| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
७. तिस्समेत्तेय्यसुत्तं
7. Tissametteyyasuttaṃ
८२०.
820.
‘‘मेथुनमनुयुत्तस्स, (इच्चायस्मा तिस्सो मेत्तेय्यो) विघातं ब्रूहि मारिस।
‘‘Methunamanuyuttassa, (iccāyasmā tisso metteyyo) vighātaṃ brūhi mārisa;
सुत्वान तव सासनं, विवेके सिक्खिस्सामसे॥
Sutvāna tava sāsanaṃ, viveke sikkhissāmase.
८२१.
821.
‘‘मेथुनमनुयुत्तस्स, (मेत्तेय्याति भगवा) मुस्सते वापि सासनं।
‘‘Methunamanuyuttassa, (metteyyāti bhagavā) mussate vāpi sāsanaṃ;
मिच्छा च पटिपज्जति, एतं तस्मिं अनारियं॥
Micchā ca paṭipajjati, etaṃ tasmiṃ anāriyaṃ.
८२२.
822.
‘‘एको पुब्बे चरित्वान, मेथुनं यो निसेवति।
‘‘Eko pubbe caritvāna, methunaṃ yo nisevati;
यानं भन्तं व तं लोके, हीनमाहु पुथुज्जनं॥
Yānaṃ bhantaṃ va taṃ loke, hīnamāhu puthujjanaṃ.
८२३.
823.
‘‘यसो कित्ति च या पुब्बे, हायते वापि तस्स सा।
‘‘Yaso kitti ca yā pubbe, hāyate vāpi tassa sā;
एतम्पि दिस्वा सिक्खेथ, मेथुनं विप्पहातवे॥
Etampi disvā sikkhetha, methunaṃ vippahātave.
८२४.
824.
‘‘सङ्कप्पेहि परेतो सो, कपणो विय झायति।
‘‘Saṅkappehi pareto so, kapaṇo viya jhāyati;
सुत्वा परेसं निग्घोसं, मङ्कु होति तथाविधो॥
Sutvā paresaṃ nigghosaṃ, maṅku hoti tathāvidho.
८२५.
825.
‘‘अथ सत्थानि कुरुते, परवादेहि चोदितो।
‘‘Atha satthāni kurute, paravādehi codito;
एस ख्वस्स महागेधो, मोसवज्जं पगाहति॥
Esa khvassa mahāgedho, mosavajjaṃ pagāhati.
८२६.
826.
‘‘पण्डितोति समञ्ञातो, एकचरियं अधिट्ठितो।
‘‘Paṇḍitoti samaññāto, ekacariyaṃ adhiṭṭhito;
८२७.
827.
‘‘एतमादीनवं ञत्वा, मुनि पुब्बापरे इध।
‘‘Etamādīnavaṃ ñatvā, muni pubbāpare idha;
एकचरियं दळ्हं कयिरा, न निसेवेथ मेथुनं॥
Ekacariyaṃ daḷhaṃ kayirā, na nisevetha methunaṃ.
८२८.
828.
‘‘विवेकञ्ञेव सिक्खेथ, एतदरियानमुत्तमं।
‘‘Vivekaññeva sikkhetha, etadariyānamuttamaṃ;
न तेन सेट्ठो मञ्ञेथ, स वे निब्बानसन्तिके॥
Na tena seṭṭho maññetha, sa ve nibbānasantike.
८२९.
829.
‘‘रित्तस्स मुनिनो चरतो, कामेसु अनपेक्खिनो।
‘‘Rittassa munino carato, kāmesu anapekkhino;
तिस्समेत्तेय्यसुत्तं सत्तमं निट्ठितं।
Tissametteyyasuttaṃ sattamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ७. तिस्समेत्तेय्यसुत्तवण्णना • 7. Tissametteyyasuttavaṇṇanā
