| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៨. អដ្ឋារសមវគ្គោ
18. Aṭṭhārasamavaggo
(១៨៥) ៩. ចក្ខុនា រូបំ បស្សតីតិកថា
(185) 9. Cakkhunā rūpaṃ passatītikathā
៨២៦. ចក្ខុនា រូបំ បស្សតីតិ? អាមន្តា។ រូបេន រូបំ បស្សតីតិ? ន ហេវំ វត្តព្ពេ…បេ.… រូបេន រូបំ បស្សតីតិ? អាមន្តា។ រូបេន រូបំ បដិវិជានាតីតិ? ន ហេវំ វត្តព្ពេ…បេ.… រូបេន រូបំ បដិវិជានាតីតិ? អាមន្តា។ រូបំ មនោវិញ្ញាណន្តិ ? ន ហេវំ វត្តព្ពេ…បេ.… ចក្ខុនា រូបំ បស្សតីតិ? អាមន្តា។ អត្ថិ ចក្ខុស្ស អាវដ្ដនា…បេ.… បណិធីតិ? ន ហេវំ វត្តព្ពេ…បេ.… ននុ នត្ថិ ចក្ខុស្ស អាវដ្ដនា…បេ.… បណិធីតិ? អាមន្តា។ ហញ្ចិ នត្ថិ ចក្ខុស្ស អាវដ្ដនា…បេ.… បណិធិ, នោ ច វត រេ វត្តព្ពេ – ‘‘ចក្ខុនា រូបំ បស្សតី’’តិ។
826. Cakkhunā rūpaṃ passatīti? Āmantā. Rūpena rūpaṃ passatīti? Na hevaṃ vattabbe…pe… rūpena rūpaṃ passatīti? Āmantā. Rūpena rūpaṃ paṭivijānātīti? Na hevaṃ vattabbe…pe… rūpena rūpaṃ paṭivijānātīti? Āmantā. Rūpaṃ manoviññāṇanti ? Na hevaṃ vattabbe…pe… cakkhunā rūpaṃ passatīti? Āmantā. Atthi cakkhussa āvaṭṭanā…pe… paṇidhīti? Na hevaṃ vattabbe…pe… nanu natthi cakkhussa āvaṭṭanā…pe… paṇidhīti? Āmantā. Hañci natthi cakkhussa āvaṭṭanā…pe… paṇidhi, no ca vata re vattabbe – ‘‘cakkhunā rūpaṃ passatī’’ti.
សោតេន សទ្ទំ សុណាតីតិ…បេ.… ឃានេន គន្ធំ ឃាយតីតិ…បេ.… ជិវ្ហាយ រសំ សាយតីតិ…បេ.… កាយេន ផោដ្ឋព្ពំ ផុសតីតិ? អាមន្តា។ រូបេន រូបំ ផុសតីតិ? ន ហេវំ វត្តព្ពេ…បេ.…។
Sotena saddaṃ suṇātīti…pe… ghānena gandhaṃ ghāyatīti…pe… jivhāya rasaṃ sāyatīti…pe… kāyena phoṭṭhabbaṃ phusatīti? Āmantā. Rūpena rūpaṃ phusatīti? Na hevaṃ vattabbe…pe….
រូបេន រូបំ ផុសតីតិ? អាមន្តា។ រូបេន រូបំ បដិវិជានាតីតិ? ន ហេវំ វត្តព្ពេ…បេ.… រូបេន រូបំ បដិវិជានាតីតិ? អាមន្តា។ រូបំ មនោវិញ្ញាណន្តិ? ន ហេវំ វត្តព្ពេ …បេ.… កាយេន ផោដ្ឋព្ពំ ផុសតីតិ? អាមន្តា។ អត្ថិ កាយស្ស អាវដ្ដនា…បេ.… បណិធីតិ? ន ហេវំ វត្តព្ពេ…បេ.… ននុ នត្ថិ កាយស្ស អាវដ្ដនា…បេ.… បណិធីតិ? អាមន្តា។ ហញ្ចិ នត្ថិ កាយស្ស អាវដ្ដនា…បេ.… បណិធិ, នោ ច វត រេ វត្តព្ពេ – ‘‘កាយេន ផោដ្ឋព្ពំ ផុសតី’’តិ…បេ.…។
Rūpena rūpaṃ phusatīti? Āmantā. Rūpena rūpaṃ paṭivijānātīti? Na hevaṃ vattabbe…pe… rūpena rūpaṃ paṭivijānātīti? Āmantā. Rūpaṃ manoviññāṇanti? Na hevaṃ vattabbe …pe… kāyena phoṭṭhabbaṃ phusatīti? Āmantā. Atthi kāyassa āvaṭṭanā…pe… paṇidhīti? Na hevaṃ vattabbe…pe… nanu natthi kāyassa āvaṭṭanā…pe… paṇidhīti? Āmantā. Hañci natthi kāyassa āvaṭṭanā…pe… paṇidhi, no ca vata re vattabbe – ‘‘kāyena phoṭṭhabbaṃ phusatī’’ti…pe….
