samāhitā;
ភិក្ខូនេកសតា សព្ពេ, បរិវារេន្តិ មំ សទា។
Bhikkhūnekasatā sabbe, parivārenti maṃ sadā.
១១.
11.
ឥទានិ យេ ឯតរហិ, ជហន្តិ មានុសំ ភវំ;
Idāni ye etarahi, jahanti mānusaṃ bhavaṃ;
អប្បត្តមានសា សេខា, តេ ភិក្ខូ វិញ្ញុគរហិតា។
Appattamānasā sekhā, te bhikkhū viññugarahitā.
១២.
12.
អរិយញ្ច សំថោមយន្តា, សទា ធម្មរតា ជនា;
Ariyañca saṃthomayantā, sadā dhammaratā janā;
ពុជ្ឈិស្សន្តិ សតិមន្តោ, សំសារសរិតំ គតា។
Bujjhissanti satimanto, saṃsārasaritaṃ gatā.
១៣.
13.
នគរំ កបិលវត្ថុ មេ, រាជា សុទ្ធោទនោ បិតា;
Nagaraṃ kapilavatthu me, rājā suddhodano pitā;
មយ្ហំ ជនេត្តិកា មាតា, មាយាទេវីតិ វុច្ចតិ។
Mayhaṃ janettikā mātā, māyādevīti vuccati.
១៤.
14.
ឯកូនតិំសវស្សានិ , អគារំ អជ្ឈហំ វសិំ;
Ekūnatiṃsavassāni , agāraṃ ajjhahaṃ vasiṃ;
រម្មោ សុរម្មោ សុភកោ, តយោ បាសាទមុត្តមា។
Rammo surammo subhako, tayo pāsādamuttamā.
១៥.
15.
ចត្តារីសសហស្សានិ, នារិយោ សមលង្កតា;
Cattārīsasahassāni, nāriyo samalaṅkatā;
ភទ្ទកញ្ចនា នាម នារី, រាហុលោ នាម អត្រជោ។
Bhaddakañcanā nāma nārī, rāhulo nāma atrajo.
១៦.
16.
និមិត្តេ ចតុរោ ទិស្វា, អស្សយានេន និក្ខមិំ;
Nimitte caturo disvā, assayānena nikkhamiṃ;
ឆព្ពស្សំ បធានចារំ, អចរិំ ទុក្ករំ អហំ។
Chabbassaṃ padhānacāraṃ, acariṃ dukkaraṃ ahaṃ.
១៧.
17.
ពារាណសិយំ ឥសិបតនេ, ចក្កំ បវត្តិតំ មយា;
Bārāṇasiyaṃ isipatane, cakkaṃ pavattitaṃ mayā;
អហំ គោតមសម្ពុទ្ធោ, សរណំ សព្ពបាណិនំ។
Ahaṃ gotamasambuddho, saraṇaṃ sabbapāṇinaṃ.
១៨.
18.
កោលិតោ ឧបតិស្សោ ច, ទ្វេ ភិក្ខូ អគ្គសាវកា;
Kolito upatisso ca, dve bhikkhū aggasāvakā;
អានន្ទោ នាមុបដ្ឋាកោ, សន្តិកាវចរោ មម;
Ānando nāmupaṭṭhāko, santikāvacaro mama;
ខេមា ឧប្បលវណ្ណា ច, ភិក្ខុនី អគ្គសាវិកា។
Khemā uppalavaṇṇā ca, bhikkhunī aggasāvikā.
១៩.
19.
ចិត្តោ ហត្ថាឡវកោ ច, អគ្គុបដ្ឋាកុបាសកា;
Citto hatthāḷavako ca, aggupaṭṭhākupāsakā;
នន្ទមាតា ច ឧត្តរា, អគ្គុបដ្ឋិកុបាសិកា។
Nandamātā ca uttarā, aggupaṭṭhikupāsikā.
២០.
20.
អហំ អស្សត្ថមូលម្ហិ, បត្តោ សម្ពោធិមុត្តមំ;
Ahaṃ assatthamūlamhi, patto sambodhimuttamaṃ;
ព្យាមប្បភា សទា មយ្ហំ, សោឡសហត្ថមុគ្គតា។
Byāmappabhā sadā mayhaṃ, soḷasahatthamuggatā.
២១.
21.
អប្បំ វស្សសតំ អាយុ, ឥទានេតរហិ វិជ្ជតិ;
Appaṃ vassasataṃ āyu, idānetarahi vijjati;
តាវតា តិដ្ឋមានោហំ, តារេមិ ជនតំ ពហុំ។
Tāvatā tiṭṭhamānohaṃ, tāremi janataṃ bahuṃ.
២២.
22.
ឋបយិត្វាន ធម្មុក្កំ, បច្ឆិមំ ជនពោធនំ;
Ṭhapayitvāna dhammukkaṃ, pacchimaṃ janabodhanaṃ;
អហម្បិ នចិរស្សេវ, សទ្ធិំ សាវកសង្ឃតោ;
Ahampi nacirasseva, saddhiṃ sāvakasaṅghato;
ឥធេវ បរិនិព្ពិស្សំ, អគ្គី វាហារសង្ខយា។
Idheva parinibbissaṃ, aggī vāhārasaṅkhayā.
២៣.
23.
អយញ្ច គុណធារណោ ទេហោ, ទ្វត្តិំសវរលក្ខណវិចិត្តោ។
Ayañca guṇadhāraṇo deho, dvattiṃsavaralakkhaṇavicitto.
២៤.
24.
ទស ទិសា បភាសេត្វា, សតរំសីវ ឆប្បភា;
Dasa disā pabhāsetvā, sataraṃsīva chappabhā;
សព្ពំ តមន្តរហិស្សន្តិ, ននុ រិត្តា សព្ពសង្ខារាតិ។
Sabbaṃ tamantarahissanti, nanu rittā sabbasaṅkhārāti.
គោតមស្ស ភគវតោ វំសោ បញ្ចវីសតិមោ។
Gotamassa bhagavato vaṃso pañcavīsatimo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ២៧. គោតមពុទ្ធវំសវណ្ណនា • 27. Gotamabuddhavaṃsavaṇṇanā
