| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៧០. តស្សុទ្ទានំ
270. Tassuddānaṃ
ចម្បាយំ ភគវា អាសិ, វត្ថុ វាសភគាមកេ;
Campāyaṃ bhagavā āsi, vatthu vāsabhagāmake;
បកតញ្ញុនោតិ ញត្វា, ឧស្សុក្កំ ន ករី តទា;
Pakataññunoti ñatvā, ussukkaṃ na karī tadā;
ឧក្ខិត្តោ ន ករោតីតិ, សាគមា ជិនសន្តិកេ។
Ukkhitto na karotīti, sāgamā jinasantike.
អធម្មេន វគ្គកម្មំ, សមគ្គំ អធម្មេន ច;
Adhammena vaggakammaṃ, samaggaṃ adhammena ca;
ធម្មេន វគ្គកម្មញ្ច, បតិរូបកេន វគ្គិកំ។
Dhammena vaggakammañca, patirūpakena vaggikaṃ.
បតិរូបកេន សមគ្គំ, ឯកោ ឧក្ខិបតេកកំ;
Patirūpakena samaggaṃ, eko ukkhipatekakaṃ;
ឯកោ ច ទ្វេ សម្ពហុលេ, សង្ឃំ ឧក្ខិបតេកកោ។
Eko ca dve sambahule, saṅghaṃ ukkhipatekako.
ទុវេបិ សម្ពហុលាបិ, សង្ឃោ សង្ឃញ្ច ឧក្ខិបិ;
Duvepi sambahulāpi, saṅgho saṅghañca ukkhipi;
សព្ពញ្ញុបវរោ សុត្វា, អធម្មន្តិ បដិក្ខិបិ។
Sabbaññupavaro sutvā, adhammanti paṭikkhipi.
ញត្តិវិបន្នំ យំ កម្មំ, សម្បន្នំ អនុសាវនំ;
Ñattivipannaṃ yaṃ kammaṃ, sampannaṃ anusāvanaṃ;
អនុស្សាវនវិបន្នំ, សម្បន្នំ ញត្តិយា ច យំ។
Anussāvanavipannaṃ, sampannaṃ ñattiyā ca yaṃ.
ឧភយេន វិបន្នញ្ច, អញ្ញត្រ ធម្មមេវ ច;
Ubhayena vipannañca, aññatra dhammameva ca;
វិនយា សត្ថុ បដិកុដ្ឋំ, កុប្បំ អដ្ឋានារហិកំ។
Vinayā satthu paṭikuṭṭhaṃ, kuppaṃ aṭṭhānārahikaṃ.
អធម្មវគ្គំ សមគ្គំ, ធម្ម បតិរូបានិ យេ ទុវេ;
Adhammavaggaṃ samaggaṃ, dhamma patirūpāni ye duve;
ធម្មេនេវ ច សាមគ្គិំ, អនុញ្ញាសិ តថាគតោ។
Dhammeneva ca sāmaggiṃ, anuññāsi tathāgato.
ចតុវគ្គោ បញ្ចវគ្គោ, ទសវគ្គោ ច វីសតិ;
Catuvaggo pañcavaggo, dasavaggo ca vīsati;
ឋបេត្វា ឧបសម្បទំ, យញ្ច កម្មំ បវារណំ;
Ṭhapetvā upasampadaṃ, yañca kammaṃ pavāraṇaṃ;
អព្ភានកម្មេន សហ, ចតុវគ្គេហិ កម្មិកោ។
Abbhānakammena saha, catuvaggehi kammiko.
ទុវេ កម្មេ ឋបេត្វាន, មជ្ឈទេសូបសម្បទំ;
Duve kamme ṭhapetvāna, majjhadesūpasampadaṃ;
អព្ភានំ បញ្ចវគ្គិកោ, សព្ពកម្មេសុ កម្មិកោ។
Abbhānaṃ pañcavaggiko, sabbakammesu kammiko.
