| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๙. วฎฺฎโปตกจริยา
9. Vaṭṭapotakacariyā
๗๒.
72.
‘‘ปุนาปรํ ยทา โหมิ, มคเธ วฎฺฎโปตโก;
‘‘Punāparaṃ yadā homi, magadhe vaṭṭapotako;
อชาตปโกฺข ตรุโณ, มํสเปสิ กุลาวเกฯ
Ajātapakkho taruṇo, maṃsapesi kulāvake.
๗๓.
73.
ตสฺสา ผเสฺสน ชีวามิ, นตฺถิ เม กายิกํ พลํฯ
Tassā phassena jīvāmi, natthi me kāyikaṃ balaṃ.
๗๔.
74.
อุปคจฺฉติ อมฺหากํ, ปาวโก กณฺหวตฺตนีฯ
Upagacchati amhākaṃ, pāvako kaṇhavattanī.
๗๕.
75.
‘‘ธมธมา อิติเอวํ, สทฺทายโนฺต มหาสิขี;
‘‘Dhamadhamā itievaṃ, saddāyanto mahāsikhī;
อนุปุเพฺพน ฌาเปโนฺต, อคฺคิ มมมุปาคมิฯ
Anupubbena jhāpento, aggi mamamupāgami.
๗๖.
76.
‘‘อคฺคิเวคภยาตีตา, ตสิตา มาตาปิตา มม;
‘‘Aggivegabhayātītā, tasitā mātāpitā mama;
กุลาวเก มํ ฉเฑฺฑตฺวา, อตฺตานํ ปริโมจยุํฯ
Kulāvake maṃ chaḍḍetvā, attānaṃ parimocayuṃ.
๗๗.
77.
‘‘ปาเท ปเกฺข ปชหามิ, นตฺถิ เม กายิกํ พลํ;
‘‘Pāde pakkhe pajahāmi, natthi me kāyikaṃ balaṃ;
โสหํ อคติโก ตตฺถ, เอวํ จิเนฺตสหํ ตทาฯ
Sohaṃ agatiko tattha, evaṃ cintesahaṃ tadā.
๗๘.
78.
‘‘‘เยสาหํ อุปธาเวยฺยํ, ภีโต ตสิตเวธิโต;
‘‘‘Yesāhaṃ upadhāveyyaṃ, bhīto tasitavedhito;
เต มํ โอหาย ปกฺกนฺตา, กถํ เม อชฺช กาตเวฯ
Te maṃ ohāya pakkantā, kathaṃ me ajja kātave.
๗๙.
79.
‘‘‘อตฺถิ โลเก สีลคุโณ, สจฺจํ โสเจยฺยนุทฺทยา;
‘‘‘Atthi loke sīlaguṇo, saccaṃ soceyyanuddayā;
เตน สเจฺจน กาหามิ, สจฺจกิริยมุตฺตมํฯ
Tena saccena kāhāmi, saccakiriyamuttamaṃ.
๘๐.
80.
‘‘‘อาเวเชฺชตฺวา ธมฺมพลํ, สริตฺวา ปุพฺพเก ชิเน;
‘‘‘Āvejjetvā dhammabalaṃ, saritvā pubbake jine;
สจฺจพลมวสฺสาย, สจฺจกิริยมกาสหํฯ
Saccabalamavassāya, saccakiriyamakāsahaṃ.
๘๑.
81.
‘‘‘สนฺติ ปกฺขา อปตนา, สนฺติ ปาทา อวญฺจนา;
‘‘‘Santi pakkhā apatanā, santi pādā avañcanā;
มาตาปิตา จ นิกฺขนฺตา, ชาตเวท ปฎิกฺกม’ฯ
Mātāpitā ca nikkhantā, jātaveda paṭikkama’.
๘๒.
82.
‘‘สหสเจฺจ กเต มยฺหํ, มหาปชฺชลิโต สิขี;
‘‘Sahasacce kate mayhaṃ, mahāpajjalito sikhī;
วเชฺชสิ โสฬสกรีสานิ, อุทกํ ปตฺวา ยถา สิขี;
Vajjesi soḷasakarīsāni, udakaṃ patvā yathā sikhī;
สเจฺจน เม สโม นตฺถิ, เอสา เม สจฺจปารมี’’ติฯ
Saccena me samo natthi, esā me saccapāramī’’ti.
วฎฺฎโปตกจริยํ นวมํฯ
Vaṭṭapotakacariyaṃ navamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๙. วฎฺฎโปตกจริยาวณฺณนา • 9. Vaṭṭapotakacariyāvaṇṇanā
