| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
16. வச்சபஸ்ஸாவட்டா²னிகனித்³தே³ஸவண்ணனா
16. Vaccapassāvaṭṭhānikaniddesavaṇṇanā
156. வச்சபஸ்ஸாவட்டா²னிகந்தி டா²னம்ஹி டா²னே வா ப⁴வங் வச்சபஸ்ஸாவட்டா²னிகங். யதா²வுட்³ட⁴ங் வச்சங் ந கரெய்யாதி ஸம்ப³ந்தோ⁴. யே யே வுட்³டா⁴ யதா²வுட்³ட⁴ங், ஆக³தப்படிபாடிங் ஹித்வா வுட்³ட⁴ப்படிபாடியாதி அத்தோ². வச்சந்தி உபலக்க²ணமத்தங், பஸ்ஸாவஞ்ச நஹானஞ்ச ந கரெய்யாதி அதி⁴ப்பாயோ. ததே³வ ஸமத்தே²தி ‘‘யாதானுபுப்³பி³யா’’திஆதி³னா. யாதானுபுப்³பி³யாதி யாதானங் க³தானங் அனுபுப்³பி³ அனுக்கமோ யாதானுபுப்³பி³, தாய. வச்ச…பே॰… தித்த²ஞ்சாதி ஏதங் தயங் லப்³ப⁴தீதி அத்தோ², பி⁴க்கு²னாதி விஞ்ஞாயதி.
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
157. உப்³ப⁴ஜித்வா ச ஸஹஸா ச நோ பவிஸெய்யாதி ஸம்ப³ந்தோ⁴. உப்³ப⁴ஜித்வாதி சீவரங் தூ³ரதோவ உக்கி²பித்வா. ஸஹஸாதி ஸீக⁴ங். உக்காஸித்வா பவிஸெய்யாதி யோஜனா.
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
158. வச்சபஸ்ஸாவதோ³ணீனங் ப³ஹீதி ஸம்ப³ந்தோ⁴. உப⁴யந்தி வச்சம்பி பஸ்ஸாவம்பி.
158. Vaccapassāvadoṇīnaṃ bahīti sambandho. Ubhayanti vaccampi passāvampi.
159. கூபேதி வச்சாவாடே. கட்ட²ந்தி அவலேக²னகட்ட²ங். ப²ருஸேனாதி க²ரேன அவலேக²னகட்டே²ன. உஹதஞ்சாபீதி அத்தனா வா பரேன வா உஹதஞ்சாபி வச்சமக்கி²தஞ்சாபீதி அத்தோ². தோ⁴வயேதி ஸதி உத³கே, உத³கே அஸதி கட்டே²னபி ஸோதெ⁴ய்ய.
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
160. ந நிக்க²மேதி ந நிக்க²மெய்ய. சபு சபூதி அனுகரணங், விச்சா²யங் த்³வித்தே சபு சபு கத்வாதி கிரியாவிஸேஸனங். நாசமெய்யாதி ந தோ⁴வெய்ய. ஸதி பன உத³கே ஆசமிதப்³ப³ங், அஸதி யேன கேனசி புஞ்சி²த்வா க³ந்தப்³ப³ங், ஸப்³ப³ஸாதா⁴ரணட்டா²னே ச ஆசமனகும்பி⁴யா உத³கங் ந ஸேஸேதப்³ப³ங். உக்லாபந்தி கசவரங். விஸோத⁴யேதி விஹாரஸோத⁴னே விய வச்சபஸ்ஸாவகுடியோ, பரிவேணகொட்ட²கே ச ஸம்மஜ்ஜெய்ய. ஸப்³ப³த்தே²வ ச பன வத்தபே⁴தே³ து³க்கடங்.
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
வச்சபஸ்ஸாவட்டா²னிகனித்³தே³ஸவண்ணனா நிட்டி²தா.
Vaccapassāvaṭṭhānikaniddesavaṇṇanā niṭṭhitā.
