| Library / Tipiṭaka / तिपिटक • Tipiṭaka / उदानपाळि • Udānapāḷi |
१०. सारिपुत्तउपसमसुत्तं
10. Sāriputtaupasamasuttaṃ
४०. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे। तेन खो पन समयेन आयस्मा सारिपुत्तो भगवतो अविदूरे निसिन्नो होति पल्लङ्कं आभुजित्वा उजुं कायं पणिधाय अत्तनो उपसमं पच्चवेक्खमानो।
40. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā sāriputto bhagavato avidūre nisinno hoti pallaṅkaṃ ābhujitvā ujuṃ kāyaṃ paṇidhāya attano upasamaṃ paccavekkhamāno.
अद्दसा खो भगवा आयस्मन्तं सारिपुत्तं अविदूरे निसिन्नं पल्लङ्कं आभुजित्वा उजुं कायं पणिधाय अत्तनो उपसमं पच्चवेक्खमानं।
Addasā kho bhagavā āyasmantaṃ sāriputtaṃ avidūre nisinnaṃ pallaṅkaṃ ābhujitvā ujuṃ kāyaṃ paṇidhāya attano upasamaṃ paccavekkhamānaṃ.
अथ खो भगवा एतमत्थं विदित्वा तायं वेलायं इमं उदानं उदानेसि –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘उपसन्तसन्तचित्तस्स, नेत्तिच्छिन्नस्स भिक्खुनो।
‘‘Upasantasantacittassa, netticchinnassa bhikkhuno;
विक्खीणो जातिसंसारो, मुत्तो सो मारबन्धना’’ति॥ दसमं।
Vikkhīṇo jātisaṃsāro, mutto so mārabandhanā’’ti. dasamaṃ;
मेघियवग्गो चतुत्थो निट्ठितो।
Meghiyavaggo catuttho niṭṭhito.
तस्सुद्दानं –
Tassuddānaṃ –
पिण्डोलो सारिपुत्तो च, सुन्दरी भवति अट्ठमं।
Piṇḍolo sāriputto ca, sundarī bhavati aṭṭhamaṃ;
उपसेनो वङ्गन्तपुत्तो, सारिपुत्तो च ते दसाति॥
Upaseno vaṅgantaputto, sāriputto ca te dasāti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / उदान-अट्ठकथा • Udāna-aṭṭhakathā / १०. सारिपुत्तउपसमसुत्तवण्णना • 10. Sāriputtaupasamasuttavaṇṇanā
