| Library / Tipiṭaka / ติปิฎก • Tipiṭaka / อิติวุตฺตกปาฬิ • Itivuttakapāḷi |
๓. อุภยตฺถสุตฺตํ
3. Ubhayatthasuttaṃ
๒๓. วุตฺตเญฺหตํ ภควตา, วุตฺตมรหตาติ เม สุตํ –
23. Vuttañhetaṃ bhagavatā, vuttamarahatāti me sutaṃ –
‘‘เอกธโมฺม , ภิกฺขเว, ภาวิโต พหุลีกโต อุโภ อเตฺถ สมธิคยฺห ติฎฺฐติ – ทิฎฺฐธมฺมิกเญฺจว อตฺถํ สมฺปรายิกญฺจฯ กตโม เอกธโมฺม? อปฺปมาโท กุสเลสุ ธเมฺมสุฯ อยํ โข, ภิกฺขเว, เอกธโมฺม ภาวิโต พหุลีกโต อุโภ อเตฺถ สมธิคยฺห ติฎฺฐติ – ทิฎฺฐธมฺมิกเญฺจว อตฺถํ สมฺปรายิกญฺจา’’ติฯ เอตมตฺถํ ภควา อโวจฯ ตเตฺถตํ อิติ วุจฺจติ –
‘‘Ekadhammo , bhikkhave, bhāvito bahulīkato ubho atthe samadhigayha tiṭṭhati – diṭṭhadhammikañceva atthaṃ samparāyikañca. Katamo ekadhammo? Appamādo kusalesu dhammesu. Ayaṃ kho, bhikkhave, ekadhammo bhāvito bahulīkato ubho atthe samadhigayha tiṭṭhati – diṭṭhadhammikañceva atthaṃ samparāyikañcā’’ti. Etamatthaṃ bhagavā avoca. Tatthetaṃ iti vuccati –
‘‘อปฺปมาทํ ปสํสนฺติ, ปุญฺญกิริยาสุ ปณฺฑิตา;
‘‘Appamādaṃ pasaṃsanti, puññakiriyāsu paṇḍitā;
อปฺปมโตฺต อุโภ อเตฺถ, อธิคณฺหาติ ปณฺฑิโตฯ
Appamatto ubho atthe, adhigaṇhāti paṇḍito.
‘‘ทิเฎฺฐ ธเมฺม จ โย อโตฺถ, โย จโตฺถ สมฺปรายิโก;
‘‘Diṭṭhe dhamme ca yo attho, yo cattho samparāyiko;
อตฺถาภิสมยา ธีโร, ปณฺฑิโตติ ปวุจฺจตี’’ติฯ
Atthābhisamayā dhīro, paṇḍitoti pavuccatī’’ti.
อยมฺปิ อโตฺถ วุโตฺต ภควตา, อิติ เม สุตนฺติฯ ตติยํฯ
Ayampi attho vutto bhagavatā, iti me sutanti. Tatiyaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อิติวุตฺตก-อฎฺฐกถา • Itivuttaka-aṭṭhakathā / ๓. อุภยตฺถสุตฺตวณฺณนา • 3. Ubhayatthasuttavaṇṇanā
