| Library / Tipiṭaka / តិបិដក • Tipiṭaka / វិនយវិនិច្ឆយ-ឧត្តរវិនិច្ឆយ • Vinayavinicchaya-uttaravinicchaya |
ចតុត្ថបារាជិកកថា
Catutthapārājikakathā
៣០៦.
306.
អសន្តមត្តស្សិតមេវ កត្វា;
Asantamattassitameva katvā;
ភវំ អធិដ្ឋាយ ច វត្តមានំ;
Bhavaṃ adhiṭṭhāya ca vattamānaṃ;
អញ្ញាបទេសញ្ច វិនាធិមានំ;
Aññāpadesañca vinādhimānaṃ;
ឈានាទិភេទំ សមុទាចរេយ្យ។
Jhānādibhedaṃ samudācareyya.
៣០៧.
307.
កាយេន វាចាយបិ វា តទត្ថេ;
Kāyena vācāyapi vā tadatthe;
ញាតេវ វិញ្ញត្តិបថេ អភព្ពោ;
Ñāteva viññattipathe abhabbo;
យថេវ តាលោ បន មត្ថកស្មិំ;
Yatheva tālo pana matthakasmiṃ;
ឆិន្នោ អភព្ពោ បុន រុឡ្ហិភាវេ។
Chinno abhabbo puna ruḷhibhāve.
៣០៨.
308.
អសន្តមេវត្តនិ យោ បរស្ស;
Asantamevattani yo parassa;
ទីបេតិ ឈានាទិមនន្តរំ សោ;
Dīpeti jhānādimanantaraṃ so;
ជានាតិ ចេ ហោតិ ចុតោ ហិ នោ ចេ;
Jānāti ce hoti cuto hi no ce;
ជានាតិ ថុល្លច្ចយមស្ស ហោតិ។
Jānāti thullaccayamassa hoti.
៣០៩.
309.
‘‘យោ តេ វិហារេ វសតីធ ភិក្ខុ;
‘‘Yo te vihāre vasatīdha bhikkhu;
សោ ឈានលាភី’’តិ ច ទីបិតេ ចេ;
So jhānalābhī’’ti ca dīpite ce;
ជានាតិ ថុល្លច្ចយមស្ស នោ ចេ;
Jānāti thullaccayamassa no ce;
ជានាតិ តំ ទុក្កដមេវ ហោតិ។
Jānāti taṃ dukkaṭameva hoti.
៣១០.
310.
អសន្តមេវត្តនិ ធម្មមេតំ;
Asantamevattani dhammametaṃ;
អត្ថីតិ កត្វា វទតោធិមានា;
Atthīti katvā vadatodhimānā;
វុត្តោ អនាបត្តិនយោ បនេវំ;
Vutto anāpattinayo panevaṃ;
អវត្តុកាមស្ស តថាទិកស្ស។
Avattukāmassa tathādikassa.
៣១១.
311.
បាបិច្ឆតា តស្ស អសន្តភាវោ;
Pāpicchatā tassa asantabhāvo;
អារោចនញ្ចេវ មនុស្សកស្ស;
Ārocanañceva manussakassa;
នញ្ញាបទេសេន តទេវ ញាណំ;
Naññāpadesena tadeva ñāṇaṃ;
បញ្ចេត្ថ អង្គានិ វទន្តិ ធីរា។
Pañcettha aṅgāni vadanti dhīrā.
៣១២.
312.
បឋមេ ទុតិយេ ចន្តេ, បរិយាយោ ន វិជ្ជតិ;
Paṭhame dutiye cante, pariyāyo na vijjati;
ទុតិយេ តតិយេយេវ, អាណត្តិ ន បនេតរេ។
Dutiye tatiyeyeva, āṇatti na panetare.
៣១៣.
313.
អាទិ មេកសមុដ្ឋានំ, ទុវង្គំ កាយចិត្តតោ;
Ādi mekasamuṭṭhānaṃ, duvaṅgaṃ kāyacittato;
សេសា ច តិសមុដ្ឋានា, តេសមង្គានិ សត្ត តុ។
Sesā ca tisamuṭṭhānā, tesamaṅgāni satta tu.
៣១៤.
314.
សុខោបេក្ខាយុតំ អាទិ, តតិយំ ទុក្ខវេទនំ;
Sukhopekkhāyutaṃ ādi, tatiyaṃ dukkhavedanaṃ;
ទុតិយញ្ច ចតុត្ថញ្ច, តិវេទនមុទីរិតំ។
Dutiyañca catutthañca, tivedanamudīritaṃ.
