| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៨៨៤.
884.
សកំសកំទិដ្ឋិបរិព្ពសានា, វិគ្គយ្ហ នានា កុសលា វទន្តិ;
Sakaṃsakaṃdiṭṭhiparibbasānā, viggayha nānā kusalā vadanti;
យោ ឯវំ ជានាតិ ស វេទិ ធម្មំ, ឥទំ បដិក្កោសមកេវលី សោ។
Yo evaṃ jānāti sa vedi dhammaṃ, idaṃ paṭikkosamakevalī so.
៨៨៥.
885.
ឯវម្បិ វិគ្គយ្ហ វិវាទយន្តិ, ពាលោ បរោ អក្កុសលោតិ 3 ចាហុ;
Evampi viggayha vivādayanti, bālo paro akkusaloti 4 cāhu;
សច្ចោ នុ វាទោ កតមោ ឥមេសំ, សព្ពេវ ហីមេ កុសលា វទានា។
Sacco nu vādo katamo imesaṃ, sabbeva hīme kusalā vadānā.
៨៨៦.
886.
បរស្ស ចេ ធម្មមនានុជានំ, ពាលោមកោ 5 ហោតិ និហីនបញ្ញោ;
Parassa ce dhammamanānujānaṃ, bālomako 6 hoti nihīnapañño;
សព្ពេវ ពាលា សុនិហីនបញ្ញា, សព្ពេវិមេ ទិដ្ឋិបរិព្ពសានា។
Sabbeva bālā sunihīnapaññā, sabbevime diṭṭhiparibbasānā.
៨៨៧.
887.
សន្ទិដ្ឋិយា ចេវ ន វីវទាតា, សំសុទ្ធបញ្ញា កុសលា មុតីមា;
Sandiṭṭhiyā ceva na vīvadātā, saṃsuddhapaññā kusalā mutīmā;
ន តេសំ កោចិ បរិហីនបញ្ញោ 7, ទិដ្ឋី ហិ តេសម្បិ តថា សមត្តា។
Na tesaṃ koci parihīnapañño 8, diṭṭhī hi tesampi tathā samattā.
៨៨៨.
888.
ន វាហមេតំ តថិយន្តិ 9 ព្រូមិ, យមាហុ ពាលា មិថុ អញ្ញមញ្ញំ;
Na vāhametaṃ tathiyanti 10 brūmi, yamāhu bālā mithu aññamaññaṃ;
សកំសកំទិដ្ឋិមកំសុ សច្ចំ, តស្មា ហិ ពាលោតិ បរំ ទហន្តិ។
Sakaṃsakaṃdiṭṭhimakaṃsu saccaṃ, tasmā hi bāloti paraṃ dahanti.
៨៨៩.
889.
យមាហុ សច្ចំ តថិយន្តិ ឯកេ, តមាហុ អញ្ញេ 11 តុច្ឆំ មុសាតិ;
Yamāhu saccaṃ tathiyanti eke, tamāhu aññe 12 tucchaṃ musāti;
ឯវម្បិ វិគយ្ហ វិវាទយន្តិ, កស្មា ន ឯកំ សមណា វទន្តិ។
Evampi vigayha vivādayanti, kasmā na ekaṃ samaṇā vadanti.
៨៩០.
890.
ឯកញ្ហិ សច្ចំ ន ទុតីយមត្ថិ, យស្មិំ បជា នោ វិវទេ បជានំ;
Ekañhi saccaṃ na dutīyamatthi, yasmiṃ pajā no vivade pajānaṃ;
នានា តេ 13 សច្ចានិ សយំ ថុនន្តិ, តស្មា ន ឯកំ សមណា វទន្តិ។
Nānā te 14 saccāni sayaṃ thunanti, tasmā na ekaṃ samaṇā vadanti.
៨៩១.
891.
កស្មា នុ សច្ចានិ វទន្តិ នានា, បវាទិយាសេ កុសលា វទានា;
Kasmā nu saccāni vadanti nānā, pavādiyāse kusalā vadānā;
សច្ចានិ សុតានិ ពហូនិ នានា, ឧទាហុ តេ តក្កមនុស្សរន្តិ។
Saccāni sutāni bahūni nānā, udāhu te takkamanussaranti.
៨៩២.
892.
ន ហេវ សច្ចានិ ពហូនិ នានា, អញ្ញត្រ សញ្ញាយ និច្ចានិ លោកេ;
Na heva saccāni bahūni nānā, aññatra saññāya niccāni loke;
តក្កញ្ច ទិដ្ឋីសុ បកប្បយិត្វា, សច្ចំ មុសាតិ ទ្វយធម្មមាហុ។
Takkañca diṭṭhīsu pakappayitvā, saccaṃ musāti dvayadhammamāhu.
