| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
5. පත්තනිද්දෙසො
5. Pattaniddeso
පත්තො චාති –
Pattocāti –
60.
60.
අයොපත්තො භූමිපත්තො, ජාතියා කප්පියා දුවෙ;
Ayopatto bhūmipatto, jātiyā kappiyā duve;
උක්කට්ඨො මජ්ඣිමො චෙව, ඔමකො ච පමාණතො.
Ukkaṭṭho majjhimo ceva, omako ca pamāṇato.
61.
61.
උක්කට්ඨො මගධෙ නාළි-ද්වයතණ්ඩුලසාධිතං;
Ukkaṭṭho magadhe nāḷi-dvayataṇḍulasādhitaṃ;
ගණ්හාති ඔදනං සූපං, බ්යඤ්ජනඤ්ච තදූපියං.
Gaṇhāti odanaṃ sūpaṃ, byañjanañca tadūpiyaṃ.
62.
62.
මජ්ඣිමො තස්සුපඩ්ඪොව, තතොපඩ්ඪොව ඔමකො;
Majjhimo tassupaḍḍhova, tatopaḍḍhova omako;
උක්කට්ඨතො ච උක්කට්ඨො, අපත්තො ඔමකොමකො.
Ukkaṭṭhato ca ukkaṭṭho, apatto omakomako.
63.
63.
අතිරෙකපත්තො ධාරෙය්යො, දසාහපරමං සකො;
Atirekapatto dhāreyyo, dasāhaparamaṃ sako;
කප්පො නිස්සග්ගියො හොති, තස්මිං කාලෙතිනාමිතෙ.
Kappo nissaggiyo hoti, tasmiṃ kāletināmite.
64.
64.
අච්ඡෙදදානගාහෙහි, විබ්භමා මරණුද්ධටා;
Acchedadānagāhehi, vibbhamā maraṇuddhaṭā;
ලිඞ්ගසික්ඛාහි ඡිද්දෙන, පත්තාධිට්ඨානමුජ්ඣති.
Liṅgasikkhāhi chiddena, pattādhiṭṭhānamujjhati.
65.
65.
පත්තං න පටිසාමෙය්ය, සොදකං න ච ඔතපෙ;
Pattaṃ na paṭisāmeyya, sodakaṃ na ca otape;
උණ්හෙ න නිදහෙ භුම්යා, න ඨපෙ නො ච ලග්ගයෙ.
Uṇhe na nidahe bhumyā, na ṭhape no ca laggaye.
66.
66.
මිඩ්ඪන්තෙ පරිභණ්ඩන්තෙ, අඞ්කෙ වා ආතපත්තකෙ;
Miḍḍhante paribhaṇḍante, aṅke vā ātapattake;
පාදෙසු මඤ්චපීඨෙ වා, ඨපෙතුං න ච කප්පති.
Pādesu mañcapīṭhe vā, ṭhapetuṃ na ca kappati.
67.
67.
න නීහරෙය්ය උච්ඡිට්ඨො-දකඤ්ච චලකට්ඨිකං;
Na nīhareyya ucchiṭṭho-dakañca calakaṭṭhikaṃ;
පත්තෙන පත්තහත්ථො වා, කවාටං න පණාමයෙ.
Pattena pattahattho vā, kavāṭaṃ na paṇāmaye.
68.
68.
භූමිආධාරකෙ දාරුදණ්ඩාධාරෙ සුසජ්ජිතෙ;
Bhūmiādhārake dārudaṇḍādhāre susajjite;
දුවෙ පත්තෙ ඨපෙය්යෙකං, නික්කුජ්ජිත්වාන භූමියං.
Duve patte ṭhapeyyekaṃ, nikkujjitvāna bhūmiyaṃ.
69.
69.
දාරුරූපියසොවණ්ණ-මණිවෙළුරියාමයා ;
Dārurūpiyasovaṇṇa-maṇiveḷuriyāmayā ;
කංසකාචතිපුසීසඵලිකාතම්බලොහජා.
Kaṃsakācatipusīsaphalikātambalohajā.
70.
70.
ඡවසීසමයො චාපි, ඝටීතුම්බකටාහජා;
Chavasīsamayo cāpi, ghaṭītumbakaṭāhajā;
පත්තා අකප්පියා සබ්බෙ, වුත්තා දුක්කටවත්ථුකාති.
Pattā akappiyā sabbe, vuttā dukkaṭavatthukāti.
