| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៧. សន្តុដ្ឋិសុត្តវណ្ណនា
7. Santuṭṭhisuttavaṇṇanā
២៧. សត្តមេ អប្បានីតិ បរិត្តានិ។ សុលភានីតិ សុខេន លទ្ធព្ពានិ, យត្ថ កត្ថចិ សក្កា ហោន្តិ លភិតុំ។ អនវជ្ជានីតិ និទ្ទោសានិ។ បិណ្ឌិយាលោបភោជនន្តិ ជង្ឃាបិណ្ឌិយពលេន ចរិត្វា អាលោបមត្តំ លទ្ធំ ភោជនំ។ បូតិមុត្តន្តិ យំកិញ្ចិ មុត្តំ។ យថា ហិ សុវណ្ណវណ្ណោបិ កាយោ បូតិកាយោតិ វុច្ចតិ, ឯវំ អភិនវម្បិ មុត្តំ បូតិមុត្តមេវ។
27. Sattame appānīti parittāni. Sulabhānīti sukhena laddhabbāni, yattha katthaci sakkā honti labhituṃ. Anavajjānīti niddosāni. Piṇḍiyālopabhojananti jaṅghāpiṇḍiyabalena caritvā ālopamattaṃ laddhaṃ bhojanaṃ. Pūtimuttanti yaṃkiñci muttaṃ. Yathā hi suvaṇṇavaṇṇopi kāyo pūtikāyoti vuccati, evaṃ abhinavampi muttaṃ pūtimuttameva.
វិឃាតោតិ វិគតឃាតោ, ចិត្តស្ស ទុក្ខំ ន ហោតីតិ អត្ថោ។ ទិសា នប្បដិហញ្ញតីតិ យស្ស ហិ ‘‘អសុកដ្ឋានំ នាម គតោ ចីវរាទីនិ លភិស្សាមី’’តិ ចិត្តំ ឧប្បជ្ជតិ, តស្ស ទិសា បដិហញ្ញតិ នាម។ យស្ស ឯវំ ន ឧប្បជ្ជតិ, តស្ស នប្បដិហញ្ញតិ នាម។ ធម្មាតិ បដិបត្តិធម្មា។ សាមញ្ញស្សានុលោមិកាតិ សមណធម្មស្ស អនុលោមា។ អធិគ្គហិតាតិ សព្ពេតេ តុដ្ឋចិត្តស្ស ភិក្ខុនោ អធិគ្គហិតា ហោន្តិ អន្តោគតា ន បរិពាហិរាតិ។
Vighātoti vigataghāto, cittassa dukkhaṃ na hotīti attho. Disānappaṭihaññatīti yassa hi ‘‘asukaṭṭhānaṃ nāma gato cīvarādīni labhissāmī’’ti cittaṃ uppajjati, tassa disā paṭihaññati nāma. Yassa evaṃ na uppajjati, tassa nappaṭihaññati nāma. Dhammāti paṭipattidhammā. Sāmaññassānulomikāti samaṇadhammassa anulomā. Adhiggahitāti sabbete tuṭṭhacittassa bhikkhuno adhiggahitā honti antogatā na paribāhirāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៧. សន្តុដ្ឋិសុត្តំ • 7. Santuṭṭhisuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៧. សន្តុដ្ឋិសុត្តវណ្ណនា • 7. Santuṭṭhisuttavaṇṇanā
