| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. བཧུཀཱརསུཏྟཾ
4. Bahukārasuttaṃ
༢༤. ‘‘ཏཡོམེ , བྷིཀྑཝེ, པུགྒལཱ པུགྒལསྶ བཧུཀཱརཱ། ཀཏམེ ཏཡོ? ཡཾ, བྷིཀྑཝེ, པུགྒལཾ ཨཱགམྨ པུགྒལོ བུདྡྷཾ སརཎཾ གཏོ ཧོཏི, དྷམྨཾ སརཎཾ གཏོ ཧོཏི, སངྒྷཾ སརཎཾ གཏོ ཧོཏི; ཨཡཾ, བྷིཀྑཝེ, པུགྒལོ ཨིམསྶ པུགྒལསྶ བཧུཀཱརོ།
24. ‘‘Tayome , bhikkhave, puggalā puggalassa bahukārā. Katame tayo? Yaṃ, bhikkhave, puggalaṃ āgamma puggalo buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti; ayaṃ, bhikkhave, puggalo imassa puggalassa bahukāro.
‘‘པུན ཙཔརཾ, བྷིཀྑཝེ, ཡཾ པུགྒལཾ ཨཱགམྨ པུགྒལོ ‘ཨིདཾ དུཀྑ’ནྟི ཡཐཱབྷཱུཏཾ པཛཱནཱཏི, ‘ཨཡཾ དུཀྑསམུདཡོ’ཏི ཡཐཱབྷཱུཏཾ པཛཱནཱཏི, ‘ཨཡཾ དུཀྑནིརོདྷོ’ཏི ཡཐཱབྷཱུཏཾ པཛཱནཱཏི, ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡཐཱབྷཱུཏཾ པཛཱནཱཏི; ཨཡཾ, བྷིཀྑཝེ, པུགྒལོ ཨིམསྶ པུགྒལསྶ བཧུཀཱརོ།
‘‘Puna caparaṃ, bhikkhave, yaṃ puggalaṃ āgamma puggalo ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti; ayaṃ, bhikkhave, puggalo imassa puggalassa bahukāro.
‘‘པུན ཙཔརཾ, བྷིཀྑཝེ, ཡཾ པུགྒལཾ ཨཱགམྨ པུགྒལོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི; ཨཡཾ, བྷིཀྑཝེ, པུགྒལོ ཨིམསྶ པུགྒལསྶ བཧུཀཱརོ། ཨིམེ ཁོ, བྷིཀྑཝེ, ཏཡོ པུགྒལཱ པུགྒལསྶ བཧུཀཱརཱ།
‘‘Puna caparaṃ, bhikkhave, yaṃ puggalaṃ āgamma puggalo āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ayaṃ, bhikkhave, puggalo imassa puggalassa bahukāro. Ime kho, bhikkhave, tayo puggalā puggalassa bahukārā.
‘‘ཨིམེཧི ཙ པན, བྷིཀྑཝེ, ཏཱིཧི པུགྒལེཧི ཨིམསྶ པུགྒལསྶ ནཏྠཉྙོ པུགྒལོ བཧུཀཱརོཏི ཝདཱམི། ཨིམེསཾ པན, བྷིཀྑཝེ, ཏིཎྞཾ པུགྒལཱནཾ ཨིམིནཱ པུགྒལེན ན སུཔྤཏིཀཱརཾ ཝདཱམི, ཡདིདཾ ཨབྷིཝཱདནཔཙྩུཊྛཱནཨཉྫལིཀམྨསཱམཱིཙིཀམྨཙཱིཝརཔིཎྜཔཱཏསེནཱསན-གིལཱནཔཙྩཡབྷེསཛྫཔརིཀྑཱརཱནུཔྤདཱནེནཱ’’ཏི། ཙཏུཏྠཾ།
‘‘Imehi ca pana, bhikkhave, tīhi puggalehi imassa puggalassa natthañño puggalo bahukāroti vadāmi. Imesaṃ pana, bhikkhave, tiṇṇaṃ puggalānaṃ iminā puggalena na suppatikāraṃ vadāmi, yadidaṃ abhivādanapaccuṭṭhānaañjalikammasāmīcikammacīvarapiṇḍapātasenāsana-gilānapaccayabhesajjaparikkhārānuppadānenā’’ti. Catutthaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. བཧུཀཱརསུཏྟཝཎྞནཱ • 4. Bahukārasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤. བཧུཀཱརསུཏྟཝཎྞནཱ • 4. Bahukārasuttavaṇṇanā
