| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៥. ចុន្ទសុត្តំ
5. Cundasuttaṃ
៨៣.
83.
‘‘បុច្ឆាមិ មុនិំ បហូតបញ្ញំ, (ឥតិ ចុន្ទោ កម្មារបុត្តោ)
‘‘Pucchāmi muniṃ pahūtapaññaṃ, (iti cundo kammāraputto)
ពុទ្ធំ ធម្មស្សាមិំ វីតតណ្ហំ;
Buddhaṃ dhammassāmiṃ vītataṇhaṃ;
ទ្វិបទុត្តមំ 1 សារថីនំ បវរំ, កតិ លោកេ សមណា តទិង្ឃ ព្រូហិ’’។
Dvipaduttamaṃ 2 sārathīnaṃ pavaraṃ, kati loke samaṇā tadiṅgha brūhi’’.
៨៤.
84.
‘‘ចតុរោ សមណា ន បញ្ចមត្ថិ, (ចុន្ទាតិ ភគវា)
‘‘Caturo samaṇā na pañcamatthi, (cundāti bhagavā)
តេ តេ អាវិករោមិ សក្ខិបុដ្ឋោ;
Te te āvikaromi sakkhipuṭṭho;
មគ្គជិនោ មគ្គទេសកោ ច, មគ្គេ ជីវតិ យោ ច មគ្គទូសី’’។
Maggajino maggadesako ca, magge jīvati yo ca maggadūsī’’.
៨៥.
85.
‘‘កំ មគ្គជិនំ វទន្តិ ពុទ្ធា, (ឥតិ ចុន្ទោ កម្មារបុត្តោ)
‘‘Kaṃ maggajinaṃ vadanti buddhā, (iti cundo kammāraputto)
មគ្គក្ខាយី កថំ អតុល្យោ ហោតិ;
Maggakkhāyī kathaṃ atulyo hoti;
មគ្គេ ជីវតិ មេ ព្រូហិ បុដ្ឋោ, អថ មេ អាវិករោហិ មគ្គទូសិំ’’ 3។
Magge jīvati me brūhi puṭṭho, atha me āvikarohi maggadūsiṃ’’ 4.
៨៦.
86.
‘‘យោ តិណ្ណកថំកថោ វិសល្លោ, និព្ពានាភិរតោ អនានុគិទ្ធោ;
‘‘Yo tiṇṇakathaṃkatho visallo, nibbānābhirato anānugiddho;
លោកស្ស សទេវកស្ស នេតា, តាទិំ មគ្គជិនំ វទន្តិ ពុទ្ធា។
Lokassa sadevakassa netā, tādiṃ maggajinaṃ vadanti buddhā.
៨៧.
87.
‘‘បរមំ បរមន្តិ យោធ ញត្វា, អក្ខាតិ វិភជតេ ឥធេវ ធម្មំ;
‘‘Paramaṃ paramanti yodha ñatvā, akkhāti vibhajate idheva dhammaṃ;
តំ កង្ខឆិទំ មុនិំ អនេជំ, ទុតិយំ ភិក្ខុនមាហុ មគ្គទេសិំ។
Taṃ kaṅkhachidaṃ muniṃ anejaṃ, dutiyaṃ bhikkhunamāhu maggadesiṃ.
៨៨.
88.
‘‘យោ ធម្មបទេ សុទេសិតេ, មគ្គេ ជីវតិ សញ្ញតោ សតីមា;
‘‘Yo dhammapade sudesite, magge jīvati saññato satīmā;
អនវជ្ជបទានិ សេវមានោ, តតិយំ ភិក្ខុនមាហុ មគ្គជីវិំ។
Anavajjapadāni sevamāno, tatiyaṃ bhikkhunamāhu maggajīviṃ.
៨៩.
89.
‘‘ឆទនំ កត្វាន សុព្ពតានំ, បក្ខន្ទី កុលទូសកោ បគព្ភោ;
‘‘Chadanaṃ katvāna subbatānaṃ, pakkhandī kuladūsako pagabbho;
មាយាវី អសញ្ញតោ បលាបោ, បតិរូបេន ចរំ ស មគ្គទូសី។
Māyāvī asaññato palāpo, patirūpena caraṃ sa maggadūsī.
៩០.
90.
‘‘ឯតេ ច បដិវិជ្ឈិ យោ គហដ្ឋោ, សុតវា អរិយសាវកោ សបញ្ញោ;
‘‘Ete ca paṭivijjhi yo gahaṭṭho, sutavā ariyasāvako sapañño;
សព្ពេ នេតាទិសាតិ 5 ញត្វា, ឥតិ ទិស្វា ន ហាបេតិ តស្ស សទ្ធា;
Sabbe netādisāti 6 ñatvā, iti disvā na hāpeti tassa saddhā;
កថំ ហិ ទុដ្ឋេន អសម្បទុដ្ឋំ, សុទ្ធំ អសុទ្ធេន សមំ ករេយ្យា’’តិ។
Kathaṃ hi duṭṭhena asampaduṭṭhaṃ, suddhaṃ asuddhena samaṃ kareyyā’’ti.
ចុន្ទសុត្តំ បញ្ចមំ និដ្ឋិតំ។
Cundasuttaṃ pañcamaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ៥. ចុន្ទសុត្តវណ្ណនា • 5. Cundasuttavaṇṇanā