អព្ភានេកំ ឋបេត្វាន, យេ ភិក្ខូ ទសវគ្គិកា;
Abbhānekaṃ ṭhapetvāna, ye bhikkhū dasavaggikā;
សព្ពកម្មករោ សង្ឃោ, វីសោ សព្ពត្ថ កម្មិកោ។
Sabbakammakaro saṅgho, vīso sabbattha kammiko.
ភិក្ខុនី សិក្ខមានា, ច សាមណេរោ សាមណេរី;
Bhikkhunī sikkhamānā, ca sāmaṇero sāmaṇerī;
បច្ចក្ខាតន្តិមវត្ថូ, ឧក្ខិត្តាបត្តិទស្សនេ។
Paccakkhātantimavatthū, ukkhittāpattidassane.
អប្បដិកម្មេ ទិដ្ឋិយា, បណ្ឌកោ ថេយ្យសំវាសកំ;
Appaṭikamme diṭṭhiyā, paṇḍako theyyasaṃvāsakaṃ;
តិត្ថិយា តិរច្ឆានគតំ, មាតុ បិតុ ច ឃាតកំ។
Titthiyā tiracchānagataṃ, mātu pitu ca ghātakaṃ.
អរហំ ភិក្ខុនីទូសិ, ភេទកំ លោហិតុប្បាទំ;
Arahaṃ bhikkhunīdūsi, bhedakaṃ lohituppādaṃ;
ព្យញ្ជនំ នានាសំវាសំ, នានាសីមាយ ឥទ្ធិយា។
Byañjanaṃ nānāsaṃvāsaṃ, nānāsīmāya iddhiyā.
យស្ស សង្ឃោ ករេ កម្មំ, ហោន្តេតេ ចតុវីសតិ;
Yassa saṅgho kare kammaṃ, hontete catuvīsati;
សម្ពុទ្ធេន បដិក្ខិត្តា, ន ហេតេ គណបូរកា។
Sambuddhena paṭikkhittā, na hete gaṇapūrakā.
បារិវាសិកចតុត្ថោ, បរិវាសំ ទទេយ្យ វា;
Pārivāsikacatuttho, parivāsaṃ dadeyya vā;
មូលា មានត្តមព្ភេយ្យ, អកម្មំ ន ច ករណំ។
Mūlā mānattamabbheyya, akammaṃ na ca karaṇaṃ.
មូលា អរហមានត្តា, អព្ភានារហមេវ ច;
Mūlā arahamānattā, abbhānārahameva ca;
ន កម្មការកា បញ្ច, សម្ពុទ្ធេន បកាសិតា។
Na kammakārakā pañca, sambuddhena pakāsitā.
ភិក្ខុនី សិក្ខមានា ច, សាមណេរោ សាមណេរិកា;
Bhikkhunī sikkhamānā ca, sāmaṇero sāmaṇerikā;
បច្ចក្ខន្តិមឧម្មត្តា, ខិត្តាវេទនទស្សនេ។
Paccakkhantimaummattā, khittāvedanadassane.
នានាសំវាសកា សីមា, វេហាសំ យស្ស កម្ម ច។
Nānāsaṃvāsakā sīmā, vehāsaṃ yassa kamma ca.
អដ្ឋារសន្នមេតេសំ, បដិក្កោសំ ន រុហតិ;
Aṭṭhārasannametesaṃ, paṭikkosaṃ na ruhati;
ភិក្ខុស្ស បកតត្តស្ស, រុហតិ បដិក្កោសនា។
Bhikkhussa pakatattassa, ruhati paṭikkosanā.
សុទ្ធស្ស ទុន្និសារិតោ, ពាលោ ហិ សុនិស្សារិតោ;
Suddhassa dunnisārito, bālo hi sunissārito;
បណ្ឌកោ ថេយ្យសំវាសោ, បក្កន្តោ តិរច្ឆានគតោ។
Paṇḍako theyyasaṃvāso, pakkanto tiracchānagato.