៨៩៣.
893.
ទិដ្ឋេ សុតេ សីលវតេ មុតេ វា, ឯតេ ច និស្សាយ វិមានទស្សី;
Diṭṭhe sute sīlavate mute vā, ete ca nissāya vimānadassī;
វិនិច្ឆយេ ឋត្វា បហស្សមានោ, ពាលោ បរោ អក្កុសលោតិ ចាហ។
Vinicchaye ṭhatvā pahassamāno, bālo paro akkusaloti cāha.
៨៩៤.
894.
យេនេវ ពាលោតិ បរំ ទហាតិ, តេនាតុមានំ កុសលោតិ ចាហ;
Yeneva bāloti paraṃ dahāti, tenātumānaṃ kusaloti cāha;
សយមត្តនា សោ កុសលោ វទានោ, អញ្ញំ វិមានេតិ តទេវ បាវ។
Sayamattanā so kusalo vadāno, aññaṃ vimāneti tadeva pāva.
៨៩៥.
895.
អតិសារទិដ្ឋិយាវ សោ សមត្តោ, មានេន មត្តោ បរិបុណ្ណមានី;
Atisāradiṭṭhiyāva so samatto, mānena matto paripuṇṇamānī;
សយមេវ សាមំ មនសាភិសិត្តោ, ទិដ្ឋី ហិ សា តស្ស តថា សមត្តា។
Sayameva sāmaṃ manasābhisitto, diṭṭhī hi sā tassa tathā samattā.
៨៩៦.
896.
បរស្ស ចេ ហិ វចសា និហីនោ, តុមោ សហា ហោតិ និហីនបញ្ញោ;
Parassa ce hi vacasā nihīno, tumo sahā hoti nihīnapañño;
អថ ចេ សយំ វេទគូ ហោតិ ធីរោ, ន កោចិ ពាលោ សមណេសុ អត្ថិ។
Atha ce sayaṃ vedagū hoti dhīro, na koci bālo samaṇesu atthi.
៨៩៧.
897.
អញ្ញំ ឥតោ យាភិវទន្តិ ធម្មំ, អបរទ្ធា សុទ្ធិមកេវលី តេ 15;
Aññaṃ ito yābhivadanti dhammaṃ, aparaddhā suddhimakevalī te 16;
ឯវម្បិ តិត្ថ្យា បុថុសោ វទន្តិ, សន្ទិដ្ឋិរាគេន ហិ តេភិរត្តា 17។
Evampi titthyā puthuso vadanti, sandiṭṭhirāgena hi tebhirattā 18.
៨៩៨.
898.
ឥធេវ សុទ្ធិ ឥតិ វាទយន្តិ, នាញ្ញេសុ ធម្មេសុ វិសុទ្ធិមាហុ;
Idheva suddhi iti vādayanti, nāññesu dhammesu visuddhimāhu;
ឯវម្បិ តិត្ថ្យា បុថុសោ និវិដ្ឋា, សកាយនេ តត្ថ ទឡ្ហំ វទានា។
Evampi titthyā puthuso niviṭṭhā, sakāyane tattha daḷhaṃ vadānā.
៨៩៩.
899.
សកាយនេ វាបិ ទឡ្ហំ វទានោ, កមេត្ថ ពាលោតិ បរំ ទហេយ្យ;
Sakāyane vāpi daḷhaṃ vadāno, kamettha bāloti paraṃ daheyya;
សយមេវ សោ មេធគមាវហេយ្យ 19, បរំ វទំ ពាលមសុទ្ធិធម្មំ។
Sayameva so medhagamāvaheyya 20, paraṃ vadaṃ bālamasuddhidhammaṃ.
៩០០.
900.
វិនិច្ឆយេ ឋត្វា សយំ បមាយ, ឧទ្ធំ ស 21 លោកស្មិំ វិវាទមេតិ;
Vinicchaye ṭhatvā sayaṃ pamāya, uddhaṃ sa 22 lokasmiṃ vivādameti;
ហិត្វាន សព្ពានិ វិនិច្ឆយានិ, ន មេធគំ កុព្ពតិ ជន្តុ លោកេតិ។
Hitvāna sabbāni vinicchayāni, na medhagaṃ kubbati jantu loketi.
ចូឡព្យូហសុត្តំ ទ្វាទសមំ និដ្ឋិតំ។
Cūḷabyūhasuttaṃ dvādasamaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ១២. ចូឡព្យូហសុត្តវណ្ណនា • 12. Cūḷabyūhasuttavaṇṇanā
