| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
५. अम्बविमानवत्थु
5. Ambavimānavatthu
११४६.
1146.
‘‘उच्चमिदं मणिथूणं विमानं, समन्ततो द्वादस योजनानि।
‘‘Uccamidaṃ maṇithūṇaṃ vimānaṃ, samantato dvādasa yojanāni;
कूटागारा सत्तसता उळारा, वेळुरियथम्भा रुचकत्थता सुभा॥
Kūṭāgārā sattasatā uḷārā, veḷuriyathambhā rucakatthatā subhā.
११४७.
1147.
‘‘तत्थच्छसि पिवसि खादसि च, दिब्बा च वीणा पवदन्ति वग्गुं।
‘‘Tatthacchasi pivasi khādasi ca, dibbā ca vīṇā pavadanti vagguṃ;
दिब्बा रसा कामगुणेत्थ पञ्च, नारियो च नच्चन्ति सुवण्णछन्ना॥
Dibbā rasā kāmaguṇettha pañca, nāriyo ca naccanti suvaṇṇachannā.
११४८.
1148.
‘‘केन तेतादिसो वण्णो…पे॰… वण्णो च ते सब्बदिसा पभासती’’ति॥
‘‘Kena tetādiso vaṇṇo…pe… vaṇṇo ca te sabbadisā pabhāsatī’’ti.
११५०.
1150.
सो देवपुत्तो अत्तमनो…पे॰… यस्स कम्मस्सिदं फलं॥
So devaputto attamano…pe… yassa kammassidaṃ phalaṃ.
११५१.
1151.
परेसं भतको पोसो, अम्बाराममसिञ्चति॥
Paresaṃ bhatako poso, ambārāmamasiñcati.
११५२.
1152.
‘‘अथ तेनागमा भिक्खु, सारिपुत्तोति विस्सुतो।
‘‘Atha tenāgamā bhikkhu, sāriputtoti vissuto;
किलन्तरूपो कायेन, अकिलन्तोव चेतसा॥
Kilantarūpo kāyena, akilantova cetasā.
११५३.
1153.
‘‘तञ्च दिस्वान आयन्तं, अवोचं अम्बसिञ्चको।
‘‘Tañca disvāna āyantaṃ, avocaṃ ambasiñcako;
११५४.
1154.
‘‘तस्स मे अनुकम्पाय, निक्खिपि पत्तचीवरं।
‘‘Tassa me anukampāya, nikkhipi pattacīvaraṃ;
निसीदि रुक्खमूलस्मिं, छायाय एकचीवरो॥
Nisīdi rukkhamūlasmiṃ, chāyāya ekacīvaro.
११५५.
1155.
‘‘तञ्च अच्छेन वारिना, पसन्नमानसो नरो।
‘‘Tañca acchena vārinā, pasannamānaso naro;
न्हापयी रुक्खमूलस्मिं, छायाय एकचीवरं॥
Nhāpayī rukkhamūlasmiṃ, chāyāya ekacīvaraṃ.
११५६.
1156.
‘‘अम्बो च सित्तो समणो च न्हापितो, मया च पुञ्ञं पसुतं अनप्पकं।
‘‘Ambo ca sitto samaṇo ca nhāpito, mayā ca puññaṃ pasutaṃ anappakaṃ;
इति सो पीतिया कायं, सब्बं फरति अत्तनो॥
Iti so pītiyā kāyaṃ, sabbaṃ pharati attano.
११५७.
1157.
‘‘तदेव एत्तकं कम्मं, अकासिं ताय जातिया।
‘‘Tadeva ettakaṃ kammaṃ, akāsiṃ tāya jātiyā;
पहाय मानुसं देहं, उपपन्नोम्हि नन्दनं॥
Pahāya mānusaṃ dehaṃ, upapannomhi nandanaṃ.
११५८.
1158.
‘‘नन्दने च वने रम्मे, नानादिजगणायुते।
‘‘Nandane ca vane ramme, nānādijagaṇāyute;
रमामि नच्चगीतेहि, अच्छराहि पुरक्खतो’’ति॥
Ramāmi naccagītehi, accharāhi purakkhato’’ti.
अम्बविमानं पञ्चमं।
Ambavimānaṃ pañcamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / ५. अम्बविमानवण्णना • 5. Ambavimānavaṇṇanā
