| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೮. ಗಹಟ್ಠವನ್ದನಾಸುತ್ತಂ
8. Gahaṭṭhavandanāsuttaṃ
೨೬೪. ಸಾವತ್ಥಿಯಂ। ತತ್ರ…ಪೇ॰… ಏತದವೋಚ – ‘‘ಭೂತಪುಬ್ಬಂ, ಭಿಕ್ಖವೇ, ಸಕ್ಕೋ ದೇವಾನಮಿನ್ದೋ ಮಾತಲಿಂ ಸಙ್ಗಾಹಕಂ ಆಮನ್ತೇಸಿ – ‘ಯೋಜೇಹಿ, ಸಮ್ಮ ಮಾತಲಿ, ಸಹಸ್ಸಯುತ್ತಂ ಆಜಞ್ಞರಥಂ। ಉಯ್ಯಾನಭೂಮಿಂ ಗಚ್ಛಾಮ ಸುಭೂಮಿಂ ದಸ್ಸನಾಯಾ’ತಿ। ‘ಏವಂ ಭದ್ದನ್ತವಾ’ತಿ ಖೋ, ಭಿಕ್ಖವೇ, ಮಾತಲಿ ಸಙ್ಗಾಹಕೋ ಸಕ್ಕಸ್ಸ ದೇವಾನಮಿನ್ದಸ್ಸ ಪಟಿಸ್ಸುತ್ವಾ ಸಹಸ್ಸಯುತ್ತಂ ಆಜಞ್ಞರಥಂ ಯೋಜೇತ್ವಾ ಸಕ್ಕಸ್ಸ ದೇವಾನಮಿನ್ದಸ್ಸ ಪಟಿವೇದೇಸಿ – ‘ಯುತ್ತೋ ಖೋ ತೇ, ಮಾರಿಸ, ಸಹಸ್ಸಯುತ್ತೋ ಆಜಞ್ಞರಥೋ। ಯಸ್ಸ ದಾನಿ ಕಾಲಂ ಮಞ್ಞಸೀ’’’ತಿ। ಅಥ ಖೋ, ಭಿಕ್ಖವೇ, ಸಕ್ಕೋ ದೇವಾನಮಿನ್ದೋ ವೇಜಯನ್ತಪಾಸಾದಾ ಓರೋಹನ್ತೋ ಅಞ್ಜಲಿಂ ಕತ್ವಾ 1 ಸುದಂ ಪುಥುದ್ದಿಸಾ ನಮಸ್ಸತಿ। ಅಥ ಖೋ, ಭಿಕ್ಖವೇ, ಮಾತಲಿ ಸಙ್ಗಾಹಕೋ ಸಕ್ಕಂ ದೇವಾನಮಿನ್ದಂ ಗಾಥಾಯ ಅಜ್ಝಭಾಸಿ –
264. Sāvatthiyaṃ. Tatra…pe… etadavoca – ‘‘bhūtapubbaṃ, bhikkhave, sakko devānamindo mātaliṃ saṅgāhakaṃ āmantesi – ‘yojehi, samma mātali, sahassayuttaṃ ājaññarathaṃ. Uyyānabhūmiṃ gacchāma subhūmiṃ dassanāyā’ti. ‘Evaṃ bhaddantavā’ti kho, bhikkhave, mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā sakkassa devānamindassa paṭivedesi – ‘yutto kho te, mārisa, sahassayutto ājaññaratho. Yassa dāni kālaṃ maññasī’’’ti. Atha kho, bhikkhave, sakko devānamindo vejayantapāsādā orohanto añjaliṃ katvā 2 sudaṃ puthuddisā namassati. Atha kho, bhikkhave, mātali saṅgāhako sakkaṃ devānamindaṃ gāthāya ajjhabhāsi –
‘‘ತಂ ನಮಸ್ಸನ್ತಿ ತೇವಿಜ್ಜಾ, ಸಬ್ಬೇ ಭುಮ್ಮಾ ಚ ಖತ್ತಿಯಾ।
‘‘Taṃ namassanti tevijjā, sabbe bhummā ca khattiyā;
ಚತ್ತಾರೋ ಚ ಮಹಾರಾಜಾ, ತಿದಸಾ ಚ ಯಸಸ್ಸಿನೋ।
Cattāro ca mahārājā, tidasā ca yasassino;
ಅಥ ಕೋ ನಾಮ ಸೋ ಯಕ್ಖೋ, ಯಂ ತ್ವಂ ಸಕ್ಕ ನಮಸ್ಸಸೀ’’ತಿ॥
Atha ko nāma so yakkho, yaṃ tvaṃ sakka namassasī’’ti.
