| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๕. ปิลินฺทวจฺฉเตฺถรอปทานํ
5. Pilindavacchattheraapadānaṃ
๕๕.
55.
‘‘นิพฺพุเต โลกนาถมฺหิ, สุเมเธ อคฺคปุคฺคเล;
‘‘Nibbute lokanāthamhi, sumedhe aggapuggale;
ปสนฺนจิโตฺต สุมโน, ถูปปูชํ อกาสหํฯ
Pasannacitto sumano, thūpapūjaṃ akāsahaṃ.
๕๖.
56.
‘‘เย จ ขีณาสวา ตตฺถ, ฉฬภิญฺญา มหิทฺธิกา;
‘‘Ye ca khīṇāsavā tattha, chaḷabhiññā mahiddhikā;
เตหํ ตตฺถ สมาเนตฺวา, สงฺฆภตฺตํ อกาสหํฯ
Tehaṃ tattha samānetvā, saṅghabhattaṃ akāsahaṃ.
๕๗.
57.
‘‘สุเมธสฺส ภควโต, อุปฎฺฐาโก ตทา อหุ;
‘‘Sumedhassa bhagavato, upaṭṭhāko tadā ahu;
สุเมโธ นาม นาเมน, อนุโมทิตฺถ โส ตทาฯ
Sumedho nāma nāmena, anumodittha so tadā.
๕๘.
58.
‘‘เตน จิตฺตปฺปสาเทน, วิมานํ อุปปชฺชหํ;
‘‘Tena cittappasādena, vimānaṃ upapajjahaṃ;
ฉฬาสีติสหสฺสานิ, อจฺฉราโย รมิํสุ เมฯ
Chaḷāsītisahassāni, accharāyo ramiṃsu me.
๕๙.
59.
‘‘มเมว อนุวตฺตนฺติ, สพฺพกาเมหิ ตา สทา;
‘‘Mameva anuvattanti, sabbakāmehi tā sadā;
อเญฺญ เทเว อภิโภมิ, ปุญฺญกมฺมสฺสิทํ ผลํฯ
Aññe deve abhibhomi, puññakammassidaṃ phalaṃ.
๖๐.
60.
‘‘ปญฺจวีสติกปฺปมฺหิ, วรุโณ นาม ขตฺติโย;
‘‘Pañcavīsatikappamhi, varuṇo nāma khattiyo;
๖๑.
61.
‘‘น เต พีชํ ปวปนฺติ, นปิ นียนฺติ นงฺคลา;
‘‘Na te bījaṃ pavapanti, napi nīyanti naṅgalā;
อกฎฺฐปากิมํ สาลิํ, ปริภุญฺชนฺติ มานุสาฯ
Akaṭṭhapākimaṃ sāliṃ, paribhuñjanti mānusā.
๖๒.
62.
‘‘ตตฺถ รชฺชํ กริตฺวาน, เทวตฺตํ ปุน คจฺฉหํ;
‘‘Tattha rajjaṃ karitvāna, devattaṃ puna gacchahaṃ;
ตทาปิ เอทิสา มยฺหํ, นิพฺพตฺตา โภคสมฺปทาฯ
Tadāpi edisā mayhaṃ, nibbattā bhogasampadā.
๖๓.
63.
‘‘น มํ มิตฺตา อมิตฺตา วา, หิํสนฺติ สพฺพปาณิโน;
‘‘Na maṃ mittā amittā vā, hiṃsanti sabbapāṇino;
สเพฺพสมฺปิ ปิโย โหมิ, ปุญฺญกมฺมสฺสิทํ ผลํฯ
Sabbesampi piyo homi, puññakammassidaṃ phalaṃ.
๖๔.
64.
‘‘ติํสกปฺปสหสฺสมฺหิ , ยํ ทานมททิํ ตทา;
‘‘Tiṃsakappasahassamhi , yaṃ dānamadadiṃ tadā;
ทุคฺคติํ นาภิชานามิ, คนฺธาเลปสฺสิทํ ผลํฯ
Duggatiṃ nābhijānāmi, gandhālepassidaṃ phalaṃ.
๖๕.
65.
‘‘อิมสฺมิํ ภทฺทเก กเปฺป, เอโก อาสิํ ชนาธิโป;
‘‘Imasmiṃ bhaddake kappe, eko āsiṃ janādhipo;
๖๖.
66.
‘‘โสหํ ปญฺจสุ สีเลสุ, ฐเปตฺวา ชนตํ พหุํ;
‘‘Sohaṃ pañcasu sīlesu, ṭhapetvā janataṃ bahuṃ;
ปาเปตฺวา สุคติํเยว, เทวตานํ ปิโย อหุํฯ
Pāpetvā sugatiṃyeva, devatānaṃ piyo ahuṃ.
๖๗.
67.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา ปิลินฺทวโจฺฉ 5 เถโร อิมา คาถาโย อภาสิตฺถาติฯ
Itthaṃ sudaṃ āyasmā pilindavaccho 6 thero imā gāthāyo abhāsitthāti.
ปิลินฺทวจฺฉเตฺถรสฺสาปทานํ ปญฺจมํฯ
Pilindavacchattherassāpadānaṃ pañcamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๕. ปิลินฺทวจฺฉเตฺถรอปทานวณฺณนา • 5. Pilindavacchattheraapadānavaṇṇanā
