| Library / Tipiṭaka / តិបិដក • Tipiṭaka / វិនយវិនិច្ឆយ-ដីកា • Vinayavinicchaya-ṭīkā |
បាដិទេសនីយកថាវណ្ណនា
Pāṭidesanīyakathāvaṇṇanā
២៤៣២. ឯវំ បាចិត្តិយវិនិច្ឆយំ ទស្សេត្វា ឥទានិ បាដិទេសនីយំ ទស្សេតុមាហ ‘‘អគិលានា’’តិអាទិ។ យា បន ភិក្ខុនី អគិលានា សយំ អត្តនា វិញ្ញត្តិយា លទ្ធំ សប្បិំ សចេ ‘‘ភុញ្ជិស្សាមី’’តិ គណ្ហតិ, តស្សា ឯវំ គហណេ ទុក្កដំ បរិទីបិតន្តិ យោជនា។ តត្ថ យស្សា វិនា សប្បិនា ផាសុ ហោតិ, សា អគិលានា នាម។ សប្បិន្តិ បុព្ពេ វុត្តវិនិច្ឆយំ បាឡិអាគតំ គោសប្បិអាទិកមេវ។
2432. Evaṃ pācittiyavinicchayaṃ dassetvā idāni pāṭidesanīyaṃ dassetumāha ‘‘agilānā’’tiādi. Yā pana bhikkhunī agilānā sayaṃ attanā viññattiyā laddhaṃ sappiṃ sace ‘‘bhuñjissāmī’’ti gaṇhati, tassā evaṃ gahaṇe dukkaṭaṃ paridīpitanti yojanā. Tattha yassā vinā sappinā phāsu hoti, sā agilānā nāma. Sappinti pubbe vuttavinicchayaṃ pāḷiāgataṃ gosappiādikameva.
២៤៣៣. តិបាដិទេសនីយន្តិ អគិលានា អគិលានសញ្ញា, វេមតិកា, គិលានសញ្ញាតិ តីសុ វិកប្បេសុ តីណិ បាដិទេសនីយានិ។ គិលានា ទ្វិកទុក្កដន្តិ គិលានាយ ទ្វិកទុក្កដំ។ គិលានា អគិលានសញ្ញា, វេមតិកា វាតិ ទ្វីសុ វិកប្បេសុ ទ្វេ ទុក្កដានិ។
2433.Tipāṭidesanīyanti agilānā agilānasaññā, vematikā, gilānasaññāti tīsu vikappesu tīṇi pāṭidesanīyāni. Gilānā dvikadukkaṭanti gilānāya dvikadukkaṭaṃ. Gilānā agilānasaññā, vematikā vāti dvīsu vikappesu dve dukkaṭāni.
២៤៣៤-៥. គិលានា ហុត្វា សប្បិំ វិញ្ញាបេត្វា បច្ឆា វូបសន្តគេលញ្ញា ហុត្វា សេវន្តិយា បរិភុញ្ជន្តិយាបិ ច គិលានាយ អវសេសំ បរិភុញ្ជន្តិយា វា ញាតកាទិតោ ញាតកបវារិតដ្ឋានតោ វិញ្ញត្តំ ភុញ្ជន្តិយា វា អញ្ញស្សត្ថាយ វិញ្ញត្តំ បរិភុញ្ជន្តិយា វា អត្តនោ ធនេន គហិតំ ភុញ្ជន្តិយា វា ឧម្មត្តិកាយ វា អនាបត្តីតិ យោជនា។
2434-5. Gilānā hutvā sappiṃ viññāpetvā pacchā vūpasantagelaññā hutvā sevantiyā paribhuñjantiyāpi ca gilānāya avasesaṃ paribhuñjantiyā vā ñātakādito ñātakapavāritaṭṭhānato viññattaṃ bhuñjantiyā vā aññassatthāya viññattaṃ paribhuñjantiyā vā attano dhanena gahitaṃ bhuñjantiyā vā ummattikāya vā anāpattīti yojanā.
បឋមំ។
Paṭhamaṃ.
២៤៣៦. សេសេសុ ទុតិយាទីសូតិ ‘‘យា បន ភិក្ខុនី អគិលានា តេលំ…បេ.… មធុំ…បេ.… ផាណិតំ…បេ.… មច្ឆំ…បេ.… មំសំ…បេ.… ខីរំ…បេ.… ទធិំ វិញ្ញាបេត្វា ភុញ្ជេយ្យ, បដិទេសេតព្ពំ តាយ ភិក្ខុនិយា គារយ្ហំ អយ្យេ ធម្មំ អាបជ្ជិំ អសប្បាយំ បាដិទេសនីយំ, តំ បដិទេសេមី’’តិ (បាចិ. ១២៣៦) ឯវំ ទុតិយាទីសុ សត្តសុ បាដិទេសនីយេសុ។ នត្ថិ កាចិ វិសេសតាតិ តេលាទិបទានិ វិនា អញ្ញោ កោចិ វិសេសោ នត្ថីតិ អត្ថោ។
2436.Sesesu dutiyādīsūti ‘‘yā pana bhikkhunī agilānā telaṃ…pe… madhuṃ…pe… phāṇitaṃ…pe… macchaṃ…pe… maṃsaṃ…pe… khīraṃ…pe… dadhiṃ viññāpetvā bhuñjeyya, paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti (pāci. 1236) evaṃ dutiyādīsu sattasu pāṭidesanīyesu. Natthi kāci visesatāti telādipadāni vinā añño koci viseso natthīti attho.
២៤៣៧. បាឡិយំ អនាគតេសុ សព្ពេសុ សប្បិអាទីសុ អដ្ឋសុ អញ្ញតរំ វិញ្ញាបេត្វា ភុញ្ជន្តិយាបិ ទុក្កដន្តិ យោជនា។
2437. Pāḷiyaṃ anāgatesu sabbesu sappiādīsu aṭṭhasu aññataraṃ viññāpetvā bhuñjantiyāpi dukkaṭanti yojanā.
ឥតិ វិនយត្ថសារសន្ទីបនិយា វិនយវិនិច្ឆយវណ្ណនាយ
Iti vinayatthasārasandīpaniyā vinayavinicchayavaṇṇanāya
បាដិទេសនីយកថាវណ្ណនា និដ្ឋិតា។
Pāṭidesanīyakathāvaṇṇanā niṭṭhitā.
