| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
४. अट्ठिपुञ्जसुत्तं
4. Aṭṭhipuñjasuttaṃ
२४. वुत्तञ्हेतं भगवता, वुत्तमरहताति मे सुतं –
24. Vuttañhetaṃ bhagavatā, vuttamarahatāti me sutaṃ –
‘‘एकपुग्गलस्स, भिक्खवे, कप्पं सन्धावतो संसरतो सिया एवं महा अट्ठिकङ्कलो अट्ठिपुञ्जो अट्ठिरासि यथायं वेपुल्लो पब्बतोः सचे संहारको अस्स, सम्भतञ्च न विनस्सेय्या’’ति। एतमत्थं भगवा अवोच। तत्थेतं इति वुच्चति –
‘‘Ekapuggalassa, bhikkhave, kappaṃ sandhāvato saṃsarato siyā evaṃ mahā aṭṭhikaṅkalo aṭṭhipuñjo aṭṭhirāsi yathāyaṃ vepullo pabbatoः sace saṃhārako assa, sambhatañca na vinasseyyā’’ti. Etamatthaṃ bhagavā avoca. Tatthetaṃ iti vuccati –
‘‘एकस्सेकेन कप्पेन, पुग्गलस्सट्ठिसञ्चयो।
‘‘Ekassekena kappena, puggalassaṭṭhisañcayo;
सिया पब्बतसमो रासि, इति वुत्तं महेसिना॥
Siyā pabbatasamo rāsi, iti vuttaṃ mahesinā.
‘‘सो खो पनायं अक्खातो, वेपुल्लो पब्बतो महा।
‘‘So kho panāyaṃ akkhāto, vepullo pabbato mahā;
उत्तरो गिज्झकूटस्स, मगधानं गिरिब्बजे॥
Uttaro gijjhakūṭassa, magadhānaṃ giribbaje.
‘‘यतो च अरियसच्चानि, सम्मप्पञ्ञाय पस्सति।
‘‘Yato ca ariyasaccāni, sammappaññāya passati;
दुक्खं दुक्खसमुप्पादं, दुक्खस्स च अतिक्कमं।
Dukkhaṃ dukkhasamuppādaṃ, dukkhassa ca atikkamaṃ;
अरियञ्चट्ठङ्गिकं मग्गं, दुक्खूपसमगामिनं॥
Ariyañcaṭṭhaṅgikaṃ maggaṃ, dukkhūpasamagāminaṃ.
‘‘स सत्तक्खत्तुं परमं, सन्धावित्वान पुग्गलो।
‘‘Sa sattakkhattuṃ paramaṃ, sandhāvitvāna puggalo;
दुक्खस्सन्तकरो होति, सब्बसंयोजनक्खया’’ति॥
Dukkhassantakaro hoti, sabbasaṃyojanakkhayā’’ti.
अयम्पि अत्थो वुत्तो भगवता, इति मे सुतन्ति। चतुत्थं।
Ayampi attho vutto bhagavatā, iti me sutanti. Catutthaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ४. अट्ठिपुञ्जसुत्तवण्णना • 4. Aṭṭhipuñjasuttavaṇṇanā