៣១៥.
315.
បឋមស្សដ្ឋ ចិត្តានិ, តតិយស្ស ទុវេ បន;
Paṭhamassaṭṭha cittāni, tatiyassa duve pana;
ទុតិយស្ស ចតុត្ថស្ស, ទស ចិត្តានិ លព្ភរេ។
Dutiyassa catutthassa, dasa cittāni labbhare.
៣១៦.
316.
តស្មា សចិត្តកំ វុត្តំ, សព្ពមេតំ ចតុព្ពិធំ;
Tasmā sacittakaṃ vuttaṃ, sabbametaṃ catubbidhaṃ;
ក្រិយា សញ្ញាវិមោក្ខញ្ច, លោកវជ្ជន្តិ ទីបិតំ។
Kriyā saññāvimokkhañca, lokavajjanti dīpitaṃ.
៣១៧.
317.
ឥទមាបត្តិយំយេវ, វិធានំ បន យុជ្ជតិ;
Idamāpattiyaṃyeva, vidhānaṃ pana yujjati;
តស្មា អាបត្តិយំយេវ, គហេតព្ពំ វិភាវិនា។
Tasmā āpattiyaṃyeva, gahetabbaṃ vibhāvinā.
៣១៨.
318.
មុទុបិដ្ឋិ ច លម្ពី ច, មុខគ្គាហី និសីទកោ;
Mudupiṭṭhi ca lambī ca, mukhaggāhī nisīdako;
បារាជិកា ឥមេ តេសំ, ចត្តារោ អនុលោមិកា។
Pārājikā ime tesaṃ, cattāro anulomikā.
៣១៩.
319.
ភិក្ខុនីនញ្ច ចត្តារិ, វិព្ភន្តា ភិក្ខុនី សយំ;
Bhikkhunīnañca cattāri, vibbhantā bhikkhunī sayaṃ;
តថា ឯកាទសាភព្ពា, សព្ពេតេ ចតុវីសតិ។
Tathā ekādasābhabbā, sabbete catuvīsati.
៣២០.
320.
ឥមេ បារាជិកា វុត្តា, ចតុវីសតិ បុគ្គលា;
Ime pārājikā vuttā, catuvīsati puggalā;
អភព្ពា ភិក្ខុភាវាយ, សីសច្ឆិន្នោវ ជីវិតុំ។
Abhabbā bhikkhubhāvāya, sīsacchinnova jīvituṃ.
៣២១.
321.
បណ្ឌកោ ច តិរច្ឆានោ, ឧភតោព្យញ្ជនោបិ ច;
Paṇḍako ca tiracchāno, ubhatobyañjanopi ca;
តយោ វត្ថុវិបន្នា ហិ, អហេតុបដិសន្ធិកា។
Tayo vatthuvipannā hi, ahetupaṭisandhikā.
៣២២.
322.
បញ្ចានន្តរិកា ថេយ្យ-សំវាសោបិ ច ទូសកោ;
Pañcānantarikā theyya-saṃvāsopi ca dūsako;
តិត្ថិបក្កន្តកោ ចេតិ, ក្រិយានដ្ឋា បនដ្ឋ តេ។
Titthipakkantako ceti, kriyānaṭṭhā panaṭṭha te.
៣២៣.
323.
វិនិច្ឆយោ យោ បន សារភូតោ;
Vinicchayo yo pana sārabhūto;
បារាជិកានំ កថិតោ មយាយំ;
Pārājikānaṃ kathito mayāyaṃ;
តស្សានុសារេន ពុធេន ញាតុំ;
Tassānusārena budhena ñātuṃ;
សក្កា ហិ សេសោបិ អសេសតោវ។
Sakkā hi sesopi asesatova.
៣២៤.
324.
បិដកេ បដុភាវករេ បរមេ;
Piṭake paṭubhāvakare parame;
វិនយេ វិវិធេហិ នយេហិ យុតេ;
Vinaye vividhehi nayehi yute;
បរមត្ថនយំ អភិបត្ថយតា;
Paramatthanayaṃ abhipatthayatā;
បរិយាបុណិតព្ពមយំ សតតំ។
Pariyāpuṇitabbamayaṃ satataṃ.
ឥតិ វិនយវិនិច្ឆយេ ចតុត្ថបារាជិកកថា និដ្ឋិតា។
Iti vinayavinicchaye catutthapārājikakathā niṭṭhitā.