‘‘ಮಂ ನಮಸ್ಸನ್ತಿ ತೇವಿಜ್ಜಾ, ಸಬ್ಬೇ ಭುಮ್ಮಾ ಚ ಖತ್ತಿಯಾ।
‘‘Maṃ namassanti tevijjā, sabbe bhummā ca khattiyā;
ಚತ್ತಾರೋ ಚ ಮಹಾರಾಜಾ, ತಿದಸಾ ಚ ಯಸಸ್ಸಿನೋ॥
Cattāro ca mahārājā, tidasā ca yasassino.
‘‘ಅಹಞ್ಚ ಸೀಲಸಮ್ಪನ್ನೇ, ಚಿರರತ್ತಸಮಾಹಿತೇ।
‘‘Ahañca sīlasampanne, cirarattasamāhite;
ಸಮ್ಮಾಪಬ್ಬಜಿತೇ ವನ್ದೇ, ಬ್ರಹ್ಮಚರಿಯಪರಾಯನೇ॥
Sammāpabbajite vande, brahmacariyaparāyane.
‘‘ಯೇ ಗಹಟ್ಠಾ ಪುಞ್ಞಕರಾ, ಸೀಲವನ್ತೋ ಉಪಾಸಕಾ।
‘‘Ye gahaṭṭhā puññakarā, sīlavanto upāsakā;
ಧಮ್ಮೇನ ದಾರಂ ಪೋಸೇನ್ತಿ, ತೇ ನಮಸ್ಸಾಮಿ ಮಾತಲೀ’’ತಿ॥
Dhammena dāraṃ posenti, te namassāmi mātalī’’ti.
‘‘ಸೇಟ್ಠಾ ಹಿ ಕಿರ ಲೋಕಸ್ಮಿಂ, ಯೇ ತ್ವಂ ಸಕ್ಕ ನಮಸ್ಸಸಿ।
‘‘Seṭṭhā hi kira lokasmiṃ, ye tvaṃ sakka namassasi;
ಅಹಮ್ಪಿ ತೇ ನಮಸ್ಸಾಮಿ, ಯೇ ನಮಸ್ಸಸಿ ವಾಸವಾ’’ತಿ॥
Ahampi te namassāmi, ye namassasi vāsavā’’ti.
‘‘ಇದಂ ವತ್ವಾನ ಮಘವಾ, ದೇವರಾಜಾ ಸುಜಮ್ಪತಿ।
‘‘Idaṃ vatvāna maghavā, devarājā sujampati;
ಪುಥುದ್ದಿಸಾ ನಮಸ್ಸಿತ್ವಾ, ಪಮುಖೋ ರಥಮಾರುಹೀ’’ತಿ॥
Puthuddisā namassitvā, pamukho rathamāruhī’’ti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ಗಹಟ್ಠವನ್ದನಾಸುತ್ತವಣ್ಣನಾ • 8. Gahaṭṭhavandanāsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೮. ಗಹಟ್ಠವನ್ದನಾಸುತ್ತವಣ್ಣನಾ • 8. Gahaṭṭhavandanāsuttavaṇṇanā
