| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
២៦. សមានាសនិកនិទ្ទេសវណ្ណនា
26. Samānāsanikaniddesavaṇṇanā
១៩៥. តិវស្សន្តរមេកមាសនំ ភិក្ខូនំ អនុញ្ញាតន្តិ សម្ពន្ធោ។ តត្ថ ឯកស្មិំ អាសនេ មញ្ចាទិកេ ទ្វិន្នំ អាសនំ និសីទនំ ឯកមាសនំ។ ម-ការោ សន្ធិជោ។ កីទិសន្តិ អាហ ‘‘តិវស្សន្តរ’’ន្តិ។ តិណ្ណំ វស្សានមន្តរមេតស្សាតិ តិវស្សន្តរោ, ទ្វីហិ វស្សេហិ មហន្តតរោ វា ទហរតរោ វា ភិក្ខុ, សោ អស្ស អត្ថីតិ តិវស្សន្តរំ, តិវស្សន្តរវន្តន្តិ អត្ថោ។ យោ បន ឯកេន វស្សេន មហន្តតរោ វា ទហរតរោ វា ឯកវស្សោយេវ វា, តព្ពន្តតាយ វត្តព្ពមេវ នត្ថិ។ អថ វា តិវស្សន្តរន្តិ ករណត្ថេ ឧបយោគវចនំ, តិវស្សន្តរេន សទ្ធិន្តិ អត្ថោ។ តមេវ សមត្ថេតិ ‘‘សត្តវស្សេ’’ច្ចាទិនា។
195. Tivassantaramekamāsanaṃ bhikkhūnaṃ anuññātanti sambandho. Tattha ekasmiṃ āsane mañcādike dvinnaṃ āsanaṃ nisīdanaṃ ekamāsanaṃ. Ma-kāro sandhijo. Kīdisanti āha ‘‘tivassantara’’nti. Tiṇṇaṃ vassānamantarametassāti tivassantaro, dvīhi vassehi mahantataro vā daharataro vā bhikkhu, so assa atthīti tivassantaraṃ, tivassantaravantanti attho. Yo pana ekena vassena mahantataro vā daharataro vā ekavassoyeva vā, tabbantatāya vattabbameva natthi. Atha vā tivassantaranti karaṇatthe upayogavacanaṃ, tivassantarena saddhinti attho. Tameva samattheti ‘‘sattavasse’’ccādinā.
១៩៦. មុនិ អនុញ្ញាសីតិ សម្ពន្ធោ។ សព្ពេហេវាតិ សមានាសនិកអសមានាសនិកេហិ សព្ពេហេវ សទ្ធិំ។
196. Muni anuññāsīti sambandho. Sabbehevāti samānāsanikaasamānāsanikehi sabbeheva saddhiṃ.
១៩៧. ទីឃាសនំ ទស្សេតិ ‘‘អន្ត’’ន្តិអាទិនា។ យំ តិណ្ណំ និសីទិតុំ បហោតិ, តំ អន្តំ ទីឃាសនន្តិ សម្ពន្ធោ។ អន្តន្តិ បច្ឆិមំ។ អទីឃាសនេ បន សមានាសនិកា និសីទិតុំ លព្ភន្តីតិ ទស្សេន្តោ ‘‘មញ្ចកេ’’តិអាទិមាហ។ សព្ពត្ថ អយថាករណតោ ទុក្កដន្តិ។
197. Dīghāsanaṃ dasseti ‘‘anta’’ntiādinā. Yaṃ tiṇṇaṃ nisīdituṃ pahoti, taṃ antaṃ dīghāsananti sambandho. Antanti pacchimaṃ. Adīghāsane pana samānāsanikā nisīdituṃ labbhantīti dassento ‘‘mañcake’’tiādimāha. Sabbattha ayathākaraṇato dukkaṭanti.
សមានាសនិកនិទ្ទេសវណ្ណនា និដ្ឋិតា។
Samānāsanikaniddesavaṇṇanā niṭṭhitā.
