| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
९. विपल्लाससुत्तं
9. Vipallāsasuttaṃ
४९. ‘‘चत्तारोमे , भिक्खवे, सञ्ञाविपल्लासा चित्तविपल्लासा दिट्ठिविपल्लासा । कतमे चत्तारो? अनिच्चे, भिक्खवे, निच्चन्ति सञ्ञाविपल्लासो चित्तविपल्लासो दिट्ठिविपल्लासो; दुक्खे, भिक्खवे, सुखन्ति सञ्ञाविपल्लासो चित्तविपल्लासो दिट्ठिविपल्लासो; अनत्तनि, भिक्खवे, अत्ताति सञ्ञाविपल्लासो चित्तविपल्लासो दिट्ठिविपल्लासो; असुभे, भिक्खवे, सुभन्ति सञ्ञाविपल्लासो चित्तविपल्लासो दिट्ठिविपल्लासो। इमे खो, भिक्खवे, चत्तारो सञ्ञाविपल्लासा चित्तविपल्लासा दिट्ठिविपल्लासा।
49. ‘‘Cattārome , bhikkhave, saññāvipallāsā cittavipallāsā diṭṭhivipallāsā . Katame cattāro? Anicce, bhikkhave, niccanti saññāvipallāso cittavipallāso diṭṭhivipallāso; dukkhe, bhikkhave, sukhanti saññāvipallāso cittavipallāso diṭṭhivipallāso; anattani, bhikkhave, attāti saññāvipallāso cittavipallāso diṭṭhivipallāso; asubhe, bhikkhave, subhanti saññāvipallāso cittavipallāso diṭṭhivipallāso. Ime kho, bhikkhave, cattāro saññāvipallāsā cittavipallāsā diṭṭhivipallāsā.
‘‘चत्तारोमे, भिक्खवे, नसञ्ञाविपल्लासा नचित्तविपल्लासा नदिट्ठिविपल्लासा। कतमे चत्तारो? अनिच्चे, भिक्खवे, अनिच्चन्ति नसञ्ञाविपल्लासो नचित्तविपल्लासो नदिट्ठिविपल्लासो; दुक्खे, भिक्खवे, दुक्खन्ति नसञ्ञाविपल्लासो नचित्तविपल्लासो नदिट्ठिविपल्लासो; अनत्तनि, भिक्खवे, अनत्ताति नसञ्ञाविपल्लासो नचित्तविपल्लासो नदिट्ठिविपल्लासो; असुभे, भिक्खवे, असुभन्ति नसञ्ञाविपल्लासो नचित्तविपल्लासो नदिट्ठिविपल्लासो । इमे खो, भिक्खवे, चत्तारो नसञ्ञाविपल्लासा नचित्तविपल्लासा नदिट्ठिविपल्लासा’’ति।
‘‘Cattārome, bhikkhave, nasaññāvipallāsā nacittavipallāsā nadiṭṭhivipallāsā. Katame cattāro? Anicce, bhikkhave, aniccanti nasaññāvipallāso nacittavipallāso nadiṭṭhivipallāso; dukkhe, bhikkhave, dukkhanti nasaññāvipallāso nacittavipallāso nadiṭṭhivipallāso; anattani, bhikkhave, anattāti nasaññāvipallāso nacittavipallāso nadiṭṭhivipallāso; asubhe, bhikkhave, asubhanti nasaññāvipallāso nacittavipallāso nadiṭṭhivipallāso . Ime kho, bhikkhave, cattāro nasaññāvipallāsā nacittavipallāsā nadiṭṭhivipallāsā’’ti.
‘‘अनिच्चे निच्चसञ्ञिनो, दुक्खे च सुखसञ्ञिनो।
‘‘Anicce niccasaññino, dukkhe ca sukhasaññino;
अनत्तनि च अत्ताति, असुभे सुभसञ्ञिनो।
Anattani ca attāti, asubhe subhasaññino;
मिच्छादिट्ठिहता सत्ता, खित्तचित्ता विसञ्ञिनो॥
Micchādiṭṭhihatā sattā, khittacittā visaññino.
‘‘ते योगयुत्ता मारस्स, अयोगक्खेमिनो जना।
‘‘Te yogayuttā mārassa, ayogakkhemino janā;
सत्ता गच्छन्ति संसारं, जातिमरणगामिनो॥
Sattā gacchanti saṃsāraṃ, jātimaraṇagāmino.
‘‘यदा च बुद्धा लोकस्मिं, उप्पज्जन्ति पभङ्करा।
‘‘Yadā ca buddhā lokasmiṃ, uppajjanti pabhaṅkarā;
‘‘तेसं सुत्वान सप्पञ्ञा, सचित्तं पच्चलद्धा ते।
‘‘Tesaṃ sutvāna sappaññā, sacittaṃ paccaladdhā te;
अनिच्चं अनिच्चतो दक्खुं, दुक्खमद्दक्खु दुक्खतो॥
Aniccaṃ aniccato dakkhuṃ, dukkhamaddakkhu dukkhato.
‘‘अनत्तनि अनत्ताति, असुभं असुभतद्दसुं।
‘‘Anattani anattāti, asubhaṃ asubhataddasuṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ९. विपल्लाससुत्तवण्णना • 9. Vipallāsasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ९. विपल्लाससुत्तवण्णना • 9. Vipallāsasuttavaṇṇanā
