| Library / Tipiṭaka / តិបិដក • Tipiṭaka / ចូឡនិទ្ទេស-អដ្ឋកថា • Cūḷaniddesa-aṭṭhakathā |
១២. ភទ្រាវុធមាណវសុត្តនិទ្ទេសវណ្ណនា
12. Bhadrāvudhamāṇavasuttaniddesavaṇṇanā
៧០. ទ្វាទសមេ ភទ្រាវុធសុត្តេ – ឱកញ្ជហន្តិ អាលយំ ជហំ។ តណ្ហច្ឆិទន្តិ តណ្ហាកាយច្ឆិទំ។ អនេជន្តិ លោកធម្មេសុ និក្កម្បំ។ នន្ទិញ្ជហន្តិ អនាគតរូបាទិបត្ថនាជហំ។ ឯកា ឯវ ហិ សា តណ្ហា, ថុតិវសេន ឥធ នានប្បការតោ វុត្តា។ កប្បញ្ជហន្តិ ទុវិធំ កប្បជហំ។ អភិយាចេតិ អតិវិយ យាចាមិ។ សុត្វាន នាគស្ស អបនមិស្សន្តិ ឥតោតិ នាគស្ស តវ ភគវតោ វចនំ សុត្វា ឥតោ បាសាណកចេតិយតោ ពហុជនា បក្កមិស្សន្តីតិ អធិប្បាយោ។
70. Dvādasame bhadrāvudhasutte – okañjahanti ālayaṃ jahaṃ. Taṇhacchidanti taṇhākāyacchidaṃ. Anejanti lokadhammesu nikkampaṃ. Nandiñjahanti anāgatarūpādipatthanājahaṃ. Ekā eva hi sā taṇhā, thutivasena idha nānappakārato vuttā. Kappañjahanti duvidhaṃ kappajahaṃ. Abhiyāceti ativiya yācāmi. Sutvāna nāgassa apanamissanti itoti nāgassa tava bhagavato vacanaṃ sutvā ito pāsāṇakacetiyato bahujanā pakkamissantīti adhippāyo.
យេ ឧបយុបាទានាតិ តណ្ហាទិដ្ឋីហិ ឧបគន្ត្វា គហិតា។ ចេតសោ អធិដ្ឋានាតិ ចិត្តេ បតិដ្ឋិតា។ អភិនិវេសានុសយាតិ បតិដ្ឋហិត្វា អាគន្ត្វា សយិតា។
Yeupayupādānāti taṇhādiṭṭhīhi upagantvā gahitā. Cetaso adhiṭṭhānāti citte patiṭṭhitā. Abhinivesānusayāti patiṭṭhahitvā āgantvā sayitā.
៧១. ជនបទេហិ សង្គតាតិ អង្គាទីហិ ជនបទេហិ ឥធ សមាគតា។ វិយាករោហីតិ ធម្មំ ទេសេហិ។
71.Janapadehi saṅgatāti aṅgādīhi janapadehi idha samāgatā. Viyākarohīti dhammaṃ desehi.
សង្គតាតិ ឯតេ ខត្តិយាទយោ ឯកីភូតា។ សមាគតាតិ វុត្តប្បការេហិ ជនបទេហិ អាគតា។ សមោហិតាតិ រាសីភូតា។ សន្និបតិតាតិ អធិយោគា។
Saṅgatāti ete khattiyādayo ekībhūtā. Samāgatāti vuttappakārehi janapadehi āgatā. Samohitāti rāsībhūtā. Sannipatitāti adhiyogā.
