| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
९. वट्टपोतकचरिया
9. Vaṭṭapotakacariyā
७२.
72.
‘‘पुनापरं यदा होमि, मगधे वट्टपोतको।
‘‘Punāparaṃ yadā homi, magadhe vaṭṭapotako;
अजातपक्खो तरुणो, मंसपेसि कुलावके॥
Ajātapakkho taruṇo, maṃsapesi kulāvake.
७३.
73.
तस्सा फस्सेन जीवामि, नत्थि मे कायिकं बलं॥
Tassā phassena jīvāmi, natthi me kāyikaṃ balaṃ.
७४.
74.
उपगच्छति अम्हाकं, पावको कण्हवत्तनी॥
Upagacchati amhākaṃ, pāvako kaṇhavattanī.
७५.
75.
‘‘धमधमा इतिएवं, सद्दायन्तो महासिखी।
‘‘Dhamadhamā itievaṃ, saddāyanto mahāsikhī;
अनुपुब्बेन झापेन्तो, अग्गि मममुपागमि॥
Anupubbena jhāpento, aggi mamamupāgami.
७६.
76.
‘‘अग्गिवेगभयातीता, तसिता मातापिता मम।
‘‘Aggivegabhayātītā, tasitā mātāpitā mama;
कुलावके मं छड्डेत्वा, अत्तानं परिमोचयुं॥
Kulāvake maṃ chaḍḍetvā, attānaṃ parimocayuṃ.
७७.
77.
‘‘पादे पक्खे पजहामि, नत्थि मे कायिकं बलं।
‘‘Pāde pakkhe pajahāmi, natthi me kāyikaṃ balaṃ;
सोहं अगतिको तत्थ, एवं चिन्तेसहं तदा॥
Sohaṃ agatiko tattha, evaṃ cintesahaṃ tadā.
७८.
78.
‘‘‘येसाहं उपधावेय्यं, भीतो तसितवेधितो।
‘‘‘Yesāhaṃ upadhāveyyaṃ, bhīto tasitavedhito;
ते मं ओहाय पक्कन्ता, कथं मे अज्ज कातवे॥
Te maṃ ohāya pakkantā, kathaṃ me ajja kātave.
७९.
79.
‘‘‘अत्थि लोके सीलगुणो, सच्चं सोचेय्यनुद्दया।
‘‘‘Atthi loke sīlaguṇo, saccaṃ soceyyanuddayā;
तेन सच्चेन काहामि, सच्चकिरियमुत्तमं॥
Tena saccena kāhāmi, saccakiriyamuttamaṃ.
८०.
80.
‘‘‘आवेज्जेत्वा धम्मबलं, सरित्वा पुब्बके जिने।
‘‘‘Āvejjetvā dhammabalaṃ, saritvā pubbake jine;
सच्चबलमवस्साय, सच्चकिरियमकासहं॥
Saccabalamavassāya, saccakiriyamakāsahaṃ.
८१.
81.
‘‘‘सन्ति पक्खा अपतना, सन्ति पादा अवञ्चना।
‘‘‘Santi pakkhā apatanā, santi pādā avañcanā;
मातापिता च निक्खन्ता, जातवेद पटिक्कम’॥
Mātāpitā ca nikkhantā, jātaveda paṭikkama’.
८२.
82.
‘‘सहसच्चे कते मय्हं, महापज्जलितो सिखी।
‘‘Sahasacce kate mayhaṃ, mahāpajjalito sikhī;
वज्जेसि सोळसकरीसानि, उदकं पत्वा यथा सिखी।
Vajjesi soḷasakarīsāni, udakaṃ patvā yathā sikhī;
सच्चेन मे समो नत्थि, एसा मे सच्चपारमी’’ति॥
Saccena me samo natthi, esā me saccapāramī’’ti.
वट्टपोतकचरियं नवमं।
Vaṭṭapotakacariyaṃ navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / ९. वट्टपोतकचरियावण्णना • 9. Vaṭṭapotakacariyāvaṇṇanā