មាតុ បិតុ អរហន្ត, ទូសកោ សង្ឃភេទកោ;
Mātu pitu arahanta, dūsako saṅghabhedako;
លោហិតុប្បាទកោ ចេវ, ឧភតោព្យញ្ជនោ ច យោ។
Lohituppādako ceva, ubhatobyañjano ca yo.
ឯកាទសន្នំ ឯតេសំ, ឱសារណំ ន យុជ្ជតិ;
Ekādasannaṃ etesaṃ, osāraṇaṃ na yujjati;
ហត្ថបាទំ តទុភយំ, កណ្ណនាសំ តទូភយំ។
Hatthapādaṃ tadubhayaṃ, kaṇṇanāsaṃ tadūbhayaṃ.
អង្គុលិ អឡកណ្ឌរំ, ផណំ ខុជ្ជោ ច វាមនោ;
Aṅguli aḷakaṇḍaraṃ, phaṇaṃ khujjo ca vāmano;
គណ្ឌី លក្ខណកសា, ច លិខិតកោ ច សីបទី។
Gaṇḍī lakkhaṇakasā, ca likhitako ca sīpadī.
បាបា បរិសកាណោ ច, កុណី ខញ្ជោ ហតោបិ ច;
Pāpā parisakāṇo ca, kuṇī khañjo hatopi ca;
ឥរិយាបថទុព្ពលោ, អន្ធោ មូគោ ច ពធិរោ។
Iriyāpathadubbalo, andho mūgo ca badhiro.
អន្ធមូគន្ធពធិរោ មូគពធិរមេវ ច;
Andhamūgandhabadhiro mūgabadhirameva ca;
អន្ធមូគពធិរោ ច, ទ្វត្តិំសេតេ អនូនកា។
Andhamūgabadhiro ca, dvattiṃsete anūnakā.
តេសំ ឱសារណំ ហោតិ, សម្ពុទ្ធេន បកាសិតំ;
Tesaṃ osāraṇaṃ hoti, sambuddhena pakāsitaṃ;
ទដ្ឋព្ពា បដិកាតព្ពា, និស្សជ្ជេតា ន វិជ្ជតិ។
Daṭṭhabbā paṭikātabbā, nissajjetā na vijjati.
តស្ស ឧក្ខេបនា កម្មា, សត្ត ហោន្តិ អធម្មិកា;
Tassa ukkhepanā kammā, satta honti adhammikā;
អាបន្នំ អនុវត្តន្តំ, សត្ត តេបិ អធម្មិកា។
Āpannaṃ anuvattantaṃ, satta tepi adhammikā.
អាបន្នំ នានុវត្តន្តំ, សត្ត កម្មា សុធម្មិកា;
Āpannaṃ nānuvattantaṃ, satta kammā sudhammikā;
សម្មុខា បដិបុច្ឆា ច, បដិញ្ញាយ ច ការណា។
Sammukhā paṭipucchā ca, paṭiññāya ca kāraṇā.
សតិ អមូឡ្ហបាបិកា, តជ្ជនីនិយស្សេន ច;
Sati amūḷhapāpikā, tajjanīniyassena ca;
បព្ពាជនីយ បដិសារោ, ឧក្ខេបបរិវាស ច។
Pabbājanīya paṭisāro, ukkhepaparivāsa ca.
មូលា មានត្តអព្ភានា, តថេវ ឧបសម្បទា;
Mūlā mānattaabbhānā, tatheva upasampadā;
អញ្ញំ ករេយ្យ អញ្ញស្ស, សោឡសេតេ អធម្មិកា។
Aññaṃ kareyya aññassa, soḷasete adhammikā.
តំ តំ ករេយ្យ តំ តស្ស, សោឡសេតេ សុធម្មិកា;
Taṃ taṃ kareyya taṃ tassa, soḷasete sudhammikā;
បច្ចារោបេយ្យ អញ្ញញ្ញំ, សោឡសេតេ អធម្មិកា។
Paccāropeyya aññaññaṃ, soḷasete adhammikā.
