| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២. ឯកត្ថម្ភិកត្ថេរអបទានវណ្ណនា
2. Ekatthambhikattheraapadānavaṇṇanā
សិទ្ធត្ថស្ស ភគវតោតិអាទិកំ អាយស្មតោ ឯកត្ថម្ភទាយកថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សិទ្ធត្ថស្ស ភគវតោ កាលេ វនកម្មិកោ ហុត្វា ឯកស្មិំ វិភវសម្បន្នេ កុលេ និព្ពត្តោ។ តស្មិំ សមយេ សព្ពេ សទ្ធា បសន្នា ឧបាសកា ឯកច្ឆន្ទា ‘‘ភគវតោ ឧបដ្ឋានសាលំ ករោមា’’តិ ទព្ពសម្ភារត្ថាយ វនំ បវិសិត្វា តំ ឧបាសកំ ទិស្វា ‘‘អម្ហាកំ ឯកំ ថម្ភំ ទេថា’’តិ យាចិំសុ។ សោ តំ បវត្តិំ សុត្វា ‘‘តុម្ហេ មា ចិន្តយិត្ថា’’តិ តេ សព្ពេ ឧយ្យោជេត្វា ឯកំ សារមយំ ថម្ភំ គហេត្វា សត្ថុ ទស្សេត្វា តេសំយេវ អទាសិ។ សោ តេនេវ សោមនស្សជាតោ តទេវ មូលំ កត្វា អញ្ញានិ ទានាទីនិ បុញ្ញានិ កត្វា តតោ ចុតោ ទេវលោកេ និព្ពត្តោ អបរាបរំ ឆសុ កាមាវចរេសុ ទិព្ពសម្បត្តិយោ អនុភវិត្វា មនុស្សេសុ ច អគ្គចក្កវត្តិសម្បត្តិំ អនេកវារំ អនុភវិត្វា អសង្ខ្យេយ្យំ បទេសរជ្ជសម្បត្តិញ្ច អនុភវិត្វា ឥមស្មិំ ពុទ្ធុប្បាទេ សទ្ធាសម្បន្នេ ឯកស្មិំ កុលេ និព្ពត្តោ មាតាបិតូហិ សទ្ធិំ ភគវតោ សន្តិកេ ធម្មំ សុត្វា បដិលទ្ធសទ្ធោ បព្ពជិត្វា លទ្ធូបសម្បទោ កម្មដ្ឋានំ គហេត្វា មនសិករោន្តោ នចិរស្សេវ អរហា អហោសិ។
Siddhatthassa bhagavatotiādikaṃ āyasmato ekatthambhadāyakatherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle vanakammiko hutvā ekasmiṃ vibhavasampanne kule nibbatto. Tasmiṃ samaye sabbe saddhā pasannā upāsakā ekacchandā ‘‘bhagavato upaṭṭhānasālaṃ karomā’’ti dabbasambhāratthāya vanaṃ pavisitvā taṃ upāsakaṃ disvā ‘‘amhākaṃ ekaṃ thambhaṃ dethā’’ti yāciṃsu. So taṃ pavattiṃ sutvā ‘‘tumhe mā cintayitthā’’ti te sabbe uyyojetvā ekaṃ sāramayaṃ thambhaṃ gahetvā satthu dassetvā tesaṃyeva adāsi. So teneva somanassajāto tadeva mūlaṃ katvā aññāni dānādīni puññāni katvā tato cuto devaloke nibbatto aparāparaṃ chasu kāmāvacaresu dibbasampattiyo anubhavitvā manussesu ca aggacakkavattisampattiṃ anekavāraṃ anubhavitvā asaṅkhyeyyaṃ padesarajjasampattiñca anubhavitvā imasmiṃ buddhuppāde saddhāsampanne ekasmiṃ kule nibbatto mātāpitūhi saddhiṃ bhagavato santike dhammaṃ sutvā paṭiladdhasaddho pabbajitvā laddhūpasampado kammaṭṭhānaṃ gahetvā manasikaronto nacirasseva arahā ahosi.
១៣. សោ ឯវំ បត្តអរហត្តោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ សិទ្ធត្ថស្សាតិអាទិមាហ។ តត្ថ សិទ្ធត្ថស្ស ភគវតោ ភគ្យសម្បន្នស្ស សម្មាសម្ពុទ្ធស្ស។ មហាបូគគណោតិ មហាឧបាសកសមូហោ អហុ អហោសីតិ អត្ថោ។ សរណំ គតា ច តេ ពុទ្ធន្តិ ‘‘ពុទ្ធំ សរណ’’ន្តិ គតា ភជិំសុ ជានិំសុ វា តេ ឧបាសកា។ តថាគតំ សទ្ទហន្តិ ពុទ្ធគុណំ អត្តនោ ចិត្តសន្តានេ ឋបេន្តីតិ អត្ថោ។
13. So evaṃ pattaarahatto attano pubbakammaṃ saritvā somanassajāto pubbacaritāpadānaṃ pakāsento siddhatthassātiādimāha. Tattha siddhatthassa bhagavato bhagyasampannassa sammāsambuddhassa. Mahāpūgagaṇoti mahāupāsakasamūho ahu ahosīti attho. Saraṇaṃ gatā ca te buddhanti ‘‘buddhaṃ saraṇa’’nti gatā bhajiṃsu jāniṃsu vā te upāsakā. Tathāgataṃ saddahanti buddhaguṇaṃ attano cittasantāne ṭhapentīti attho.
១៤. សព្ពេ សង្គម្ម មន្តេត្វាតិ សព្ពេ សមាគម្ម សន្និបតិត្វា មន្តេត្វា អញ្ញមញ្ញំ សញ្ញាបេត្វា ឯកច្ឆន្ទា ហុត្វា មាឡំ ឧបដ្ឋានសាលំ សត្ថុនោ អត្ថាយ កុព្ពន្តិ ករោន្តីតិ អត្ថោ។ ទព្ពសម្ភារេសុ ឯកត្ថម្ភំ អលភន្តា ព្រហាវនេ មហាវនេ វិចិនន្តីតិ សម្ពន្ធោ។
14.Sabbe saṅgamma mantetvāti sabbe samāgamma sannipatitvā mantetvā aññamaññaṃ saññāpetvā ekacchandā hutvā māḷaṃ upaṭṭhānasālaṃ satthuno atthāya kubbanti karontīti attho. Dabbasambhāresu ekatthambhaṃ alabhantā brahāvane mahāvane vicinantīti sambandho.
១៥. តេហំ អរញ្ញេ ទិស្វានាតិ អហំ តេ ឧបាសកេ អរញ្ញេ ទិស្វាន គណំ សមូហំ ឧបគម្ម សមីបំ គន្ត្វា អញ្ជលិំ បគ្គហេត្វាន ទសង្គុលិសមោធានំ អញ្ជលិំ សិរសិ កត្វា អហំ គណំ ឧបាសកសមូហំ ‘‘តុម្ហេ ឥមំ វនំ កិមត្ថំ អាគតត្ថា’’តិ តទា តស្មិំ កាលេ បរិបុច្ឆិន្តិ សម្ពន្ធោ។
15.Tehaṃaraññe disvānāti ahaṃ te upāsake araññe disvāna gaṇaṃ samūhaṃ upagamma samīpaṃ gantvā añjaliṃ paggahetvāna dasaṅgulisamodhānaṃ añjaliṃ sirasi katvā ahaṃ gaṇaṃ upāsakasamūhaṃ ‘‘tumhe imaṃ vanaṃ kimatthaṃ āgatatthā’’ti tadā tasmiṃ kāle paripucchinti sambandho.
១៦. តេ សីលវន្តោ ឧបាសកា មេ មយា បុដ្ឋា ‘‘មាឡំ មយំ កត្តុកាមា ហុត្វា ឯកត្ថម្ភោ អម្ហេហិ ន លព្ភតី’’តិ វិយាកំសុ វិសេសេន កថយិំសូតិ សម្ពន្ធោ។
16.Te sīlavanto upāsakā me mayā puṭṭhā ‘‘māḷaṃ mayaṃ kattukāmā hutvā ekatthambho amhehi na labbhatī’’ti viyākaṃsu visesena kathayiṃsūti sambandho.
១៧. មមំ មយ្ហំ ឯកត្ថម្ភំ ទេថ, អហំ តំ ទស្សាមិ សត្ថុនោ សន្តិកំ អហំ ថម្ភំ អាហរិស្សាមិ, តេ ភវន្តោ ថម្ភហរណេ អប្បោស្សុក្កា ឧស្សាហរហិតា ភវន្តូតិ សម្ពន្ធោ។
17.Mamaṃ mayhaṃ ekatthambhaṃ detha, ahaṃ taṃ dassāmi satthuno santikaṃ ahaṃ thambhaṃ āharissāmi, te bhavanto thambhaharaṇe appossukkā ussāharahitā bhavantūti sambandho.
២៤. យំ យំ យោនុបបជ្ជាមីតិ យំ យំ យោនិំ ទេវត្តំ អថ មានុសំ ឧបគច្ឆាមីតិ អត្ថោ។ ភុម្មត្ថេ វា ឧបយោគវចនំ, យស្មិំ យស្មិំ ទេវលោកេ វា មនុស្សលោកេ វាតិ អត្ថោ។ សេសំ ឧត្តានត្ថមេវាតិ។
24.Yaṃ yaṃ yonupapajjāmīti yaṃ yaṃ yoniṃ devattaṃ atha mānusaṃ upagacchāmīti attho. Bhummatthe vā upayogavacanaṃ, yasmiṃ yasmiṃ devaloke vā manussaloke vāti attho. Sesaṃ uttānatthamevāti.
ឯកត្ថម្ភិកត្ថេរអបទានវណ្ណនា សមត្តា។
Ekatthambhikattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ២. ឯកត្ថម្ភិកត្ថេរអបទានំ • 2. Ekatthambhikattheraapadānaṃ
