१. समणसञ्‍ञासुत्तं

1. Samaṇasaññāsuttaṃ

१०१. ‘‘तिस्सो इमा, भिक्खवे, समणसञ्‍ञा भाविता बहुलीकता सत्त धम्मे परिपूरेन्ति। कतमा तिस्सो? वेवण्णियम्हि अज्झुपगतो, परपटिबद्धा मे जीविका, अञ्‍ञो मे आकप्पो करणीयोति – इमा खो, भिक्खवे, तिस्सो समणसञ्‍ञा भाविता बहुलीकता सत्त धम्मे परिपूरेन्ति।

101. ‘‘Tisso imā, bhikkhave, samaṇasaññā bhāvitā bahulīkatā satta dhamme paripūrenti. Katamā tisso? Vevaṇṇiyamhi ajjhupagato, parapaṭibaddhā me jīvikā, añño me ākappo karaṇīyoti – imā kho, bhikkhave, tisso samaṇasaññā bhāvitā bahulīkatā satta dhamme paripūrenti.

‘‘कतमे सत्त? सन्ततकारी ¹ होति सन्ततवुत्ति ² सीलेसु, अनभिज्झालु होति, अब्यापज्‍जो होति, अनतिमानी होति, सिक्खाकामो होति , इदमत्थंतिस्स होति जीवितपरिक्खारेसु, आरद्धवीरियो च ³ विहरति। इमा खो, भिक्खवे, तिस्सो समणसञ्‍ञा भाविता बहुलीकता इमे सत्त धम्मे परिपूरेन्ती’’ति। पठमं।

‘‘Katame satta? Santatakārī ⁴ hoti santatavutti ⁵ sīlesu, anabhijjhālu hoti, abyāpajjo hoti, anatimānī hoti, sikkhākāmo hoti , idamatthaṃtissa hoti jīvitaparikkhāresu, āraddhavīriyo ca ⁶ viharati. Imā kho, bhikkhave, tisso samaṇasaññā bhāvitā bahulīkatā ime satta dhamme paripūrentī’’ti. Paṭhamaṃ.

Next: २. बोज्झङ्गसुत्तं • 2. Bojjhaṅgasuttaṃ

Footnotes:

1. सततकारी (स्या॰ पी॰ क॰)

2. सततवुत्ति (स्या॰ पी॰)

3. आरद्धविरियो च (सी॰ पी॰), आरद्धविरियो (स्या॰)

4. satatakārī (syā. pī. ka.)

5. satatavutti (syā. pī.)

6. āraddhaviriyo ca (sī. pī.), āraddhaviriyo (syā.)

Related texts:

अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / १. समणसञ्‍ञासुत्तवण्णना • 1. Samaṇasaññāsuttavaṇṇanā

टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १-१२. समणसञ्‍ञासुत्तादिवण्णना • 1-12. Samaṇasaññāsuttādivaṇṇanā

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact