| Library / Tipiṭaka / තිපිටක • Tipiṭaka / විමානවත්ථුපාළි • Vimānavatthupāḷi |
11. සුනික්ඛිත්තවිමානවත්ථු
11. Sunikkhittavimānavatthu
1282.
1282.
‘‘උච්චමිදං මණිථූණං විමානං, සමන්තතො ද්වාදස යොජනානි;
‘‘Uccamidaṃ maṇithūṇaṃ vimānaṃ, samantato dvādasa yojanāni;
කූටාගාරා සත්තසතා උළාරා, වෙළුරියථම්භා රුචකත්ථතා සුභා.
Kūṭāgārā sattasatā uḷārā, veḷuriyathambhā rucakatthatā subhā.
1283.
1283.
‘‘තත්ථච්ඡසි පිවසි ඛාදසි ච, දිබ්බා ච වීණා පවදන්ති වග්ගුං;
‘‘Tatthacchasi pivasi khādasi ca, dibbā ca vīṇā pavadanti vagguṃ;
දිබ්බා රසා කාමගුණෙත්ථ පඤ්ච, නාරියො ච නච්චන්ති සුවණ්ණඡන්නා.
Dibbā rasā kāmaguṇettha pañca, nāriyo ca naccanti suvaṇṇachannā.
1284.
1284.
‘‘කෙන තෙතාදිසො වණ්ණො, කෙන තෙ ඉධ මිජ්ඣති;
‘‘Kena tetādiso vaṇṇo, kena te idha mijjhati;
උප්පජ්ජන්ති ච තෙ භොගා, යෙ කෙචි මනසො පියා.
Uppajjanti ca te bhogā, ye keci manaso piyā.
1285.
1285.
‘‘පුච්ඡාමි ‘තං දෙව මහානුභාව, මනුස්සභූතො කිමකාසි පුඤ්ඤං;
‘‘Pucchāmi ‘taṃ deva mahānubhāva, manussabhūto kimakāsi puññaṃ;
කෙනාසි එවං ජලිතානුභාවො, වණ්ණො ච තෙ සබ්බදිසා පභාසතී’’ති.
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
1286.
1286.
සො දෙවපුත්තො අත්තමනො, මොග්ගල්ලානෙන පුච්ඡිතො;
So devaputto attamano, moggallānena pucchito;
පඤ්හං පුට්ඨො වියාකාසි, යස්ස කම්මස්සිදං ඵලං.
Pañhaṃ puṭṭho viyākāsi, yassa kammassidaṃ phalaṃ.
1287.
1287.
‘‘දුන්නික්ඛිත්තං මාලං සුනික්ඛිපිත්වා, පතිට්ඨපෙත්වා සුගතස්ස ථූපෙ;
‘‘Dunnikkhittaṃ mālaṃ sunikkhipitvā, patiṭṭhapetvā sugatassa thūpe;
මහිද්ධිකො චම්හි මහානුභාවො, දිබ්බෙහි කාමෙහි සමඞ්ගිභූතො.
Mahiddhiko camhi mahānubhāvo, dibbehi kāmehi samaṅgibhūto.
1288.
1288.
‘‘තෙන මෙතාදිසො වණ්ණො,
‘‘Tena metādiso vaṇṇo,
තෙන මෙ ඉධ මිජ්ඣති;
Tena me idha mijjhati;
උප්පජ්ජන්ති ච මෙ භොගා,
Uppajjanti ca me bhogā,
යෙ කෙචි මනසො පියා.
Ye keci manaso piyā.
1289.
1289.
‘‘අක්ඛාමි තෙ භික්ඛු මහානුභාව,
‘‘Akkhāmi te bhikkhu mahānubhāva,
මනුස්සභූතො යමහං අකාසිං;
Manussabhūto yamahaṃ akāsiṃ;
තෙනම්හි එවං ජලිතානුභාවො,
Tenamhi evaṃ jalitānubhāvo,
වණ්ණො ච මෙ සබ්බදිසා පභාසතී’’ති.
Vaṇṇo ca me sabbadisā pabhāsatī’’ti.
සුනික්ඛිත්තවිමානං එකාදසමං.
Sunikkhittavimānaṃ ekādasamaṃ.
සුනික්ඛිත්තවග්ගො සත්තමො නිට්ඨිතො.
Sunikkhittavaggo sattamo niṭṭhito.
තස්සුද්දානං –
Tassuddānaṃ –
ද්වෙ දලිද්දා වනවිහාරා, භතකො ගොපාලකණ්ඩකා;
Dve daliddā vanavihārā, bhatako gopālakaṇḍakā;
අනෙකවණ්ණමට්ඨකුණ්ඩලී, සෙරීසකො සුනික්ඛිත්තං;
Anekavaṇṇamaṭṭhakuṇḍalī, serīsako sunikkhittaṃ;
පුරිසානං තතියො වග්ගො පවුච්චතීති.
Purisānaṃ tatiyo vaggo pavuccatīti.
භාණවාරං චතුත්ථං නිට්ඨිතං.
Bhāṇavāraṃ catutthaṃ niṭṭhitaṃ.
විමානවත්ථුපාළි නිට්ඨිතා.
Vimānavatthupāḷi niṭṭhitā.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / විමානවත්ථු-අට්ඨකථා • Vimānavatthu-aṭṭhakathā / 11. සුනික්ඛිත්තවිමානවණ්ණනා • 11. Sunikkhittavimānavaṇṇanā
