| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
១៨. សិទ្ធត្ថពុទ្ធវំសោ
18. Siddhatthabuddhavaṃso
១.
1.
ធម្មទស្សិស្ស អបរេន, សិទ្ធត្ថោ នាម នាយកោ;
Dhammadassissa aparena, siddhattho nāma nāyako;
និហនិត្វា តមំ សព្ពំ, សូរិយោ អព្ភុគ្គតោ យថា។
Nihanitvā tamaṃ sabbaṃ, sūriyo abbhuggato yathā.
២.
2.
សោបិ បត្វាន សម្ពោធិំ, សន្តារេន្តោ សទេវកំ;
Sopi patvāna sambodhiṃ, santārento sadevakaṃ;
អភិវស្សិ ធម្មមេឃេន, និព្ពាបេន្តោ សទេវកំ។
Abhivassi dhammameghena, nibbāpento sadevakaṃ.
៣.
3.
តស្សាបិ អតុលតេជស្ស, អហេសុំ អភិសមយា តយោ;
Tassāpi atulatejassa, ahesuṃ abhisamayā tayo;
កោដិសតសហស្សានំ, បឋមាភិសមយោ អហុ។
Koṭisatasahassānaṃ, paṭhamābhisamayo ahu.
៤.
4.
តទា នវុតិកោដីនំ, ទុតិយាភិសមយោ អហុ។
Tadā navutikoṭīnaṃ, dutiyābhisamayo ahu.
៥.
5.
យទា ពុទ្ធោ ធម្មំ ទេសេសិ, វេភារេ សោ បុរុត្តមេ;
Yadā buddho dhammaṃ desesi, vebhāre so puruttame;
តទា នវុតិកោដីនំ, តតិយាភិសមយោ អហុ។
Tadā navutikoṭīnaṃ, tatiyābhisamayo ahu.
៦.
6.
សន្និបាតា តយោ អាសុំ, តស្មិម្បិ ទ្វិបទុត្តមេ;
Sannipātā tayo āsuṃ, tasmimpi dvipaduttame;
ខីណាសវានំ វិមលានំ, សន្តចិត្តាន តាទិនំ។
Khīṇāsavānaṃ vimalānaṃ, santacittāna tādinaṃ.
៧.
7.
ឯតេ អាសុំ តយោ ឋានា, វិមលានំ សមាគមេ។
Ete āsuṃ tayo ṭhānā, vimalānaṃ samāgame.
៨.
8.
អហំ តេន សមយេន, មង្គលោ នាម តាបសោ;
Ahaṃ tena samayena, maṅgalo nāma tāpaso;
ឧគ្គតេជោ ទុប្បសហោ, អភិញ្ញាពលសមាហិតោ។
Uggatejo duppasaho, abhiññābalasamāhito.
៩.
9.
បដិគ្គហេត្វា សម្ពុទ្ធោ, ឥទំ វចនមព្រវិ។
Paṭiggahetvā sambuddho, idaṃ vacanamabravi.
១០.
10.
‘‘បស្សថ ឥមំ តាបសំ, ជដិលំ ឧគ្គតាបនំ;
‘‘Passatha imaṃ tāpasaṃ, jaṭilaṃ uggatāpanaṃ;
ចតុន្នវុតិតោ កប្បេ, អយំ ពុទ្ធោ ភវិស្សតិ។
Catunnavutito kappe, ayaṃ buddho bhavissati.
១១.
11.
‘‘បធានំ បទហិត្វាន…បេ.… ហេស្សាម សម្មុខា ឥមំ’’។
‘‘Padhānaṃ padahitvāna…pe… hessāma sammukhā imaṃ’’.
១២.
12.
តស្សាបិ វចនំ សុត្វា, ភិយ្យោ ចិត្តំ បសាទយិំ;
Tassāpi vacanaṃ sutvā, bhiyyo cittaṃ pasādayiṃ;
ឧត្តរិំ វតមធិដ្ឋាសិំ, ទសបារមិបូរិយា។
Uttariṃ vatamadhiṭṭhāsiṃ, dasapāramipūriyā.
១៣.
13.
វេភារំ នាម នគរំ, ឧទេនោ នាម ខត្តិយោ;
Vebhāraṃ nāma nagaraṃ, udeno nāma khattiyo;
សុផស្សា នាម ជនិកា, សិទ្ធត្ថស្ស មហេសិនោ។
Suphassā nāma janikā, siddhatthassa mahesino.
