| Library / Tipiṭaka / तिपिटक • Tipiṭaka / पेतवत्थुपाळि • Petavatthupāḷi |
१६. सट्ठिकूटपेतवत्थु
16. Saṭṭhikūṭapetavatthu
८०६.
806.
‘‘किं नु उम्मत्तरूपोव, मिगो भन्तोव धावसि।
‘‘Kiṃ nu ummattarūpova, migo bhantova dhāvasi;
निस्संसयं पापकम्मन्तो 1, किं नु सद्दायसे तुव’’न्ति॥
Nissaṃsayaṃ pāpakammanto 2, kiṃ nu saddāyase tuva’’nti.
८०७.
807.
‘‘अहं भदन्ते पेतोम्हि, दुग्गतो यमलोकिको।
‘‘Ahaṃ bhadante petomhi, duggato yamalokiko;
पापकम्मं करित्वान, पेतलोकं इतो गतो॥
Pāpakammaṃ karitvāna, petalokaṃ ito gato.
८०८.
808.
‘‘सट्ठि कूटसहस्सानि, परिपुण्णानि सब्बसो।
‘‘Saṭṭhi kūṭasahassāni, paripuṇṇāni sabbaso;
सीसे मय्हं निपतन्ति, ते भिन्दन्ति च मत्थक’’न्ति॥
Sīse mayhaṃ nipatanti, te bhindanti ca matthaka’’nti.
८०९.
809.
‘‘किं नु कायेन वाचाय, मनसा दुक्कटं कतं।
‘‘Kiṃ nu kāyena vācāya, manasā dukkaṭaṃ kataṃ;
किस्स कम्मविपाकेन, इदं दुक्खं निगच्छसि॥
Kissa kammavipākena, idaṃ dukkhaṃ nigacchasi.
८१०.
810.
‘‘सट्ठि कूटसहस्सानि, परिपुण्णानि सब्बसो।
‘‘Saṭṭhi kūṭasahassāni, paripuṇṇāni sabbaso;
सीसे तुय्हं निपतन्ति, ते भिन्दन्ति च मत्थक’’न्ति॥
Sīse tuyhaṃ nipatanti, te bhindanti ca matthaka’’nti.
८११.
811.
‘‘अथद्दसासिं सम्बुद्धं, सुनेत्तं भावितिन्द्रियं।
‘‘Athaddasāsiṃ sambuddhaṃ, sunettaṃ bhāvitindriyaṃ;
निसिन्नं रुक्खमूलस्मिं, झायन्तं अकुतोभयं॥
Nisinnaṃ rukkhamūlasmiṃ, jhāyantaṃ akutobhayaṃ.
८१२.
812.
‘‘सालित्तकप्पहारेन, भिन्दिस्सं तस्स मत्थकं।
‘‘Sālittakappahārena, bhindissaṃ tassa matthakaṃ;
तस्स कम्मविपाकेन, इदं दुक्खं निगच्छिसं॥
Tassa kammavipākena, idaṃ dukkhaṃ nigacchisaṃ.
८१३.
813.
‘‘सट्ठि कूटसहस्सानि, परिपुण्णानि सब्बसो।
‘‘Saṭṭhi kūṭasahassāni, paripuṇṇāni sabbaso;
सीसे मय्हं निपतन्ति, ते भिन्दन्ति च 3 मत्थक’’न्ति॥
Sīse mayhaṃ nipatanti, te bhindanti ca 4 matthaka’’nti.
८१४.
814.
‘‘धम्मेन ते कापुरिस, सट्ठिकूटसहस्सानि, परिपुण्णानि सब्बसो।
‘‘Dhammena te kāpurisa, saṭṭhikūṭasahassāni, paripuṇṇāni sabbaso;
सीसे तुय्हं निपतन्ति, ते भिन्दन्ति च मत्थक’’न्ति॥
Sīse tuyhaṃ nipatanti, te bhindanti ca matthaka’’nti.
सट्ठिकूटपेतवत्थु सोळसमं।
Saṭṭhikūṭapetavatthu soḷasamaṃ.
महावग्गो चतुत्थो निट्ठितो।
Mahāvaggo catuttho niṭṭhito.
तस्सुद्दानं –
Tassuddānaṃ –
अम्बसक्करो सेरीसको, पिङ्गलो रेवति उच्छु।
Ambasakkaro serīsako, piṅgalo revati ucchu;
द्वे कुमारा दुवे गूथा, गणपाटलिअम्बवनं॥
Dve kumārā duve gūthā, gaṇapāṭaliambavanaṃ.
अक्खरुक्खभोगसंहरा, सेट्ठिपुत्तसट्ठिकूटा।
Akkharukkhabhogasaṃharā, seṭṭhiputtasaṭṭhikūṭā;
इति सोळसवत्थूनि, वग्गो तेन पवुच्चति॥
Iti soḷasavatthūni, vaggo tena pavuccati.
अथ वग्गुद्दानं –
Atha vagguddānaṃ –
उरगो उपरिवग्गो, चूळमहाति चतुधा।
Urago uparivaggo, cūḷamahāti catudhā;
वत्थूनि एकपञ्ञासं, चतुधा भाणवारतो॥
Vatthūni ekapaññāsaṃ, catudhā bhāṇavārato.
पेतवत्थुपाळि निट्ठिता।
Petavatthupāḷi niṭṭhitā.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पेतवत्थु-अट्ठकथा • Petavatthu-aṭṭhakathā / १६. सट्ठिकूटपेतवत्थुवण्णना • 16. Saṭṭhikūṭapetavatthuvaṇṇanā