៨២៧. ន វត្តព្ពំ – ‘‘ចក្ខុនា រូបំ បស្សតី’’តិ…បេ.… ‘‘កាយេន ផោដ្ឋព្ពំ ផុសតី’’តិ? អាមន្តា។ ននុ វុត្តំ ភគវតា – ‘‘ឥធ, ភិក្ខវេ, ភិក្ខុ ចក្ខុនា រូបំ បស្សតិ…បេ.… កាយេន ផោដ្ឋព្ពំ ផុសតី’’តិ 1! អត្ថេវ សុត្តន្តោតិ? អាមន្តា។ តេន ហិ ចក្ខុនា រូបំ បស្សតិ…បេ.… កាយេន ផោដ្ឋព្ពំ ផុសតីតិ។
827. Na vattabbaṃ – ‘‘cakkhunā rūpaṃ passatī’’ti…pe… ‘‘kāyena phoṭṭhabbaṃ phusatī’’ti? Āmantā. Nanu vuttaṃ bhagavatā – ‘‘idha, bhikkhave, bhikkhu cakkhunā rūpaṃ passati…pe… kāyena phoṭṭhabbaṃ phusatī’’ti 2! Attheva suttantoti? Āmantā. Tena hi cakkhunā rūpaṃ passati…pe… kāyena phoṭṭhabbaṃ phusatīti.
ចក្ខុនា រូបំ បស្សតីតិកថា និដ្ឋិតា។
Cakkhunā rūpaṃ passatītikathā niṭṭhitā.
អដ្ឋារសមវគ្គោ។
Aṭṭhārasamavaggo.
តស្សុទ្ទានំ –
Tassuddānaṃ –
ពុទ្ធោ ភគវា មនុស្សលោកេ អដ្ឋាសិ, ពុទ្ធេន ភគវតា ធម្មោ ទេសិតោ, នត្ថិ ពុទ្ធស្ស ភគវតោ ករុណា, ពុទ្ធស្ស ភគវតោ ឧច្ចារបស្សាវោ អតិវិយ អញ្ញេ គន្ធជាតេ អធិគ្គណ្ហាតិ, ឯកេន អរិយមគ្គេន ចត្តារិ សាមញ្ញផលានិ សច្ឆិករោតិ, ឈានា ឈានំ សង្កមតិ, អត្ថិ ឈានន្តរិកា, សមាបន្នោ សទ្ទំ សុណាតិ, ចក្ខុនា រូបំ បស្សតិ កាយេន ផោដ្ឋព្ពំ ផុសតិ។
Buddho bhagavā manussaloke aṭṭhāsi, buddhena bhagavatā dhammo desito, natthi buddhassa bhagavato karuṇā, buddhassa bhagavato uccārapassāvo ativiya aññe gandhajāte adhiggaṇhāti, ekena ariyamaggena cattāri sāmaññaphalāni sacchikaroti, jhānā jhānaṃ saṅkamati, atthi jhānantarikā, samāpanno saddaṃ suṇāti, cakkhunā rūpaṃ passati kāyena phoṭṭhabbaṃ phusati.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៩. ចក្ខុនារូបំបស្សតីតិកថាវណ្ណនា • 9. Cakkhunārūpaṃpassatītikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៩. ចក្ខុនារូបំបស្សតីតិកថាវណ្ណនា • 9. Cakkhunārūpaṃpassatītikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៩. ចក្ខុនារូបំបស្សតីតិកថាវណ្ណនា • 9. Cakkhunārūpaṃpassatītikathāvaṇṇanā