១៤.
14.
ទសវស្សសហស្សានិ , អគារំ អជ្ឈ សោ វសិ;
Dasavassasahassāni , agāraṃ ajjha so vasi;
កោកាសុប្បលកោកនទា, តយោ បាសាទមុត្តមា។
Kokāsuppalakokanadā, tayo pāsādamuttamā.
១៥.
15.
តិសោឡសសហស្សានិ, នារិយោ សមលង្កតា;
Tisoḷasasahassāni, nāriyo samalaṅkatā;
សោមនស្សា នាម សា នារី, អនុបមោ នាម អត្រជោ។
Somanassā nāma sā nārī, anupamo nāma atrajo.
១៦.
16.
និមិត្តេ ចតុរោ ទិស្វា, សិវិកាយាភិនិក្ខមិ;
Nimitte caturo disvā, sivikāyābhinikkhami;
អនូនទសមាសានិ, បធានំ បទហី ជិនោ។
Anūnadasamāsāni, padhānaṃ padahī jino.
១៧.
17.
ព្រហ្មុនា យាចិតោ សន្តោ, សិទ្ធត្ថោ លោកនាយកោ;
Brahmunā yācito santo, siddhattho lokanāyako;
វត្តិ ចក្កំ មហាវីរោ, មិគទាយេ នរុត្តមោ។
Vatti cakkaṃ mahāvīro, migadāye naruttamo.
១៨.
18.
សម្ពលោ ច សុមិត្តោ ច, អហេសុំ អគ្គសាវកា;
Sambalo ca sumitto ca, ahesuṃ aggasāvakā;
រេវតោ នាមុបដ្ឋាកោ, សិទ្ធត្ថស្ស មហេសិនោ។
Revato nāmupaṭṭhāko, siddhatthassa mahesino.
១៩.
19.
សីវលា ច សុរាមា ច, អហេសុំ អគ្គសាវិកា;
Sīvalā ca surāmā ca, ahesuṃ aggasāvikā;
ពោធិ តស្ស ភគវតោ, កណិការោតិ វុច្ចតិ។
Bodhi tassa bhagavato, kaṇikāroti vuccati.
២០.
20.
សុប្បិយោ ច សមុទ្ទោ ច, អហេសុំ អគ្គុបដ្ឋកា;
Suppiyo ca samuddo ca, ahesuṃ aggupaṭṭhakā;
រម្មា ចេវ សុរម្មា ច, អហេសុំ អគ្គុបដ្ឋិកា។
Rammā ceva surammā ca, ahesuṃ aggupaṭṭhikā.
២១.
21.
សោ ពុទ្ធោ សដ្ឋិរតនំ, អហោសិ នភមុគ្គតោ;
So buddho saṭṭhiratanaṃ, ahosi nabhamuggato;
កញ្ចនគ្ឃិយសង្កាសោ, ទសសហស្សី វិរោចតិ។
Kañcanagghiyasaṅkāso, dasasahassī virocati.
២២.
22.
សោបិ ពុទ្ធោ អសមសមោ, អតុលោ អប្បដិបុគ្គលោ;
Sopi buddho asamasamo, atulo appaṭipuggalo;
វស្សសតសហស្សានិ, លោកេ អដ្ឋាសិ ចក្ខុមា។
Vassasatasahassāni, loke aṭṭhāsi cakkhumā.
២៣.
23.
វិបុលំ បភំ ទស្សយិត្វា, បុប្ផាបេត្វាន សាវកេ;
Vipulaṃ pabhaṃ dassayitvā, pupphāpetvāna sāvake;
វិលាសេត្វា សមាបត្យា, និព្ពុតោ សោ សសាវកោ។
Vilāsetvā samāpatyā, nibbuto so sasāvako.
២៤.
24.
សិទ្ធត្ថោ មុនិវរោ ពុទ្ធោ, អនោមារាមម្ហិ និព្ពុតោ;
Siddhattho munivaro buddho, anomārāmamhi nibbuto;
តត្ថេវស្ស ថូបវរោ, ចតុយោជនមុគ្គតោតិ។
Tatthevassa thūpavaro, catuyojanamuggatoti.
សិទ្ធត្ថស្ស ភគវតោ វំសោ សោឡសមោ។
Siddhatthassa bhagavato vaṃso soḷasamo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ១៨. សិទ្ធត្ថពុទ្ធវំសវណ្ណនា • 18. Siddhatthabuddhavaṃsavaṇṇanā
