| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
២. អាបង្គបញ្ហោ
2. Āpaṅgapañho
២. ‘‘ភន្តេ នាគសេន, ‘អាបស្ស បញ្ច អង្គានិ គហេតព្ពានី’តិ យំ វទេសិ, កតមានិ តានិ បញ្ច អង្គានិ គហេតព្ពានី’’តិ? ‘‘យថា, មហារាជ, អាបោ សុសណ្ឋិតមកម្បិតមលុឡិតសភាវបរិសុទ្ធោ, ឯវមេវ ខោ, មហារាជ, យោគិនា យោគាវចរេន កុហនលបននេមិត្តកនិប្បេសិកតំ អបនេត្វា សុសណ្ឋិតមកម្បិតមលុឡិតសភាវបរិសុទ្ធាចារេន ភវិតព្ពំ។ ឥទំ, មហារាជ, អាបស្ស បឋមំ អង្គំ គហេតព្ពំ។
2. ‘‘Bhante nāgasena, ‘āpassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, āpo susaṇṭhitamakampitamaluḷitasabhāvaparisuddho, evameva kho, mahārāja, yoginā yogāvacarena kuhanalapananemittakanippesikataṃ apanetvā susaṇṭhitamakampitamaluḷitasabhāvaparisuddhācārena bhavitabbaṃ. Idaṃ, mahārāja, āpassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, អាបោ សីតលសភាវសណ្ឋិតោ, ឯវមេវ ខោ, មហារាជ, យោគិនា យោគាវចរេន សព្ពសត្តេសុ ខន្តិមេត្តានុទ្ទយសម្បន្នេន ហិតេសិនា អនុកម្បកេន ភវិតព្ពំ។ ឥទំ, មហារាជ, អាបស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, āpo sītalasabhāvasaṇṭhito, evameva kho, mahārāja, yoginā yogāvacarena sabbasattesu khantimettānuddayasampannena hitesinā anukampakena bhavitabbaṃ. Idaṃ, mahārāja, āpassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, អាបោ អសុចិំ សុចិំ ករោតិ, ឯវមេវ ខោ, មហារាជ, យោគិនា យោគាវចរេន គាមេ វា អរញ្ញេ វា ឧបជ្ឈាយេ ឧបជ្ឈាយមត្តេសុ អាចរិយេ អាចរិយមត្តេសុ សព្ពត្ថ អនធិករណេន ភវិតព្ពំ អនវសេសការិនា។ ឥទំ, មហារាជ, អាបស្ស តតិយំ អង្គំ គហេតព្ពំ។
‘‘Puna caparaṃ, mahārāja, āpo asuciṃ suciṃ karoti, evameva kho, mahārāja, yoginā yogāvacarena gāme vā araññe vā upajjhāye upajjhāyamattesu ācariye ācariyamattesu sabbattha anadhikaraṇena bhavitabbaṃ anavasesakārinā. Idaṃ, mahārāja, āpassa tatiyaṃ aṅgaṃ gahetabbaṃ.
‘‘បុន ចបរំ, មហារាជ, អាបោ ពហុជនបត្ថិតោ, ឯវមេវ ខោ, មហារាជ, យោគិនា យោគាវចរេន អប្បិច្ឆសន្តុដ្ឋបវិវិត្តបដិសល្លានេន សតតំ សព្ពលោកមភិបត្ថិតេន ភវិតព្ពំ។ ឥទំ, មហារាជ, អាបស្ស ចតុត្ថំ អង្គំ គហេតព្ពំ។
‘‘Puna caparaṃ, mahārāja, āpo bahujanapatthito, evameva kho, mahārāja, yoginā yogāvacarena appicchasantuṭṭhapavivittapaṭisallānena satataṃ sabbalokamabhipatthitena bhavitabbaṃ. Idaṃ, mahārāja, āpassa catutthaṃ aṅgaṃ gahetabbaṃ.
‘‘បុន ចបរំ, មហារាជ, អាបោ ន កស្សចិ អហិតមុបទហតិ, ឯវមេវ ខោ, មហារាជ, យោគិនា យោគាវចរេន បរភណ្ឌនកលហវិគ្គហវិវាទរិត្តជ្ឈានអរតិជននំ កាយវចីចិត្តេហិ បាបកំ ន ករណីយំ។ ឥទំ, មហារាជ, អាបស្ស បញ្ចមំ អង្គំ គហេតព្ពំ។ ភាសិតម្បេតំ មហារាជ, ភគវតា, ទេវាតិទេវេន កណ្ហជាតកេ –
‘‘Puna caparaṃ, mahārāja, āpo na kassaci ahitamupadahati, evameva kho, mahārāja, yoginā yogāvacarena parabhaṇḍanakalahaviggahavivādarittajjhānaaratijananaṃ kāyavacīcittehi pāpakaṃ na karaṇīyaṃ. Idaṃ, mahārāja, āpassa pañcamaṃ aṅgaṃ gahetabbaṃ. Bhāsitampetaṃ mahārāja, bhagavatā, devātidevena kaṇhajātake –
‘‘‘វរញ្ចេ មេ អទោ សក្ក, សព្ពភូតានមិស្សរ;
‘‘‘Varañce me ado sakka, sabbabhūtānamissara;
ន មនោ វា សរីរំ វា, មំ-កតេ សក្ក កស្សចិ;
Na mano vā sarīraṃ vā, maṃ-kate sakka kassaci;
កទាចិ ឧបហញ្ញេថ, ឯតំ សក្ក វរំ វរេ’’’តិ។
Kadāci upahaññetha, etaṃ sakka varaṃ vare’’’ti.
អាបង្គបញ្ហោ ទុតិយោ។
Āpaṅgapañho dutiyo.
