| Library / Tipiṭaka / තිපිටක • Tipiṭaka / බුද්ධවංසපාළි • Buddhavaṃsapāḷi |
28. බුද්ධපකිණ්ණකකණ්ඩං
28. Buddhapakiṇṇakakaṇḍaṃ
1.
1.
අපරිමෙය්යිතො කප්පෙ, චතුරො ආසුං විනායකා;
Aparimeyyito kappe, caturo āsuṃ vināyakā;
තණ්හඞ්කරො මෙධඞ්කරො, අථොපි සරණඞ්කරො;
Taṇhaṅkaro medhaṅkaro, athopi saraṇaṅkaro;
දීපඞ්කරො ච සම්බුද්ධො, එකකප්පම්හි තෙ ජිනා.
Dīpaṅkaro ca sambuddho, ekakappamhi te jinā.
2.
2.
දීපඞ්කරස්ස අපරෙන, කොණ්ඩඤ්ඤො නාම නායකො;
Dīpaṅkarassa aparena, koṇḍañño nāma nāyako;
එකොව එකකප්පම්හි, තාරෙසි ජනතං බහුං.
Ekova ekakappamhi, tāresi janataṃ bahuṃ.
3.
3.
දීපඞ්කරස්ස භගවතො, කොණ්ඩඤ්ඤස්ස ච සත්ථුනො;
Dīpaṅkarassa bhagavato, koṇḍaññassa ca satthuno;
එතෙසං අන්තරා කප්පා, ගණනාතො අසඞ්ඛියා.
Etesaṃ antarā kappā, gaṇanāto asaṅkhiyā.
4.
4.
කොණ්ඩඤ්ඤස්ස අපරෙන, මඞ්ගලො නාම නායකො;
Koṇḍaññassa aparena, maṅgalo nāma nāyako;
තෙසම්පි අන්තරා කප්පා, ගණනාතො අසඞ්ඛියා.
Tesampi antarā kappā, gaṇanāto asaṅkhiyā.
5.
5.
මඞ්ගලො ච සුමනො ච, රෙවතො සොභිතො මුනි;
Maṅgalo ca sumano ca, revato sobhito muni;
තෙපි බුද්ධා එකකප්පෙ, චක්ඛුමන්තො පභඞ්කරා.
Tepi buddhā ekakappe, cakkhumanto pabhaṅkarā.
6.
6.
සොභිතස්ස අපරෙන, අනොමදස්සී මහායසො;
Sobhitassa aparena, anomadassī mahāyaso;
තෙසම්පි අන්තරා කප්පා, ගණනාතො අසඞ්ඛියා.
Tesampi antarā kappā, gaṇanāto asaṅkhiyā.
7.
7.
අනොමදස්සී පදුමො, නාරදො චාපි නායකො;
Anomadassī padumo, nārado cāpi nāyako;
තෙපි බුද්ධා එකකප්පෙ, තමන්තකාරකා මුනී.
Tepi buddhā ekakappe, tamantakārakā munī.
8.
8.
නාරදස්ස අපරෙන, පදුමුත්තරො නාම නායකො;
Nāradassa aparena, padumuttaro nāma nāyako;
එකකප්පම්හි උප්පන්නො, තාරෙසි ජනතං බහුං.
Ekakappamhi uppanno, tāresi janataṃ bahuṃ.
9.
9.
නාරදස්ස භගවතො, පදුමුත්තරස්ස සත්ථුනො;
Nāradassa bhagavato, padumuttarassa satthuno;
තෙසම්පි අන්තරා කප්පා, ගණනාතො අසඞ්ඛියා.
Tesampi antarā kappā, gaṇanāto asaṅkhiyā.
10.
10.
කප්පසතසහස්සම්හි , එකො ආසි මහාමුනි;
Kappasatasahassamhi , eko āsi mahāmuni;
පදුමුත්තරො ලොකවිදූ, ආහුතීනං පටිග්ගහො.
Padumuttaro lokavidū, āhutīnaṃ paṭiggaho.
11.
11.
සුමෙධො ච සුජාතො ච, ඔරතො පදුමුත්තරා.
Sumedho ca sujāto ca, orato padumuttarā.
12.
12.
පියදස්සී අත්ථදස්සී, ධම්මදස්සී ච නායකා.
Piyadassī atthadassī, dhammadassī ca nāyakā.
13.
13.
ඔරතො ච සුජාතස්ස, සම්බුද්ධා ද්විපදුත්තමා;
Orato ca sujātassa, sambuddhā dvipaduttamā;
එකකප්පම්හි තෙ බුද්ධා, ලොකෙ අප්පටිපුග්ගලා.
Ekakappamhi te buddhā, loke appaṭipuggalā.
14.
14.
චතුන්නවුතිතො කප්පෙ, එකො ආසි මහාමුනි;
Catunnavutito kappe, eko āsi mahāmuni;
සිද්ධත්ථො සො ලොකවිදූ, සල්ලකත්තො අනුත්තරො.
Siddhattho so lokavidū, sallakatto anuttaro.
15.
15.
ද්වෙනවුතෙ ඉතො කප්පෙ, දුවෙ ආසුං විනායකා;
Dvenavute ito kappe, duve āsuṃ vināyakā;
තිස්සො ඵුස්සො ච සම්බුද්ධා, අසමා අප්පටිපුග්ගලා.
Tisso phusso ca sambuddhā, asamā appaṭipuggalā.
16.
16.
එකනවුතිතො කප්පෙ, විපස්සී නාම නායකො;
Ekanavutito kappe, vipassī nāma nāyako;
සොපි බුද්ධො කාරුණිකො, සත්තෙ මොචෙසි බන්ධනා.
Sopi buddho kāruṇiko, satte mocesi bandhanā.
17.
17.
එකතිංසෙ ඉතො කප්පෙ, දුවෙ ආසුං විනායකා;
Ekatiṃse ito kappe, duve āsuṃ vināyakā;
සිඛී ච වෙස්සභූ චෙව, අසමා අප්පටිපුග්ගලා.
Sikhī ca vessabhū ceva, asamā appaṭipuggalā.
18.
18.
ඉමම්හි භද්දකෙ කප්පෙ, තයො ආසුං විනායකා;
Imamhi bhaddake kappe, tayo āsuṃ vināyakā;
කකුසන්ධො කොණාගමනො, කස්සපො චාපි නායකො.
Kakusandho koṇāgamano, kassapo cāpi nāyako.
19.
19.
අහමෙතරහි සම්බුද්ධො, මෙත්තෙය්යො චාපි හෙස්සති;
Ahametarahi sambuddho, metteyyo cāpi hessati;
එතෙපිමෙ පඤ්ච බුද්ධා, ධීරා ලොකානුකම්පකා.
Etepime pañca buddhā, dhīrā lokānukampakā.
20.
20.
එතෙසං ධම්මරාජූනං, අඤ්ඤෙසංනෙකකොටිනං;
Etesaṃ dhammarājūnaṃ, aññesaṃnekakoṭinaṃ;
ආචික්ඛිත්වාන තං මග්ගං, නිබ්බුතා තෙ සසාවකාති.
Ācikkhitvāna taṃ maggaṃ, nibbutā te sasāvakāti.
බුද්ධපකිණ්ණකකණ්ඩං නිට්ඨිතං.
Buddhapakiṇṇakakaṇḍaṃ niṭṭhitaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / බුද්ධවංස-අට්ඨකථා • Buddhavaṃsa-aṭṭhakathā / 28. බුද්ධපකිණ්ණකකථා • 28. Buddhapakiṇṇakakathā
