| Library / Tipiṭaka / តិបិដក • Tipiṭaka / ចូឡវគ្គ-អដ្ឋកថា • Cūḷavagga-aṭṭhakathā |
យេភុយ្យសិកាកថា
Yebhuyyasikākathā
២០២. យេភុយ្យសិកាយ វូបសមេតុន្តិ ឯត្ថ យស្សា កិរិយាយ ធម្មវាទិនោ ពហុតរា, ឯសា យេភុយ្យសិកា នាម។
202.Yebhuyyasikāya vūpasametunti ettha yassā kiriyāya dhammavādino bahutarā, esā yebhuyyasikā nāma.
២០៤. អធម្មិកសលាកគ្គាហេសុ ឱរមត្តកន្តិ បរិត្តំ អប្បមត្តកំ ភណ្ឌនមត្តមេវ។ ន ច គតិគតន្តិ ទ្វេ តយោ អាវាសេ ន គតំ, តត្ថ តត្ថេវ វា ទ្វត្តិក្ខត្តុំ អវិនិច្ឆិតំ។ ន ច សរិតសារិតន្តិ ទ្វត្តិក្ខត្តុំ តេហិ ភិក្ខូហិ សយំ សរិតំ វា អញ្ញេហិ សារិតំ វា ន ហោតិ។ ជានាតីតិ សលាកំ គាហេន្តោ ជានាតិ ‘‘អធម្មវាទី ពហុតរា’’តិ។ អប្បេវ នាមាតិ ឥមិនា នីហារេន សលាកាយ គាហិយមានាយ ‘‘អបិ នាម អធម្មវាទិនោ ពហុតរា អស្សូ’’តិ អយមស្ស អជ្ឈាសយោ ហោតិ។ អបរេសុបិ ទ្វីសុ ឯសេវ នយោ។
204. Adhammikasalākaggāhesu oramattakanti parittaṃ appamattakaṃ bhaṇḍanamattameva. Na ca gatigatanti dve tayo āvāse na gataṃ, tattha tattheva vā dvattikkhattuṃ avinicchitaṃ. Na ca saritasāritanti dvattikkhattuṃ tehi bhikkhūhi sayaṃ saritaṃ vā aññehi sāritaṃ vā na hoti. Jānātīti salākaṃ gāhento jānāti ‘‘adhammavādī bahutarā’’ti. Appeva nāmāti iminā nīhārena salākāya gāhiyamānāya ‘‘api nāma adhammavādino bahutarā assū’’ti ayamassa ajjhāsayo hoti. Aparesupi dvīsu eseva nayo.
អធម្មេន គណ្ហន្តីតិ អធម្មវាទិនោ ‘‘ឯវំ មយំ ពហូ ភវិស្សាមា’’តិ ទ្វេ ទ្វេ សលាកាយោ គណ្ហន្តិ។ វគ្គា គណ្ហន្តីតិ ទ្វេ ធម្មវាទិនោ ឯកំ ធម្មវាទិសលាកំ គណ្ហន្តិ ‘‘ឯវំ ធម្មវាទិនោ ន ពហូ ភវិស្សន្តី’’តិ មញ្ញមានា។ ន ច យថាទិដ្ឋិយា គណ្ហន្តីតិ ធម្មវាទិនោ ហុត្វា ‘‘ពលវបក្ខំ ភជិស្សាមា’’តិ អធម្មវាទិសលាកំ គណ្ហន្តិ។ ធម្មិកសលាកគ្គាហេសុ អយមេវត្ថោ បរិវត្តេត្វា វេទិតព្ពោ។ ឯវំ សលាកំ គាហេត្វា សចេ ពហុតរា ធម្មវាទិនោ ហោន្តិ; យថា តេ វទន្តិ, ឯវំ តំ អធិករណំ វូបសមេតព្ពំ, ឯវំ យេភុយ្យសិកាយ វូបសន្តំ ហោតិ។ អយមេត្ថ សង្ខេបោ។ វិត្ថារោ បន បរតោបិ អាគមិស្សតិ។
Adhammenagaṇhantīti adhammavādino ‘‘evaṃ mayaṃ bahū bhavissāmā’’ti dve dve salākāyo gaṇhanti. Vaggā gaṇhantīti dve dhammavādino ekaṃ dhammavādisalākaṃ gaṇhanti ‘‘evaṃ dhammavādino na bahū bhavissantī’’ti maññamānā. Na ca yathādiṭṭhiyā gaṇhantīti dhammavādino hutvā ‘‘balavapakkhaṃ bhajissāmā’’ti adhammavādisalākaṃ gaṇhanti. Dhammikasalākaggāhesu ayamevattho parivattetvā veditabbo. Evaṃ salākaṃ gāhetvā sace bahutarā dhammavādino honti; yathā te vadanti, evaṃ taṃ adhikaraṇaṃ vūpasametabbaṃ, evaṃ yebhuyyasikāya vūpasantaṃ hoti. Ayamettha saṅkhepo. Vitthāro pana paratopi āgamissati.
យេភុយ្យសិកាកថា និដ្ឋិតា។
Yebhuyyasikākathā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi / ៥. យេភុយ្យសិកា • 5. Yebhuyyasikā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / សតិវិនយកថាទិវណ្ណនា • Sativinayakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៥. យេភុយ្យសិកាកថា • 5. Yebhuyyasikākathā
