| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
36. භෙසජ්ජනිද්දෙසො
36. Bhesajjaniddeso
භෙසජ්ජන්ති –
Bhesajjanti –
274.
274.
ජනස්ස කාතුං භෙසජ්ජං, දාතුං වත්තුං න ලබ්භති;
Janassa kātuṃ bhesajjaṃ, dātuṃ vattuṃ na labbhati;
භික්ඛාචරියවිඤ්ඤත්ති, සකෙහි සහධම්මිනං.
Bhikkhācariyaviññatti, sakehi sahadhamminaṃ.
275.
275.
පිතූනං තදුපට්ඨාකභික්ඛුනිස්සිතභණ්ඩුනං;
Pitūnaṃ tadupaṭṭhākabhikkhunissitabhaṇḍunaṃ;
ලබ්භං භෙසජ්ජකරණං, වෙය්යාවච්චකරස්ස ච.
Labbhaṃ bhesajjakaraṇaṃ, veyyāvaccakarassa ca.
276.
276.
මහාචූළපිතාමාතාභාතාභගිනිආදිනං;
Mahācūḷapitāmātābhātābhaginiādinaṃ;
තෙසං සකෙනත්තනියෙ, දාතබ්බං තාවකාලිකං.
Tesaṃ sakenattaniye, dātabbaṃ tāvakālikaṃ.
277.
277.
කුලදූසනවිඤ්ඤත්ති, භෙසජ්ජකරණාදි හි;
Kuladūsanaviññatti, bhesajjakaraṇādi hi;
මාතාපිතූහි සම්බන්ධඤාතකෙසු න රූහති.
Mātāpitūhi sambandhañātakesu na rūhati.
278.
278.
පිණ්ඩපාතො අනාමට්ඨො, මාතාදීනමවාරිතො;
Piṇḍapāto anāmaṭṭho, mātādīnamavārito;
ඡන්නං දාමරිකචොරස්ස, දාතුමිස්සරියස්ස ච.
Channaṃ dāmarikacorassa, dātumissariyassa ca.
279.
279.
තෙසං සුත්තොදකෙහෙව, පරිත්තං කයිරා නත්තනො;
Tesaṃ suttodakeheva, parittaṃ kayirā nattano;
භණිතබ්බං භණාපෙන්තෙ, පරිත්තං සාසනොගධං.
Bhaṇitabbaṃ bhaṇāpente, parittaṃ sāsanogadhaṃ.
280.
280.
සීලං ධම්මං පරිත්තං වා, ආගන්ත්වා දෙතු භාසතු;
Sīlaṃ dhammaṃ parittaṃ vā, āgantvā detu bhāsatu;
දාතුං වත්තුඤ්ච ලබ්භති, ගන්ත්වා කෙනචි පෙසිතොති.
Dātuṃ vattuñca labbhati, gantvā kenaci pesitoti.
