| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៣. ភិក្ខុនុបស្សយសិក្ខាបទវណ្ណនា
3. Bhikkhunupassayasikkhāpadavaṇṇanā
១៦២. តតិយសិក្ខាបទេ – អញ្ញត្រ សមយា ឱវទតិ អាបត្តិ បាចិត្តិយស្សាតិអាទីសុ អដ្ឋហិ គរុធម្មេហិ ឱវទន្តស្សេវ បាចិត្តិយំ, អញ្ញេន ធម្មេន ទុក្កដន្តិ វេទិតព្ពំ។ ឯកតោឧបសម្បន្នាយាតិ ភិក្ខុនិសង្ឃេ ឧបសម្បន្នាយ, ភិក្ខុសង្ឃេ ឧបសម្បន្នាយ បន ឱវទតោ បាចិត្តិយមេវ។ ឥតោ បរម្បិ យត្ថ យត្ថ ‘‘ឯកតោឧបសម្បន្នា’’តិ វុច្ចតិ, សព្ពត្ថ អយមេវ អត្ថោ ទដ្ឋព្ពោ។ សេសំ ឧត្តានមេវ។
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
កថិនសមុដ្ឋានំ – កាយវាចតោ, កាយវាចាចិត្តតោ ច សមុដ្ឋាតិ, កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ។
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ភិក្ខុនុបស្សយសិក្ខាបទំ តតិយំ។
Bhikkhunupassayasikkhāpadaṃ tatiyaṃ.
ឥទំ បនេត្ថ មហាបច្ចរិយំ វុត្តំ បកិណ្ណកំ – អសម្មតោ ចេ ភិក្ខុ អត្ថង្គតេ សូរិយេ ភិក្ខុនុបស្សយំ ឧបសង្កមិត្វា អដ្ឋហិ គរុធម្មេហិ ឱវទតិ, តីណិ បាចិត្តិយានិ។ អញ្ញេន ធម្មេន ឱវទតោ ទ្វេ ទុក្កដានិ, ឯកំ បាចិត្តិយំ។ កថំ? អសម្មតមូលកំ ទុក្កដំ, ឧបស្សយំ គន្ត្វា អញ្ញេន ធម្មេន ឱវទនមូលកំ ទុក្កដំ, អត្ថង្គតេ សូរិយេ ឱវទនមូលកំ បាចិត្តិយន្តិ។ សម្មតស្ស អត្ថង្គតេ សូរិយេ តត្ថ គន្ត្វា អដ្ឋហិ គរុធម្មេហិ ឱវទន្តស្ស ឯកា អនាបត្តិ, ទ្វេ បាចិត្តិយានិ។ កថំ? សម្មតត្តា អនាបត្តិ, អត្ថង្គតេ សូរិយេ ឱវទនមូលកំ ឯកំ, គន្ត្វា គរុធម្មេហិ ឱវទនមូលកំ ឯកន្តិ ទ្វេ បាចិត្តិយានិ។ តស្សេវ អញ្ញេន ធម្មេន ឱវទតោ ឯកា អនាបត្តិ, ឯកំ ទុក្កដំ, ឯកំ បាចិត្តិយំ។ កថំ? សម្មតត្តា អនាបត្តិ, គន្ត្វា អញ្ញេន ធម្មេន ឱវទនមូលកំ ទុក្កដំ, អត្ថង្គតេ សូរិយេ ឱវទនមូលកំ បាចិត្តិយន្តិ។ ទិវា បន គន្ត្វា ឱវទតោ សម្មតស្ស ច អសម្មតស្ស ច រត្តិំ ឱវទនមូលកំ ឯកំ បាចិត្តិយំ អបនេត្វា អវសេសា អាបត្តានាបត្តិយោ វេទិតព្ពាតិ។
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
បកិណ្ណកកថា និដ្ឋិតា។
Pakiṇṇakakathā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៣. ឱវាទវគ្គោ • 3. Ovādavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៣. ភិក្ខុនុបស្សយសិក្ខាបទវណ្ណនា • 3. Bhikkhunupassayasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៣. ភិក្ខុនុបស្សយសិក្ខាបទវណ្ណនា • 3. Bhikkhunupassayasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៣. ភិក្ខុនុបស្សយសិក្ខាបទវណ្ណនា • 3. Bhikkhunupassayasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៣. ភិក្ខុនុបស្សយសិក្ខាបទំ • 3. Bhikkhunupassayasikkhāpadaṃ
