| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. ཏཏིཡཝིབྷངྒསུཏྟཾ
8. Tatiyavibhaṅgasuttaṃ
༥༠༨. ‘‘པཉྩིམཱནི, བྷིཀྑཝེ, ཨིནྡྲིཡཱནི། ཀཏམཱནི པཉྩ? སུཁིནྡྲིཡཾ, དུཀྑིནྡྲིཡཾ, སོམནསྶིནྡྲིཡཾ, དོམནསྶིནྡྲིཡཾ, ཨུཔེཀྑིནྡྲིཡཾ།
508. ‘‘Pañcimāni, bhikkhave, indriyāni. Katamāni pañca? Sukhindriyaṃ, dukkhindriyaṃ, somanassindriyaṃ, domanassindriyaṃ, upekkhindriyaṃ.
‘‘ཀཏམཉྩ , བྷིཀྑཝེ, སུཁིནྡྲིཡཾ? ཡཾ ཁོ, བྷིཀྑཝེ, ཀཱཡིཀཾ སུཁཾ , ཀཱཡིཀཾ སཱཏཾ, ཀཱཡསམྥསྶཛཾ སུཁཾ སཱཏཾ ཝེདཡིཏཾ – ཨིདཾ ཝུཙྩཏི, བྷིཀྑཝེ, སུཁིནྡྲིཡཾ།
‘‘Katamañca , bhikkhave, sukhindriyaṃ? Yaṃ kho, bhikkhave, kāyikaṃ sukhaṃ , kāyikaṃ sātaṃ, kāyasamphassajaṃ sukhaṃ sātaṃ vedayitaṃ – idaṃ vuccati, bhikkhave, sukhindriyaṃ.
‘‘ཀཏམཉྩ, བྷིཀྑཝེ, དུཀྑིནྡྲིཡཾ? ཡཾ ཁོ, བྷིཀྑཝེ, ཀཱཡིཀཾ དུཀྑཾ, ཀཱཡིཀཾ ཨསཱཏཾ, ཀཱཡསམྥསྶཛཾ དུཀྑཾ ཨསཱཏཾ ཝེདཡིཏཾ – ཨིདཾ ཝུཙྩཏི, བྷིཀྑཝེ, དུཀྑིནྡྲིཡཾ།
‘‘Katamañca, bhikkhave, dukkhindriyaṃ? Yaṃ kho, bhikkhave, kāyikaṃ dukkhaṃ, kāyikaṃ asātaṃ, kāyasamphassajaṃ dukkhaṃ asātaṃ vedayitaṃ – idaṃ vuccati, bhikkhave, dukkhindriyaṃ.
‘‘ཀཏམཉྩ, བྷིཀྑཝེ, སོམནསྶིནྡྲིཡཾ? ཡཾ ཁོ, བྷིཀྑཝེ, ཙེཏསིཀཾ སུཁཾ, ཙེཏསིཀཾ སཱཏཾ, མནོསམྥསྶཛཾ སུཁཾ སཱཏཾ ཝེདཡིཏཾ – ཨིདཾ ཝུཙྩཏི, བྷིཀྑཝེ, སོམནསྶིནྡྲིཡཾ།
‘‘Katamañca, bhikkhave, somanassindriyaṃ? Yaṃ kho, bhikkhave, cetasikaṃ sukhaṃ, cetasikaṃ sātaṃ, manosamphassajaṃ sukhaṃ sātaṃ vedayitaṃ – idaṃ vuccati, bhikkhave, somanassindriyaṃ.
‘‘ཀཏམཉྩ , བྷིཀྑཝེ, དོམནསྶིནྡྲིཡཾ? ཡཾ ཁོ, བྷིཀྑཝེ, ཙེཏསིཀཾ དུཀྑཾ, ཙེཏསིཀཾ ཨསཱཏཾ, མནོསམྥསྶཛཾ དུཀྑཾ ཨསཱཏཾ ཝེདཡིཏཾ – ཨིདཾ ཝུཙྩཏི, བྷིཀྑཝེ, དོམནསྶིནྡྲིཡཾ།
‘‘Katamañca , bhikkhave, domanassindriyaṃ? Yaṃ kho, bhikkhave, cetasikaṃ dukkhaṃ, cetasikaṃ asātaṃ, manosamphassajaṃ dukkhaṃ asātaṃ vedayitaṃ – idaṃ vuccati, bhikkhave, domanassindriyaṃ.
‘‘ཀཏམཉྩ, བྷིཀྑཝེ, ཨུཔེཀྑིནྡྲིཡཾ? ཡཾ ཁོ, བྷིཀྑཝེ, ཀཱཡིཀཾ ཝཱ ཙེཏསིཀཾ ཝཱ ནེཝ སཱཏཾ ནཱསཱཏཾ ཝེདཡིཏཾ – ཨིདཾ ཝུཙྩཏི, བྷིཀྑཝེ, ཨུཔེཀྑིནྡྲིཡཾ།
‘‘Katamañca, bhikkhave, upekkhindriyaṃ? Yaṃ kho, bhikkhave, kāyikaṃ vā cetasikaṃ vā neva sātaṃ nāsātaṃ vedayitaṃ – idaṃ vuccati, bhikkhave, upekkhindriyaṃ.
‘‘ཏཏྲ, བྷིཀྑཝེ, ཡཉྩ སུཁིནྡྲིཡཾ ཡཉྩ སོམནསྶིནྡྲིཡཾ, སུཁཱ སཱ ཝེདནཱ དཊྛབྦཱ། ཏཏྲ, བྷིཀྑཝེ, ཡཉྩ དུཀྑིནྡྲིཡཾ ཡཉྩ དོམནསྶིནྡྲིཡཾ, དུཀྑཱ སཱ ཝེདནཱ དཊྛབྦཱ། ཏཏྲ, བྷིཀྑཝེ, ཡདིདཾ ཨུཔེཀྑིནྡྲིཡཾ, ཨདུཀྑམསུཁཱ སཱ ཝེདནཱ དཊྛབྦཱ ། ཨིཏི ཁོ, བྷིཀྑཝེ, ཨིམཱནི པཉྩིནྡྲིཡཱནི པཉྩ ཧུཏྭཱ ཏཱིཎི ཧོནྟི, ཏཱིཎི ཧུཏྭཱ པཉྩ ཧོནྟི པརིཡཱཡེནཱ’’ཏི། ཨཊྛམཾ།
‘‘Tatra, bhikkhave, yañca sukhindriyaṃ yañca somanassindriyaṃ, sukhā sā vedanā daṭṭhabbā. Tatra, bhikkhave, yañca dukkhindriyaṃ yañca domanassindriyaṃ, dukkhā sā vedanā daṭṭhabbā. Tatra, bhikkhave, yadidaṃ upekkhindriyaṃ, adukkhamasukhā sā vedanā daṭṭhabbā . Iti kho, bhikkhave, imāni pañcindriyāni pañca hutvā tīṇi honti, tīṇi hutvā pañca honti pariyāyenā’’ti. Aṭṭhamaṃ.
