| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾಪಾಳಿ • Therīgāthāpāḷi |
೭. ಸತ್ತಕನಿಪಾತೋ
7. Sattakanipāto
೧. ಉತ್ತರಾಥೇರೀಗಾಥಾ
1. Uttarātherīgāthā
೧೭೫.
175.
‘‘‘ಮುಸಲಾನಿ ಗಹೇತ್ವಾನ, ಧಞ್ಞಂ ಕೋಟ್ಟೇನ್ತಿ ಮಾಣವಾ।
‘‘‘Musalāni gahetvāna, dhaññaṃ koṭṭenti māṇavā;
ಪುತ್ತದಾರಾನಿ ಪೋಸೇನ್ತಾ, ಧನಂ ವಿನ್ದನ್ತಿ ಮಾಣವಾ॥
Puttadārāni posentā, dhanaṃ vindanti māṇavā.
೧೭೬.
176.
‘‘‘ಘಟೇಥ ಬುದ್ಧಸಾಸನೇ, ಯಂ ಕತ್ವಾ ನಾನುತಪ್ಪತಿ।
‘‘‘Ghaṭetha buddhasāsane, yaṃ katvā nānutappati;
ಖಿಪ್ಪಂ ಪಾದಾನಿ ಧೋವಿತ್ವಾ, ಏಕಮನ್ತಂ ನಿಸೀದಥ॥
Khippaṃ pādāni dhovitvā, ekamantaṃ nisīdatha.
೧೭೭.
177.
‘‘‘ಚಿತ್ತಂ ಉಪಟ್ಠಪೇತ್ವಾನ, ಏಕಗ್ಗಂ ಸುಸಮಾಹಿತಂ।
‘‘‘Cittaṃ upaṭṭhapetvāna, ekaggaṃ susamāhitaṃ;
ಪಚ್ಚವೇಕ್ಖಥ ಸಙ್ಖಾರೇ, ಪರತೋ ನೋ ಚ ಅತ್ತತೋ’॥
Paccavekkhatha saṅkhāre, parato no ca attato’.
೧೭೮.
178.
‘‘ತಸ್ಸಾಹಂ ವಚನಂ ಸುತ್ವಾ, ಪಟಾಚಾರಾನುಸಾಸನಿಂ।
‘‘Tassāhaṃ vacanaṃ sutvā, paṭācārānusāsaniṃ;
ಪಾದೇ ಪಕ್ಖಾಲಯಿತ್ವಾನ, ಏಕಮನ್ತೇ ಉಪಾವಿಸಿಂ॥
Pāde pakkhālayitvāna, ekamante upāvisiṃ.
೧೭೯.
179.
‘‘ರತ್ತಿಯಾ ಪುರಿಮೇ ಯಾಮೇ, ಪುಬ್ಬಜಾತಿಮನುಸ್ಸರಿಂ।
‘‘Rattiyā purime yāme, pubbajātimanussariṃ;
ರತ್ತಿಯಾ ಮಜ್ಝಿಮೇ ಯಾಮೇ, ದಿಬ್ಬಚಕ್ಖುಂ ವಿಸೋಧಯಿಂ॥
Rattiyā majjhime yāme, dibbacakkhuṃ visodhayiṃ.
೧೮೦.
180.
‘‘ರತ್ತಿಯಾ ಪಚ್ಛಿಮೇ ಯಾಮೇ, ತಮೋಕ್ಖನ್ಧಂ ಪದಾಲಯಿಂ।
‘‘Rattiyā pacchime yāme, tamokkhandhaṃ padālayiṃ;
ತೇವಿಜ್ಜಾ ಅಥ ವುಟ್ಠಾಸಿಂ, ಕತಾ ತೇ ಅನುಸಾಸನೀ॥
Tevijjā atha vuṭṭhāsiṃ, katā te anusāsanī.
೧೮೧.
181.
‘‘ಸಕ್ಕಂವ ದೇವಾ ತಿದಸಾ, ಸಙ್ಗಾಮೇ ಅಪರಾಜಿತಂ।
‘‘Sakkaṃva devā tidasā, saṅgāme aparājitaṃ;
ಪುರಕ್ಖತ್ವಾ ವಿಹಸ್ಸಾಮಿ, ತೇವಿಜ್ಜಾಮ್ಹಿ ಅನಾಸವಾ’’॥
Purakkhatvā vihassāmi, tevijjāmhi anāsavā’’.
… ಉತ್ತರಾ ಥೇರೀ…।
… Uttarā therī….
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā / ೧. ಉತ್ತರಾಥೇರೀಗಾಥಾವಣ್ಣನಾ • 1. Uttarātherīgāthāvaṇṇanā