៧២. អថស្ស អាសយានុលោមេន ធម្មំ ទេសេន្តោ ភគវា ឧបរូបរិគាថាយោ អភាសិ។ តត្ថ អាទានតណ្ហន្តិ រូបាទីនំ អាទាយិកំ គហណតណ្ហំ, តណ្ហុបាទានន្តិ វុត្តំ ហោតិ។ យំ យញ្ហិ លោកស្មិមុបាទិយន្តីតិ ឯតេសុ ឧទ្ធាទិភេទេសុ យំ យំ គណ្ហន្តិ។ តេនេវ មារោ អន្វេតិ ជន្តុន្តិ តេនេវ ឧបាទានបច្ចយនិព្ពត្តកម្មាភិសង្ខារនិព្ពត្តវសេន បដិសន្ធិក្ខន្ធមារោ តំ សត្តំ អនុគច្ឆតិ។
72. Athassa āsayānulomena dhammaṃ desento bhagavā uparūparigāthāyo abhāsi. Tattha ādānataṇhanti rūpādīnaṃ ādāyikaṃ gahaṇataṇhaṃ, taṇhupādānanti vuttaṃ hoti. Yaṃ yañhi lokasmimupādiyantīti etesu uddhādibhedesu yaṃ yaṃ gaṇhanti. Teneva māro anvetijantunti teneva upādānapaccayanibbattakammābhisaṅkhāranibbattavasena paṭisandhikkhandhamāro taṃ sattaṃ anugacchati.
៧៣. តស្មា បជានន្តិ តស្មា ឯតមាទីនវំ អនិច្ចាទិវសេន វា សង្ខារេ បជានន្តោ។ អាទានសត្តេ ឥតិ បេក្ខមានោ, បជំ ឥមំ មច្ចុធេយ្យេ វិសត្តន្តិ អាទាតព្ពដ្ឋេន អាទានេសុ រូបាទីសុ សត្តេ សព្ពលោកេ ឥមំ បជំ មច្ចុធេយ្យេ លគ្គំ បេក្ខមានោ , អាទានសត្តេ វា អាទានាភិនិវិដ្ឋេ បុគ្គលេ អាទានសង្គហេតុញ្ច ឥមំ បជំ មច្ចុធេយ្យេ លគ្គំ តតោ វីតិក្កមិតុំ អសមត្ថំ ឥតិ បេក្ខមានោ កិញ្ចនំ សព្ពលោកេ ន ឧបាទិយេថាតិ។ សេសំ សព្ពត្ថ បាកដមេវ។
73.Tasmā pajānanti tasmā etamādīnavaṃ aniccādivasena vā saṅkhāre pajānanto. Ādānasatte iti pekkhamāno, pajaṃ imaṃ maccudheyye visattanti ādātabbaṭṭhena ādānesu rūpādīsu satte sabbaloke imaṃ pajaṃ maccudheyye laggaṃ pekkhamāno , ādānasatte vā ādānābhiniviṭṭhe puggale ādānasaṅgahetuñca imaṃ pajaṃ maccudheyye laggaṃ tato vītikkamituṃ asamatthaṃ iti pekkhamāno kiñcanaṃ sabbaloke na upādiyethāti. Sesaṃ sabbattha pākaṭameva.
ឯវំ ភគវា ឥទម្បិ សុត្តំ អរហត្តនិកូដេនេវ ទេសេសិ, ទេសនាបរិយោសានេ ច បុព្ពសទិសោ ឯវ ធម្មាភិសមយោ អហោសីតិ។
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
សទ្ធម្មប្បជ្ជោតិកាយ ចូឡនិទ្ទេស-អដ្ឋកថាយ
Saddhammappajjotikāya cūḷaniddesa-aṭṭhakathāya
ភទ្រាវុធសុត្តនិទ្ទេសវណ្ណនា និដ្ឋិតា។
Bhadrāvudhasuttaniddesavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ចូឡនិទ្ទេសបាឡិ • Cūḷaniddesapāḷi
១២. ភទ្រាវុធមាណវបុច្ឆា • 12. Bhadrāvudhamāṇavapucchā
១២. ភទ្រាវុធមាណវបុច្ឆានិទ្ទេសោ • 12. Bhadrāvudhamāṇavapucchāniddeso
