| Library / Tipiṭaka / තිපිටක • Tipiṭaka / ධම්මපද-අට්ඨකථා • Dhammapada-aṭṭhakathā |
නමො තස්ස භගවතො අරහතො සම්මාසම්බුද්ධස්ස
Namo tassa bhagavato arahato sammāsambuddhassa
ඛුද්දකනිකායෙ
Khuddakanikāye
ධම්මපද-අට්ඨකථා
Dhammapada-aṭṭhakathā
(පඨමො භාගො)
(Paṭhamo bhāgo)
ගන්ථාරම්භකථා
Ganthārambhakathā
1.
1.
මහාමොහතමොනද්ධෙ , ලොකෙ ලොකන්තදස්සිනා;
Mahāmohatamonaddhe , loke lokantadassinā;
යෙන සද්ධම්මපජ්ජොතො, ජාලිතො ජලිතිද්ධිනා.
Yena saddhammapajjoto, jālito jalitiddhinā.
2.
2.
තස්ස පාදෙ නමස්සිත්වා, සම්බුද්ධස්ස සිරීමතො;
Tassa pāde namassitvā, sambuddhassa sirīmato;
සද්ධම්මඤ්චස්ස පූජෙත්වා, කත්වා සඞ්ඝස්ස චඤ්ජලිං.
Saddhammañcassa pūjetvā, katvā saṅghassa cañjaliṃ.
3.
3.
තං තං කාරණමාගම්ම, ධම්මාධම්මෙසු කොවිදො;
Taṃ taṃ kāraṇamāgamma, dhammādhammesu kovido;
සම්පත්තසද්ධම්මපදො, සත්ථා ධම්මපදං සුභං.
Sampattasaddhammapado, satthā dhammapadaṃ subhaṃ.
4.
4.
දෙසෙසි කරුණාවෙග-සමුස්සාහිතමානසො;
Desesi karuṇāvega-samussāhitamānaso;
යං වෙ දෙවමනුස්සානං, පීතිපාමොජ්ජවඩ්ඪනං.
Yaṃ ve devamanussānaṃ, pītipāmojjavaḍḍhanaṃ.
5.
5.
පරම්පරාභතා තස්ස, නිපුණා අත්ථවණ්ණනා;
Paramparābhatā tassa, nipuṇā atthavaṇṇanā;
යා තම්බපණ්ණිදීපම්හි, දීපභාසාය සණ්ඨිතා.
Yā tambapaṇṇidīpamhi, dīpabhāsāya saṇṭhitā.
6.
6.
න සාධයති සෙසානං, සත්තානං හිතසම්පදං;
Na sādhayati sesānaṃ, sattānaṃ hitasampadaṃ;
අප්පෙව නාම සාධෙය්ය, සබ්බලොකස්ස සා හිතං.
Appeva nāma sādheyya, sabbalokassa sā hitaṃ.
7.
7.
ඉති ආසීසමානෙන, දන්තෙන සමචාරිනා;
Iti āsīsamānena, dantena samacārinā;
කුමාරකස්සපෙනාහං, ථෙරෙන ථිරචෙතසා.
Kumārakassapenāhaṃ, therena thiracetasā.
8 .
8.
සද්ධම්මට්ඨිතිකාමෙන , සක්කච්චං අභියාචිතො;
Saddhammaṭṭhitikāmena , sakkaccaṃ abhiyācito;
තං භාසං අතිවිත්ථාර-ගතඤ්ච වචනක්කමං.
Taṃ bhāsaṃ ativitthāra-gatañca vacanakkamaṃ.
9 .
9.
පහායාරොපයිත්වාන , තන්තිභාසං මනොරමං;
Pahāyāropayitvāna , tantibhāsaṃ manoramaṃ;
ගාථානං බ්යඤ්ජනපදං, යං තත්ථ න විභාවිතං.
Gāthānaṃ byañjanapadaṃ, yaṃ tattha na vibhāvitaṃ.
10.
10.
කෙවලං තං විභාවෙත්වා, සෙසං තමෙව අත්ථතො;
Kevalaṃ taṃ vibhāvetvā, sesaṃ tameva atthato;
භාසන්තරෙන භාසිස්සං, ආවහන්තො විභාවිනං;
Bhāsantarena bhāsissaṃ, āvahanto vibhāvinaṃ;
මනසො පීතිපාමොජ්ජං, අත්ථධම්මූපනිස්සිතන්ති.
Manaso pītipāmojjaṃ, atthadhammūpanissitanti.
Related texts:
තිපිටක (මූල) • Tipiṭaka (Mūla) / සුත්තපිටක • Suttapiṭaka / ඛුද්දකනිකාය • Khuddakanikāya / ධම්මපදපාළි • Dhammapadapāḷi / 1. යමකවග්ගො • 1. Yamakavaggo