ឯកេកមូលកំ ចក្កំ, ‘‘អធម្ម’’ន្តិ ជិនោព្រ្វិ។
Ekekamūlakaṃ cakkaṃ, ‘‘adhamma’’nti jinobrvi.
អកាសិ តជ្ជនីយំ កម្មំ, សង្ឃោ ភណ្ឌនការកោ;
Akāsi tajjanīyaṃ kammaṃ, saṅgho bhaṇḍanakārako;
អធម្មេន វគ្គកម្មំ, អញ្ញំ អាវាសំ គច្ឆិ សោ។
Adhammena vaggakammaṃ, aññaṃ āvāsaṃ gacchi so.
តត្ថាធម្មេន សមគ្គា, តស្ស តជ្ជនីយំ ករុំ;
Tatthādhammena samaggā, tassa tajjanīyaṃ karuṃ;
អញ្ញត្ថ វគ្គាធម្មេន, តស្ស តជ្ជនីយំ ករុំ។
Aññattha vaggādhammena, tassa tajjanīyaṃ karuṃ.
បតិរូបេន វគ្គាបិ, សមគ្គាបិ តថា ករុំ;
Patirūpena vaggāpi, samaggāpi tathā karuṃ;
អធម្មេន សមគ្គា ច, ធម្មេន វគ្គមេវ ច។
Adhammena samaggā ca, dhammena vaggameva ca.
បតិរូបកេន វគ្គា ច, សមគ្គា ច ឥមេ បទា;
Patirūpakena vaggā ca, samaggā ca ime padā;
ឯកេកមូលកំ កត្វា, ចក្កំ ពន្ធេ វិចក្ខណោ។
Ekekamūlakaṃ katvā, cakkaṃ bandhe vicakkhaṇo.
ពាលា ព្យត្តស្ស និយស្សំ, បព្ពាជេ កុលទូសកំ;
Bālā byattassa niyassaṃ, pabbāje kuladūsakaṃ;
បដិសារណីយំ កម្មំ, ករេ អក្កោសកស្ស ច។
Paṭisāraṇīyaṃ kammaṃ, kare akkosakassa ca.
អទស្សនាប្បដិកម្មេ , យោ ច ទិដ្ឋិំ ន និស្សជ្ជេ;
Adassanāppaṭikamme , yo ca diṭṭhiṃ na nissajje;
តេសំ ឧក្ខេបនីយកម្មំ, សត្ថវាហេន ភាសិតំ។
Tesaṃ ukkhepanīyakammaṃ, satthavāhena bhāsitaṃ.
បស្សទ្ធិ តេសំ កម្មានំ, ហេដ្ឋា កម្មនយេន ច;
Passaddhi tesaṃ kammānaṃ, heṭṭhā kammanayena ca;
តស្មិំ តស្មិំ តុ កម្មេសុ, តត្រដ្ឋោ ច វិវទតិ។
Tasmiṃ tasmiṃ tu kammesu, tatraṭṭho ca vivadati.
អកតំ ទុក្កដញ្ចេវ, បុនកាតព្ពកន្តិ ច;
Akataṃ dukkaṭañceva, punakātabbakanti ca;
កម្មេ បស្សទ្ធិយា ចាបិ, តេ ភិក្ខូ ធម្មវាទិនោ។
Kamme passaddhiyā cāpi, te bhikkhū dhammavādino.
វិបត្តិព្យាធិតេ ទិស្វា, កម្មប្បត្តេ មហាមុនិ;
Vipattibyādhite disvā, kammappatte mahāmuni;
បដិប្បស្សទ្ធិមក្ខាសិ, សល្លកត្តោវ ឱសធន្តិ។
Paṭippassaddhimakkhāsi, sallakattova osadhanti.
ឥមម្ហិ ខន្ធកេ វត្ថូនិ ឆត្តិំសាតិ។
Imamhi khandhake vatthūni chattiṃsāti.
ចម្បេយ្យក្ខន្ធកោ និដ្ឋិតោ។
Campeyyakkhandhako niṭṭhito.
Footnotes:
