| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၉. ဗာဟိရဖသ္သနာနတ္တသုတ္တာဒိဝဏ္ဏနာ
9. Bāhiraphassanānattasuttādivaṇṇanā
၉၃. ဝုတ္တပ္ပကာရေ အာရမ္မဏေတိ ‘‘အာပာထေ ပတိတ’’န္တိအာဒိနာ ဟေဋ္ဌာ ဝုတ္တပ္ပကာရေ ရူပာရမ္မဏေ။ သညာတိ ရူပသညာဝ။ အရူပဓမ္မောပိ သမာနော ယသ္မိံ အာရမ္မဏေ ပဝတ္တတိ, တံ ဖုသန္တော ဝိယ ဟောတီတိ ဝုတ္တံ ‘‘အာရမ္မဏံ ဖုသမာနော’’တိ။ တဏ္ဟာယ ဝတ္ထုဘူတံယေဝ ရူပာရမ္မဏံ လဗ္ဘတီတိ ကတ္ဝာ ‘‘ရူပလာဘော’’တိ အဓိပ္ပေတန္တိ အာဟ ‘‘သဟ တဏ္ဟာယ အာရမ္မဏံ ရူပလာဘော’’တိ။ သဗ္ဗသင္ဂာဟိကနယောတိ ဧကသ္မိံယေဝ အာရမ္မဏေ သဗ္ဗေသံ သညာဒီနံ ဓမ္မာနံ ဥပ္ပတ္တိယာ သဗ္ဗသင္ဂဏ္ဟနဝသေန ဒသ္သိတနယော။ တေနာဟ ‘‘ဧကသ္မိံယေဝာ’’တိအာဒိ။ သဗ္ဗသင္ဂာဟိကနယောတိ ဝာ ဓုဝပရိဘောဂဝသေန နိဗဒ္ဓာရမ္မဏန္တိ ဝာ အာဂန္တုကာရမ္မဏန္တိ ဝာ ဝိဘာဂံ အကတ္ဝာ သဗ္ဗသင္ဂာဟိကနယော။ အပရော နယော။ မိသ္သကောတိ အာဂန္တုကာရမ္မဏေ နိဗဒ္ဓာရမ္မဏေ စ ဝိသယတော နိဗဒ္ဓာရမ္မဏေန မိသ္သကော။ နိဗဒ္ဓာရမ္မဏေ သတ္တာနံ ကိလေသော မန္ဒော ဟောတိ။ တထာ ဟိ သညာသင္ကပ္ပဖသ္သဝေဒနာဝ ဒသ္သိတာ။ ယံ ကိဉ္စိ ဝိယာတိ ယံ ကိဉ္စိ အညမညံ ဝိယ။ ခောဘေတ္ဝာတိ ကုတူဟလုပ္ပာဒနဝသေန စိတ္တံ ခောဘေတ္ဝာ။
93.Vuttappakāreārammaṇeti ‘‘āpāthe patita’’ntiādinā heṭṭhā vuttappakāre rūpārammaṇe. Saññāti rūpasaññāva. Arūpadhammopi samāno yasmiṃ ārammaṇe pavattati, taṃ phusanto viya hotīti vuttaṃ ‘‘ārammaṇaṃ phusamāno’’ti. Taṇhāya vatthubhūtaṃyeva rūpārammaṇaṃ labbhatīti katvā ‘‘rūpalābho’’ti adhippetanti āha ‘‘saha taṇhāya ārammaṇaṃ rūpalābho’’ti. Sabbasaṅgāhikanayoti ekasmiṃyeva ārammaṇe sabbesaṃ saññādīnaṃ dhammānaṃ uppattiyā sabbasaṅgaṇhanavasena dassitanayo. Tenāha ‘‘ekasmiṃyevā’’tiādi. Sabbasaṅgāhikanayoti vā dhuvaparibhogavasena nibaddhārammaṇanti vā āgantukārammaṇanti vā vibhāgaṃ akatvā sabbasaṅgāhikanayo. Aparo nayo. Missakoti āgantukārammaṇe nibaddhārammaṇe ca visayato nibaddhārammaṇena missako. Nibaddhārammaṇe sattānaṃ kileso mando hoti. Tathā hi saññāsaṅkappaphassavedanāva dassitā. Yaṃ kiñci viyāti yaṃ kiñci aññamaññaṃ viya. Khobhetvāti kutūhaluppādanavasena cittaṃ khobhetvā.
