| Library / Tipiṭaka / ತಿಪಿಟಕ • Tipiṭaka / ವಿಮಾನವತ್ಥುಪಾಳಿ • Vimānavatthupāḷi |
೧೧. ಸುನಿಕ್ಖಿತ್ತವಿಮಾನವತ್ಥು
11. Sunikkhittavimānavatthu
೧೨೮೨.
1282.
‘‘ಉಚ್ಚಮಿದಂ ಮಣಿಥೂಣಂ ವಿಮಾನಂ, ಸಮನ್ತತೋ ದ್ವಾದಸ ಯೋಜನಾನಿ।
‘‘Uccamidaṃ maṇithūṇaṃ vimānaṃ, samantato dvādasa yojanāni;
ಕೂಟಾಗಾರಾ ಸತ್ತಸತಾ ಉಳಾರಾ, ವೇಳುರಿಯಥಮ್ಭಾ ರುಚಕತ್ಥತಾ ಸುಭಾ॥
Kūṭāgārā sattasatā uḷārā, veḷuriyathambhā rucakatthatā subhā.
೧೨೮೩.
1283.
‘‘ತತ್ಥಚ್ಛಸಿ ಪಿವಸಿ ಖಾದಸಿ ಚ, ದಿಬ್ಬಾ ಚ ವೀಣಾ ಪವದನ್ತಿ ವಗ್ಗುಂ।
‘‘Tatthacchasi pivasi khādasi ca, dibbā ca vīṇā pavadanti vagguṃ;
ದಿಬ್ಬಾ ರಸಾ ಕಾಮಗುಣೇತ್ಥ ಪಞ್ಚ, ನಾರಿಯೋ ಚ ನಚ್ಚನ್ತಿ ಸುವಣ್ಣಛನ್ನಾ॥
Dibbā rasā kāmaguṇettha pañca, nāriyo ca naccanti suvaṇṇachannā.
೧೨೮೪.
1284.
‘‘ಕೇನ ತೇತಾದಿಸೋ ವಣ್ಣೋ, ಕೇನ ತೇ ಇಧ ಮಿಜ್ಝತಿ।
‘‘Kena tetādiso vaṇṇo, kena te idha mijjhati;
ಉಪ್ಪಜ್ಜನ್ತಿ ಚ ತೇ ಭೋಗಾ, ಯೇ ಕೇಚಿ ಮನಸೋ ಪಿಯಾ॥
Uppajjanti ca te bhogā, ye keci manaso piyā.
೧೨೮೫.
1285.
‘‘ಪುಚ್ಛಾಮಿ ‘ತಂ ದೇವ ಮಹಾನುಭಾವ, ಮನುಸ್ಸಭೂತೋ ಕಿಮಕಾಸಿ ಪುಞ್ಞಂ।
‘‘Pucchāmi ‘taṃ deva mahānubhāva, manussabhūto kimakāsi puññaṃ;
ಕೇನಾಸಿ ಏವಂ ಜಲಿತಾನುಭಾವೋ, ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ॥
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
೧೨೮೬.
1286.
ಸೋ ದೇವಪುತ್ತೋ ಅತ್ತಮನೋ, ಮೋಗ್ಗಲ್ಲಾನೇನ ಪುಚ್ಛಿತೋ।
So devaputto attamano, moggallānena pucchito;
ಪಞ್ಹಂ ಪುಟ್ಠೋ ವಿಯಾಕಾಸಿ, ಯಸ್ಸ ಕಮ್ಮಸ್ಸಿದಂ ಫಲಂ॥
Pañhaṃ puṭṭho viyākāsi, yassa kammassidaṃ phalaṃ.
೧೨೮೭.
1287.
‘‘ದುನ್ನಿಕ್ಖಿತ್ತಂ ಮಾಲಂ ಸುನಿಕ್ಖಿಪಿತ್ವಾ, ಪತಿಟ್ಠಪೇತ್ವಾ ಸುಗತಸ್ಸ ಥೂಪೇ।
‘‘Dunnikkhittaṃ mālaṃ sunikkhipitvā, patiṭṭhapetvā sugatassa thūpe;
ಮಹಿದ್ಧಿಕೋ ಚಮ್ಹಿ ಮಹಾನುಭಾವೋ, ದಿಬ್ಬೇಹಿ ಕಾಮೇಹಿ ಸಮಙ್ಗಿಭೂತೋ॥
Mahiddhiko camhi mahānubhāvo, dibbehi kāmehi samaṅgibhūto.
೧೨೮೮.
1288.
‘‘ತೇನ ಮೇತಾದಿಸೋ ವಣ್ಣೋ,
‘‘Tena metādiso vaṇṇo,
ತೇನ ಮೇ ಇಧ ಮಿಜ್ಝತಿ।
Tena me idha mijjhati;
ಉಪ್ಪಜ್ಜನ್ತಿ ಚ ಮೇ ಭೋಗಾ,
Uppajjanti ca me bhogā,
ಯೇ ಕೇಚಿ ಮನಸೋ ಪಿಯಾ॥
Ye keci manaso piyā.
೧೨೮೯.
1289.
‘‘ಅಕ್ಖಾಮಿ ತೇ ಭಿಕ್ಖು ಮಹಾನುಭಾವ,
‘‘Akkhāmi te bhikkhu mahānubhāva,
ಮನುಸ್ಸಭೂತೋ ಯಮಹಂ ಅಕಾಸಿಂ।
Manussabhūto yamahaṃ akāsiṃ;
ತೇನಮ್ಹಿ ಏವಂ ಜಲಿತಾನುಭಾವೋ,
Tenamhi evaṃ jalitānubhāvo,
ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ॥
Vaṇṇo ca me sabbadisā pabhāsatī’’ti.
ಸುನಿಕ್ಖಿತ್ತವಿಮಾನಂ ಏಕಾದಸಮಂ।
Sunikkhittavimānaṃ ekādasamaṃ.
ಸುನಿಕ್ಖಿತ್ತವಗ್ಗೋ ಸತ್ತಮೋ ನಿಟ್ಠಿತೋ।
Sunikkhittavaggo sattamo niṭṭhito.
ತಸ್ಸುದ್ದಾನಂ –
Tassuddānaṃ –
ದ್ವೇ ದಲಿದ್ದಾ ವನವಿಹಾರಾ, ಭತಕೋ ಗೋಪಾಲಕಣ್ಡಕಾ।
Dve daliddā vanavihārā, bhatako gopālakaṇḍakā;
ಅನೇಕವಣ್ಣಮಟ್ಠಕುಣ್ಡಲೀ, ಸೇರೀಸಕೋ ಸುನಿಕ್ಖಿತ್ತಂ।
Anekavaṇṇamaṭṭhakuṇḍalī, serīsako sunikkhittaṃ;
ಪುರಿಸಾನಂ ತತಿಯೋ ವಗ್ಗೋ ಪವುಚ್ಚತೀತಿ॥
Purisānaṃ tatiyo vaggo pavuccatīti.
ಭಾಣವಾರಂ ಚತುತ್ಥಂ ನಿಟ್ಠಿತಂ।
Bhāṇavāraṃ catutthaṃ niṭṭhitaṃ.
ವಿಮಾನವತ್ಥುಪಾಳಿ ನಿಟ್ಠಿತಾ।
Vimānavatthupāḷi niṭṭhitā.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ವಿಮಾನವತ್ಥು-ಅಟ್ಠಕಥಾ • Vimānavatthu-aṭṭhakathā / ೧೧. ಸುನಿಕ್ಖಿತ್ತವಿಮಾನವಣ್ಣನಾ • 11. Sunikkhittavimānavaṇṇanā
