| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
39. වස්සූපනායිකනිද්දෙසො
39. Vassūpanāyikaniddeso
වස්සූපනායිකා චෙවාති –
Vassūpanāyikā cevāti –
309.
309.
පුරිමිකා පච්ඡිමිකා, දුවෙ වස්සූපනායිකා;
Purimikā pacchimikā, duve vassūpanāyikā;
තත්ථාලයපරිග්ගාහො, වචීභෙදො ච එදිසො.
Tatthālayapariggāho, vacībhedo ca ediso.
310.
310.
‘‘ඉමස්මිං විහාරෙ ඉමං, තෙමාසං වස්සං උපෙමි;
‘‘Imasmiṃ vihāre imaṃ, temāsaṃ vassaṃ upemi;
ඉධ වස්සං උපෙමී’’ති, චිත්තුප්පාදෙත්ථ ආලයො.
Idha vassaṃ upemī’’ti, cittuppādettha ālayo.
311.
311.
නොපෙතුකාමො ආවාසං, තදහූතික්කමෙය්ය වා;
Nopetukāmo āvāsaṃ, tadahūtikkameyya vā;
භවෙය්ය දුක්කටාපත්ති, ජානං වානුපගච්ඡතො.
Bhaveyya dukkaṭāpatti, jānaṃ vānupagacchato.
312.
312.
දුතියං උපගච්ඡෙය්ය, ඡින්නවස්සොනුපාගතො;
Dutiyaṃ upagaccheyya, chinnavassonupāgato;
න පක්කමෙය්ය තෙමාසං, අවසිත්වාන චාරිකං.
Na pakkameyya temāsaṃ, avasitvāna cārikaṃ.
313.
313.
මාතාපිතූනමත්ථාය, පඤ්චන්නං සහධම්මිනං;
Mātāpitūnamatthāya, pañcannaṃ sahadhamminaṃ;
ගිලානතදුපට්ඨාක-භත්තමෙසිස්සමොසධං.
Gilānatadupaṭṭhāka-bhattamesissamosadhaṃ.
314.
314.
පුච්ඡිස්සාමි උපට්ඨිස්සං, ගන්ත්වානභිරතං අහං;
Pucchissāmi upaṭṭhissaṃ, gantvānabhirataṃ ahaṃ;
වූපකාසිස්සං කුක්කුච්චං, දිට්ඨිං ගරුකමාදිකං.
Vūpakāsissaṃ kukkuccaṃ, diṭṭhiṃ garukamādikaṃ.
315.
315.
කරිස්සං වාපි කාරෙස්සං, විනොදනං විවෙචනං;
Karissaṃ vāpi kāressaṃ, vinodanaṃ vivecanaṃ;
වුට්ඨානං වාපි උස්සුක්කං, ගන්තුමිච්චෙවමාදිනා;
Vuṭṭhānaṃ vāpi ussukkaṃ, gantumiccevamādinā;
ලබ්භං සත්තාහකිච්චෙන, පහිතාපහිතෙපි වා.
Labbhaṃ sattāhakiccena, pahitāpahitepi vā.
316.
316.
සඞ්ඝකම්මෙ වජෙ ධම්ම-ස්සවනත්ථං නිමන්තිතො;
Saṅghakamme vaje dhamma-ssavanatthaṃ nimantito;
ගරූහි පහිතො වාපි, ගරූනං වාපි පස්සිතුං.
Garūhi pahito vāpi, garūnaṃ vāpi passituṃ.
317.
317.
න භණ්ඩධොවනුද්දෙස-ඤාතුපට්ඨාකදස්සනෙ;
Na bhaṇḍadhovanuddesa-ñātupaṭṭhākadassane;
ලබ්භං න පාපුණෙය්යජ්ජෙ-වාගමිස්සන්තුදූරගො.
Labbhaṃ na pāpuṇeyyajje-vāgamissantudūrago.
318.
318.
සෙසඤාතීහි පහිතෙ, භික්ඛුනිස්සිතකෙන ච;
Sesañātīhi pahite, bhikkhunissitakena ca;
උපාසකොපාසිකාහි, නිද්දිසිත්වාව පෙසිතෙ.
Upāsakopāsikāhi, niddisitvāva pesite.
319.
319.
වස්සච්ඡෙදෙ අනාපත්ති, අන්තරායෙ සතත්තනො;
Vassacchede anāpatti, antarāye satattano;
සඞ්ඝසාමග්ගියා වා නො, ඡින්නවස්සො පවාරයෙ.
Saṅghasāmaggiyā vā no, chinnavasso pavāraye.
320.
320.
අජ්ඣොකාසෙ ච රුක්ඛස්ස, සුසිරෙ විටපෙපි වා;
Ajjhokāse ca rukkhassa, susire viṭapepi vā;
ඡවකුටිඡත්තචාටී-සූපගන්තුං න වට්ටති.
Chavakuṭichattacāṭī-sūpagantuṃ na vaṭṭati.
321.
321.
අසෙනාසනිකෙනාපි, උපගන්තුං න ලබ්භති;
Asenāsanikenāpi, upagantuṃ na labbhati;
පවාරෙතුඤ්ච ලබ්භති, නාවාසත්ථවජූපගොති.
Pavāretuñca labbhati, nāvāsatthavajūpagoti.