ဥပာသိကာတိ တသ္သ အမစ္စပုတ္တသ္သ ဘရိယံ သန္ဓာယာဟ။ တသ္မိန္တိ အာဂန္တုကာရမ္မဏေ။ လာဘော နာမ ‘‘လဗ္ဘတီ’’တိ ကတ္ဝာ။
Upāsikāti tassa amaccaputtassa bhariyaṃ sandhāyāha. Tasminti āgantukārammaṇe. Lābho nāma ‘‘labbhatī’’ti katvā.
ဥရုဝလ္လိယဝာသီတိ ဥရုဝလ္လိယလေဏဝာသီ, ဥရုဝလ္လိယဝိဟာရဝာသီတိ ဝဒန္တိ။ ပာဠိယာတိ ‘‘ဓာတုနာနတ္တံ, ဘိက္ခဝေ, ပဋိစ္စ ဥပ္ပဇ္ဇတီ’’တိအာဒိနယပဝတ္တာယ ဣမိသ္သာ သုတ္တပာဠိယာ။ ပရိဝဋ္ဋေတ္ဝာတိ မဇ္ဈေ ဂဟိတဖသ္သဝေဒနာပရိယောသာနေ ဌပနဝသေန ပာဠိံ ပရိဝဋ္ဋေတ္ဝာ။ ဝုတ္တပ္ပကာရေတိအာဒိ ပရိဝတ္တေတဗ္ဗာကာရဒသ္သနံ။ တတ္ထ ဝုတ္တပ္ပကာရေတိ အာပာထဂတရူပာရမ္မဏေ။ အဝိဘူတဝာရန္တိ အဝိဘူတာရမ္မဏဝာရံ။ အယမေဝ ဝာ ပာဌော။ ဂဏ္ဟန္တိ ကထေန္တိ။ ဧကဇဝနဝာရေပိ လဗ္ဘန္တိ စိရတရနိဝေသာဘာဝာ။ နာနာဇဝနဝာရေယေဝ ဒဠ္ဟတရနိဝေသတာယ။
Uruvalliyavāsīti uruvalliyaleṇavāsī, uruvalliyavihāravāsīti vadanti. Pāḷiyāti ‘‘dhātunānattaṃ, bhikkhave, paṭicca uppajjatī’’tiādinayapavattāya imissā suttapāḷiyā. Parivaṭṭetvāti majjhe gahitaphassavedanāpariyosāne ṭhapanavasena pāḷiṃ parivaṭṭetvā. Vuttappakāretiādi parivattetabbākāradassanaṃ. Tattha vuttappakāreti āpāthagatarūpārammaṇe. Avibhūtavāranti avibhūtārammaṇavāraṃ. Ayameva vā pāṭho. Gaṇhanti kathenti. Ekajavanavārepi labbhanti cirataranivesābhāvā. Nānājavanavāreyeva daḷhataranivesatāya.
၉၄. ဒသမံ ဥတ္တာနမေဝ နဝမေ ဝုတ္တနယတ္တာ။ ပဋိသေဓမတ္တမေဝ ဟေတ္ထ နာနတ္တန္တိ။
94.Dasamaṃ uttānameva navame vuttanayattā. Paṭisedhamattameva hettha nānattanti.
ဗာဟိရဖသ္သနာနတ္တသုတ္တာဒိဝဏ္ဏနာ နိဋ္ဌိတာ။
Bāhiraphassanānattasuttādivaṇṇanā niṭṭhitā.
နာနတ္တဝဂ္ဂဝဏ္ဏနာ နိဋ္ဌိတာ။
Nānattavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၉. ဗာဟိရဖသ္သနာနတ္တသုတ္တံ • 9. Bāhiraphassanānattasuttaṃ
၁၀. ဒုတိယဗာဟိရဖသ္သနာနတ္တသုတ္တံ • 10. Dutiyabāhiraphassanānattasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉. ဗာဟိရဖသ္သနာနတ္တသုတ္တာဒိဝဏ္ဏနာ • 9. Bāhiraphassanānattasuttādivaṇṇanā
