| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
८. सद्धसुत्तं
8. Saddhasuttaṃ
३८. ‘‘पञ्चिमे , भिक्खवे, सद्धे कुलपुत्ते आनिसंसा। कतमे पञ्च? ये ते, भिक्खवे, लोके सन्तो सप्पुरिसा ते सद्धञ्ञेव पठमं अनुकम्पन्ता अनुकम्पन्ति, नो तथा अस्सद्धं; सद्धञ्ञेव पठमं उपसङ्कमन्ता उपसङ्कमन्ति, नो तथा अस्सद्धं; सद्धञ्ञेव पठमं पटिग्गण्हन्ता पटिग्गण्हन्ति, नो तथा अस्सद्धं; सद्धञ्ञेव पठमं धम्मं देसेन्ता देसेन्ति, नो तथा अस्सद्धं; सद्धो कायस्स भेदा परं मरणा सुगतिं सग्गं लोकं उपपज्जति। इमे खो, भिक्खवे, पञ्च सद्धे कुलपुत्ते आनिसंसा।
38. ‘‘Pañcime , bhikkhave, saddhe kulaputte ānisaṃsā. Katame pañca? Ye te, bhikkhave, loke santo sappurisā te saddhaññeva paṭhamaṃ anukampantā anukampanti, no tathā assaddhaṃ; saddhaññeva paṭhamaṃ upasaṅkamantā upasaṅkamanti, no tathā assaddhaṃ; saddhaññeva paṭhamaṃ paṭiggaṇhantā paṭiggaṇhanti, no tathā assaddhaṃ; saddhaññeva paṭhamaṃ dhammaṃ desentā desenti, no tathā assaddhaṃ; saddho kāyassa bhedā paraṃ maraṇā sugatiṃ saggaṃ lokaṃ upapajjati. Ime kho, bhikkhave, pañca saddhe kulaputte ānisaṃsā.
‘‘सेय्यथापि, भिक्खवे, सुभूमियं चतुमहापथे महानिग्रोधो समन्ता पक्खीनं पटिसरणं होति; एवमेवं खो, भिक्खवे, सद्धो कुलपुत्तो बहुनो जनस्स पटिसरणं होति भिक्खूनं भिक्खुनीनं उपासकानं उपासिकान’’न्ति।
‘‘Seyyathāpi, bhikkhave, subhūmiyaṃ catumahāpathe mahānigrodho samantā pakkhīnaṃ paṭisaraṇaṃ hoti; evamevaṃ kho, bhikkhave, saddho kulaputto bahuno janassa paṭisaraṇaṃ hoti bhikkhūnaṃ bhikkhunīnaṃ upāsakānaṃ upāsikāna’’nti.
मूलवा फलसम्पन्नो, पतिट्ठा होति पक्खिनं॥
Mūlavā phalasampanno, patiṭṭhā hoti pakkhinaṃ.
‘‘मनोरमे आयतने, सेवन्ति नं विहङ्गमा।
‘‘Manorame āyatane, sevanti naṃ vihaṅgamā;
‘‘तथेव सीलसम्पन्नं, सद्धं पुरिसपुग्गलं।
‘‘Tatheva sīlasampannaṃ, saddhaṃ purisapuggalaṃ;
निवातवुत्तिं अत्थद्धं, सोरतं सखिलं मुदुं॥
Nivātavuttiṃ atthaddhaṃ, sorataṃ sakhilaṃ muduṃ.
‘‘वीतरागा वीतदोसा, वीतमोहा अनासवा।
‘‘Vītarāgā vītadosā, vītamohā anāsavā;
पुञ्ञक्खेत्तानि लोकस्मिं, सेवन्ति तादिसं नरं॥
Puññakkhettāni lokasmiṃ, sevanti tādisaṃ naraṃ.
‘‘ते तस्स धम्मं देसेन्ति, सब्बदुक्खापनूदनं।
‘‘Te tassa dhammaṃ desenti, sabbadukkhāpanūdanaṃ;
यं सो धम्मं इधञ्ञाय, परिनिब्बाति अनासवो’’ति॥ अट्ठमं।
Yaṃ so dhammaṃ idhaññāya, parinibbāti anāsavo’’ti. aṭṭhamaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ८. सद्धसुत्तवण्णना • 8. Saddhasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ८. सद्धसुत्तवण्णना • 8. Saddhasuttavaṇṇanā
