| Library / Tipiṭaka / តិបិដក • Tipiṭaka / ចូឡវគ្គ-អដ្ឋកថា • Cūḷavagga-aṭṭhakathā |
តិវិធសលាកគ្គាហកថា
Tividhasalākaggāhakathā
២៣៥. សញ្ញត្តិយាតិ សញ្ញាបនត្ថាយ។ គូឡ្ហកន្តិអាទីសុ អលជ្ជុស្សន្នាយ បរិសាយ គូឡ្ហកោ សលាកគ្គាហោ កាតព្ពោ, លជ្ជុស្សន្នាយ បរិសាយ វិវដកោ, ពាលុស្សន្នាយ សកណ្ណជប្បកោ។ វណ្ណាវណ្ណាយោ កត្វាតិ ធម្មវាទីនញ្ច អធម្មវាទីនញ្ច សលាកាយោ និមិត្តសញ្ញំ អារោបេត្វា អញ្ញមញ្ញំ វិសភាគា កាតព្ពា។ តតោ តា សព្ពាបិ ចីវរភោគេ កត្វា វុត្តនយេន គាហេតព្ពា។ ទុគ្គហោតិ បច្ចុក្កឌ្ឍិតព្ពន្តិ ‘‘ទុគ្គហិតា សលាកាយោ’’តិ វត្វា បុន គហេត្វា យាវតតិយំ គាហេតព្ពា។ សុគ្គហោតិ សាវេតព្ពន្តិ ឯកស្មិម្បិ ធម្មវាទិម្ហិ អតិរេកជាតេ ‘‘សុគ្គហិតា សលាកាយោ’’តិ សាវេតព្ពំ។ យថា ច តេ ធម្មវាទិនោ វទន្តិ តថា តំ អធិករណំ វូបសមេតព្ពន្តិ។ អថ យាវតតិយម្បិ អធម្មវាទិនោវ ពហុតរា ហោន្តិ, អជ្ជ ‘‘អកាលោ, ស្វេ ជានិស្សាមា’’តិ វុដ្ឋហិត្វា អលជ្ជីនំ បក្ខភេទត្ថាយ ធម្មវាទិបក្ខំ បរិយេសិត្វា បុនទិវសេ សលាកគ្គាហោ កាតព្ពោ។ អយំ គូឡ្ហកោ សលាកគ្គាហោ។
235.Saññattiyāti saññāpanatthāya. Gūḷhakantiādīsu alajjussannāya parisāya gūḷhako salākaggāho kātabbo, lajjussannāya parisāya vivaṭako, bālussannāya sakaṇṇajappako. Vaṇṇāvaṇṇāyo katvāti dhammavādīnañca adhammavādīnañca salākāyo nimittasaññaṃ āropetvā aññamaññaṃ visabhāgā kātabbā. Tato tā sabbāpi cīvarabhoge katvā vuttanayena gāhetabbā. Duggahoti paccukkaḍḍhitabbanti ‘‘duggahitā salākāyo’’ti vatvā puna gahetvā yāvatatiyaṃ gāhetabbā. Suggahoti sāvetabbanti ekasmimpi dhammavādimhi atirekajāte ‘‘suggahitā salākāyo’’ti sāvetabbaṃ. Yathā ca te dhammavādino vadanti tathā taṃ adhikaraṇaṃ vūpasametabbanti. Atha yāvatatiyampi adhammavādinova bahutarā honti, ajja ‘‘akālo, sve jānissāmā’’ti vuṭṭhahitvā alajjīnaṃ pakkhabhedatthāya dhammavādipakkhaṃ pariyesitvā punadivase salākaggāho kātabbo. Ayaṃ gūḷhako salākaggāho.
សកណ្ណជប្បកេ បន គហិតេ វត្តព្ពោតិ ឯត្ថ សចេ សង្ឃត្ថេរោ អធម្មវាទិសលាកំ គណ្ហាតិ, សោ ឯវំ អវពោធេតព្ពោ – ‘‘ភន្តេ, តុម្ហេ មហល្លកា វយោអនុប្បត្តា, តុម្ហាកំ ឯតំ ន យុត្តំ, អយំ បន ធម្មវាទិសលាកា’’តិ អស្ស ឥតរា សលាកា ទស្សេតព្ពា។ សចេ សោ តំ គណ្ហាតិ, ទាតព្ពា។ អថ នេវ អវពុជ្ឈតិ, តតោ ‘‘មា កស្សចិ អារោចេហី’’តិ វត្តព្ពោ។ សេសំ វុត្តនយមេវ។ វិវដកោ វិវដត្ថោយេវ។
Sakaṇṇajappake pana gahite vattabboti ettha sace saṅghatthero adhammavādisalākaṃ gaṇhāti, so evaṃ avabodhetabbo – ‘‘bhante, tumhe mahallakā vayoanuppattā, tumhākaṃ etaṃ na yuttaṃ, ayaṃ pana dhammavādisalākā’’ti assa itarā salākā dassetabbā. Sace so taṃ gaṇhāti, dātabbā. Atha neva avabujjhati, tato ‘‘mā kassaci ārocehī’’ti vattabbo. Sesaṃ vuttanayameva. Vivaṭako vivaṭatthoyeva.
តិវិធសលាកគ្គាហកថា និដ្ឋិតា។
Tividhasalākaggāhakathā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi / តិវិធសលាកគ្គាហោ • Tividhasalākaggāho
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អធិករណវូបសមនសមថកថាទិវណ្ណនា • Adhikaraṇavūpasamanasamathakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / តិវិធសលាកគ្គាហកថា • Tividhasalākaggāhakathā
