| Library / Tipiṭaka / តិបិដក • Tipiṭaka / វិមានវត្ថុបាឡិ • Vimānavatthupāḷi |
៨. តតិយនាវាវិមានវត្ថុ
8. Tatiyanāvāvimānavatthu
៦៣.
63.
‘‘សុវណ្ណច្ឆទនំ នាវំ, នារិ អារុយ្ហ តិដ្ឋសិ;
‘‘Suvaṇṇacchadanaṃ nāvaṃ, nāri āruyha tiṭṭhasi;
ឱគាហសិ បោក្ខរណិំ, បទ្មំ ឆិន្ទសិ បាណិនា។
Ogāhasi pokkharaṇiṃ, padmaṃ chindasi pāṇinā.
៦៤.
64.
‘‘កូដាគារា និវេសា តេ, វិភត្តា ភាគសោ មិតា;
‘‘Kūṭāgārā nivesā te, vibhattā bhāgaso mitā;
៦៥.
65.
‘‘កេន តេតាទិសោ វណ្ណោ, កេន តេ ឥធ មិជ្ឈតិ;
‘‘Kena tetādiso vaṇṇo, kena te idha mijjhati;
ឧប្បជ្ជន្តិ ច តេ ភោគា, យេ កេចិ មនសោ បិយា។
Uppajjanti ca te bhogā, ye keci manaso piyā.
៦៦.
66.
‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;
‘‘Pucchāmi taṃ devi mahānubhāve, manussabhūtā kimakāsi puññaṃ;
កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ។
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
៦៧.
67.
សា ទេវតា អត្តមនា, សម្ពុទ្ធេនេវ បុច្ឆិតា;
Sā devatā attamanā, sambuddheneva pucchitā;
បញ្ហំ បុដ្ឋា វិយាកាសិ, យស្ស កម្មស្សិទំ ផលំ។
Pañhaṃ puṭṭhā viyākāsi, yassa kammassidaṃ phalaṃ.
៦៨.
68.
‘‘អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ;
‘‘Ahaṃ manussesu manussabhūtā, purimāya jātiyā manussaloke;
ទិស្វាន ភិក្ខូ តសិតេ កិលន្តេ, ឧដ្ឋាយ បាតុំ ឧទកំ អទាសិំ។
Disvāna bhikkhū tasite kilante, uṭṭhāya pātuṃ udakaṃ adāsiṃ.
៦៩.
69.
‘‘យោ វេ កិលន្តាន បិបាសិតានំ, ឧដ្ឋាយ បាតុំ ឧទកំ ទទាតិ;
‘‘Yo ve kilantāna pipāsitānaṃ, uṭṭhāya pātuṃ udakaṃ dadāti;
សីតោទកា តស្ស ភវន្តិ នជ្ជោ, បហូតមល្យា ពហុបុណ្ឌរីកា។
Sītodakā tassa bhavanti najjo, pahūtamalyā bahupuṇḍarīkā.
៧០.
70.
‘‘តំ អាបគា អនុបរិយន្តិ សព្ពទា, សីតោទកា វាលុកសន្ថតា នទី;
‘‘Taṃ āpagā anupariyanti sabbadā, sītodakā vālukasanthatā nadī;
អម្ពា ច សាលា តិលកា ច ជម្ពុយោ, ឧទ្ទាលកា បាដលិយោ ច ផុល្លា។
Ambā ca sālā tilakā ca jambuyo, uddālakā pāṭaliyo ca phullā.
៧១.
71.
‘‘តំ ភូមិភាគេហិ ឧបេតរូបំ, វិមានសេដ្ឋំ ភុសសោភមានំ;
‘‘Taṃ bhūmibhāgehi upetarūpaṃ, vimānaseṭṭhaṃ bhusasobhamānaṃ;
តស្សីធ កម្មស្ស អយំ វិបាកោ, ឯតាទិសំ បុញ្ញកតា លភន្តិ។
Tassīdha kammassa ayaṃ vipāko, etādisaṃ puññakatā labhanti.
៧២.
72.
‘‘កូដាគារា និវេសា មេ, វិភត្តា ភាគសោ មិតា;
‘‘Kūṭāgārā nivesā me, vibhattā bhāgaso mitā;
ទទ្ទល្លមានា អាភន្តិ, សមន្តា ចតុរោ ទិសា។
Daddallamānā ābhanti, samantā caturo disā.
៧៣.
73.
‘‘តេន មេតាទិសោ វណ្ណោ, តេន មេ ឥធ មិជ្ឈតិ;
‘‘Tena metādiso vaṇṇo, tena me idha mijjhati;
ឧប្បជ្ជន្តិ ច មេ ភោគា, យេ កេចិ មនសោ បិយា។
Uppajjanti ca me bhogā, ye keci manaso piyā.
៧៤.
74.
‘‘អក្ខាមិ តេ ពុទ្ធ មហានុភាវ, មនុស្សភូតា យមកាសិ បុញ្ញំ;
‘‘Akkhāmi te buddha mahānubhāva, manussabhūtā yamakāsi puññaṃ;
តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតិ;
Tenamhi evaṃ jalitānubhāvā, vaṇṇo ca me sabbadisā pabhāsati;
ឯតស្ស កម្មស្ស ផលំ មមេទំ, អត្ថាយ ពុទ្ធោ ឧទកំ អបាយី’’តិ 3។
Etassa kammassa phalaṃ mamedaṃ, atthāya buddho udakaṃ apāyī’’ti 4.
តតិយនាវាវិមានំ អដ្ឋមំ។
Tatiyanāvāvimānaṃ aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / វិមានវត្ថុ-អដ្ឋកថា • Vimānavatthu-aṭṭhakathā / ៨. តតិយនាវាវិមានវណ្ណនា • 8. Tatiyanāvāvimānavaṇṇanā
