| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
११. सुनिक्खित्तविमानवत्थु
11. Sunikkhittavimānavatthu
१२८२.
1282.
‘‘उच्चमिदं मणिथूणं विमानं, समन्ततो द्वादस योजनानि।
‘‘Uccamidaṃ maṇithūṇaṃ vimānaṃ, samantato dvādasa yojanāni;
कूटागारा सत्तसता उळारा, वेळुरियथम्भा रुचकत्थता सुभा॥
Kūṭāgārā sattasatā uḷārā, veḷuriyathambhā rucakatthatā subhā.
१२८३.
1283.
‘‘तत्थच्छसि पिवसि खादसि च, दिब्बा च वीणा पवदन्ति वग्गुं।
‘‘Tatthacchasi pivasi khādasi ca, dibbā ca vīṇā pavadanti vagguṃ;
दिब्बा रसा कामगुणेत्थ पञ्च, नारियो च नच्चन्ति सुवण्णछन्ना॥
Dibbā rasā kāmaguṇettha pañca, nāriyo ca naccanti suvaṇṇachannā.
१२८४.
1284.
‘‘केन तेतादिसो वण्णो, केन ते इध मिज्झति।
‘‘Kena tetādiso vaṇṇo, kena te idha mijjhati;
उप्पज्जन्ति च ते भोगा, ये केचि मनसो पिया॥
Uppajjanti ca te bhogā, ye keci manaso piyā.
१२८५.
1285.
‘‘पुच्छामि ‘तं देव महानुभाव, मनुस्सभूतो किमकासि पुञ्ञं।
‘‘Pucchāmi ‘taṃ deva mahānubhāva, manussabhūto kimakāsi puññaṃ;
केनासि एवं जलितानुभावो, वण्णो च ते सब्बदिसा पभासती’’ति॥
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
१२८६.
1286.
सो देवपुत्तो अत्तमनो, मोग्गल्लानेन पुच्छितो।
So devaputto attamano, moggallānena pucchito;
पञ्हं पुट्ठो वियाकासि, यस्स कम्मस्सिदं फलं॥
Pañhaṃ puṭṭho viyākāsi, yassa kammassidaṃ phalaṃ.
१२८७.
1287.
‘‘दुन्निक्खित्तं मालं सुनिक्खिपित्वा, पतिट्ठपेत्वा सुगतस्स थूपे।
‘‘Dunnikkhittaṃ mālaṃ sunikkhipitvā, patiṭṭhapetvā sugatassa thūpe;
महिद्धिको चम्हि महानुभावो, दिब्बेहि कामेहि समङ्गिभूतो॥
Mahiddhiko camhi mahānubhāvo, dibbehi kāmehi samaṅgibhūto.
१२८८.
1288.
‘‘तेन मेतादिसो वण्णो,
‘‘Tena metādiso vaṇṇo,
तेन मे इध मिज्झति।
Tena me idha mijjhati;
उप्पज्जन्ति च मे भोगा,
Uppajjanti ca me bhogā,
ये केचि मनसो पिया॥
Ye keci manaso piyā.
१२८९.
1289.
‘‘अक्खामि ते भिक्खु महानुभाव,
‘‘Akkhāmi te bhikkhu mahānubhāva,
मनुस्सभूतो यमहं अकासिं।
Manussabhūto yamahaṃ akāsiṃ;
तेनम्हि एवं जलितानुभावो,
Tenamhi evaṃ jalitānubhāvo,
वण्णो च मे सब्बदिसा पभासती’’ति॥
Vaṇṇo ca me sabbadisā pabhāsatī’’ti.
सुनिक्खित्तविमानं एकादसमं।
Sunikkhittavimānaṃ ekādasamaṃ.
सुनिक्खित्तवग्गो सत्तमो निट्ठितो।
Sunikkhittavaggo sattamo niṭṭhito.
तस्सुद्दानं –
Tassuddānaṃ –
द्वे दलिद्दा वनविहारा, भतको गोपालकण्डका।
Dve daliddā vanavihārā, bhatako gopālakaṇḍakā;
अनेकवण्णमट्ठकुण्डली, सेरीसको सुनिक्खित्तं।
Anekavaṇṇamaṭṭhakuṇḍalī, serīsako sunikkhittaṃ;
पुरिसानं ततियो वग्गो पवुच्चतीति॥
Purisānaṃ tatiyo vaggo pavuccatīti.
भाणवारं चतुत्थं निट्ठितं।
Bhāṇavāraṃ catutthaṃ niṭṭhitaṃ.
विमानवत्थुपाळि निट्ठिता।
Vimānavatthupāḷi niṭṭhitā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / ११. सुनिक्खित्तविमानवण्णना • 11. Sunikkhittavimānavaṇṇanā
