| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៩. នវកនិបាតោ
9. Navakanipāto
១. ភូតត្ថេរគាថា
1. Bhūtattheragāthā
៥១៨.
518.
‘‘យទា ទុក្ខំ ជរាមរណន្តិ បណ្ឌិតោ, អវិទ្ទសូ យត្ថ សិតា បុថុជ្ជនា;
‘‘Yadā dukkhaṃ jarāmaraṇanti paṇḍito, aviddasū yattha sitā puthujjanā;
ទុក្ខំ បរិញ្ញាយ សតោវ ឈាយតិ, តតោ រតិំ បរមតរំ ន វិន្ទតិ។
Dukkhaṃ pariññāya satova jhāyati, tato ratiṃ paramataraṃ na vindati.
៥១៩.
519.
‘‘យទា ទុក្ខស្សាវហនិំ វិសត្តិកំ, បបញ្ចសង្ឃាតទុខាធិវាហិនិំ;
‘‘Yadā dukkhassāvahaniṃ visattikaṃ, papañcasaṅghātadukhādhivāhiniṃ;
តណ្ហំ បហន្ត្វាន សតោវ ឈាយតិ, តតោ រតិំ បរមតរំ ន វិន្ទតិ។
Taṇhaṃ pahantvāna satova jhāyati, tato ratiṃ paramataraṃ na vindati.
៥២០.
520.
‘‘យទា សិវំ ទ្វេចតុរង្គគាមិនំ, មគ្គុត្តមំ សព្ពកិលេសសោធនំ;
‘‘Yadā sivaṃ dvecaturaṅgagāminaṃ, magguttamaṃ sabbakilesasodhanaṃ;
បញ្ញាយ បស្សិត្វ សតោវ ឈាយតិ, តតោ រតិំ បរមតរំ ន វិន្ទតិ។
Paññāya passitva satova jhāyati, tato ratiṃ paramataraṃ na vindati.
៥២១.
521.
‘‘យទា អសោកំ វិរជំ អសង្ខតំ, សន្តំ បទំ សព្ពកិលេសសោធនំ;
‘‘Yadā asokaṃ virajaṃ asaṅkhataṃ, santaṃ padaṃ sabbakilesasodhanaṃ;
ភាវេតិ សញ្ញោជនពន្ធនច្ឆិទំ, តតោ រតិំ បរមតរំ ន វិន្ទតិ។
Bhāveti saññojanabandhanacchidaṃ, tato ratiṃ paramataraṃ na vindati.
៥២២.
522.
‘‘យទា នភេ គជ្ជតិ មេឃទុន្ទុភិ, ធារាកុលា វិហគបថេ សមន្តតោ;
‘‘Yadā nabhe gajjati meghadundubhi, dhārākulā vihagapathe samantato;
ភិក្ខូ ច បព្ភារគតោវ ឈាយតិ, តតោ រតិំ បរមតរំ ន វិន្ទតិ។
Bhikkhū ca pabbhāragatova jhāyati, tato ratiṃ paramataraṃ na vindati.
៥២៣.
523.
‘‘យទា នទីនំ កុសុមាកុលានំ, វិចិត្ត-វានេយ្យ-វដំសកានំ;
‘‘Yadā nadīnaṃ kusumākulānaṃ, vicitta-vāneyya-vaṭaṃsakānaṃ;
តីរេ និសិន្នោ សុមនោវ ឈាយតិ, តតោ រតិំ បរមតរំ ន វិន្ទតិ។
Tīre nisinno sumanova jhāyati, tato ratiṃ paramataraṃ na vindati.
៥២៤.
524.
‘‘យទា និសីថេ រហិតម្ហិ កាននេ, ទេវេ គឡន្តម្ហិ នទន្តិ ទាឋិនោ;
‘‘Yadā nisīthe rahitamhi kānane, deve gaḷantamhi nadanti dāṭhino;
ភិក្ខូ ច បព្ភារគតោវ ឈាយតិ, តតោ រតិំ បរមតរំ ន វិន្ទតិ។
Bhikkhū ca pabbhāragatova jhāyati, tato ratiṃ paramataraṃ na vindati.
៥២៥.
525.
‘‘យទា វិតក្កេ ឧបរុន្ធិយត្តនោ, នគន្តរេ នគវិវរំ សមស្សិតោ;
‘‘Yadā vitakke uparundhiyattano, nagantare nagavivaraṃ samassito;
វីតទ្ទរោ វីតខិលោវ ឈាយតិ, តតោ រតិំ បរមតរំ ន វិន្ទតិ។
Vītaddaro vītakhilova jhāyati, tato ratiṃ paramataraṃ na vindati.
៥២៦.
526.
‘‘យទា សុខី មលខិលសោកនាសនោ, និរគ្គឡោ និព្ពនថោ វិសល្លោ;
‘‘Yadā sukhī malakhilasokanāsano, niraggaḷo nibbanatho visallo;
សព្ពាសវេ ព្យន្តិកតោវ ឈាយតិ, តតោ រតិំ បរមតរំ ន វិន្ទតី’’តិ។
Sabbāsave byantikatova jhāyati, tato ratiṃ paramataraṃ na vindatī’’ti.
… ភូតោ ថេរោ…។
… Bhūto thero….
នវកនិបាតោ និដ្ឋិតោ។
Navakanipāto niṭṭhito.
តត្រុទ្ទានំ –
Tatruddānaṃ –
ភូតោ តថទ្ទសោ ថេរោ, ឯកោ ខគ្គវិសាណវា;
Bhūto tathaddaso thero, eko khaggavisāṇavā;
នវកម្ហិ និបាតម្ហិ, គាថាយោបិ ឥមា នវាតិ។
Navakamhi nipātamhi, gāthāyopi imā navāti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ១. ភូតត្ថេរគាថាវណ្ណនា • 1. Bhūtattheragāthāvaṇṇanā
