| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༦. པཋམབྷཝསུཏྟཾ
6. Paṭhamabhavasuttaṃ
༧༧. ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘བྷཝོ, བྷཝོཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, བྷཝོ ཧོཏཱི’’ཏི?
77. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘bhavo, bhavoti, bhante, vuccati. Kittāvatā nu kho, bhante, bhavo hotī’’ti?
‘‘ཀཱམདྷཱཏུཝེཔཀྐཉྩ, ཨཱནནྡ, ཀམྨཾ ནཱབྷཝིསྶ, ཨཔི ནུ ཁོ ཀཱམབྷཝོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཨིཏི ཁོ, ཨཱནནྡ, ཀམྨཾ ཁེཏྟཾ, ཝིཉྙཱཎཾ བཱིཛཾ, ཏཎྷཱ སྣེཧོ 1། ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ ཧཱིནཱཡ དྷཱཏུཡཱ ཝིཉྙཱཎཾ པཏིཊྛིཏཾ ཨེཝཾ ཨཱཡཏིཾ 2 པུནབྦྷཝཱབྷིནིབྦཏྟི ཧོཏི། ( ) 3
‘‘Kāmadhātuvepakkañca, ānanda, kammaṃ nābhavissa, api nu kho kāmabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho 4. Avijjānīvaraṇānaṃ sattānaṃ taṇhāsaṃyojanānaṃ hīnāya dhātuyā viññāṇaṃ patiṭṭhitaṃ evaṃ āyatiṃ 5 punabbhavābhinibbatti hoti. ( ) 6
‘‘རཱུཔདྷཱཏུཝེཔཀྐཉྩ, ཨཱནནྡ, ཀམྨཾ ནཱབྷཝིསྶ, ཨཔི ནུ ཁོ རཱུཔབྷཝོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཨིཏི ཁོ ཨཱནནྡ, ཀམྨཾ ཁེཏྟཾ, ཝིཉྙཱཎཾ བཱིཛཾ, ཏཎྷཱ སྣེཧོ། ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ མཛ྄ཛྷིམཱཡ དྷཱཏུཡཱ ཝིཉྙཱཎཾ པཏིཊྛིཏཾ ཨེཝཾ ཨཱཡཏིཾ པུནབྦྷཝཱབྷིནིབྦཏྟི ཧོཏི། ( ) 7
‘‘Rūpadhātuvepakkañca, ānanda, kammaṃ nābhavissa, api nu kho rūpabhavo paññāyethā’’ti? ‘‘No hetaṃ, bhante’’. ‘‘Iti kho ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ majjhimāya dhātuyā viññāṇaṃ patiṭṭhitaṃ evaṃ āyatiṃ punabbhavābhinibbatti hoti. ( ) 8
‘‘ཨརཱུཔདྷཱཏུཝེཔཀྐཉྩ, ཨཱནནྡ, ཀམྨཾ ནཱབྷཝིསྶ, ཨཔི ནུ ཁོ ཨརཱུཔབྷཝོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཨིཏི ཁོ, ཨཱནནྡ, ཀམྨཾ ཁེཏྟཾ, ཝིཉྙཱཎཾ བཱིཛཾ, ཏཎྷཱ སྣེཧོ། ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ པཎཱིཏཱཡ དྷཱཏུཡཱ ཝིཉྙཱཎཾ པཏིཊྛིཏཾ ཨེཝཾ ཨཱཡཏིཾ པུནབྦྷཝཱབྷིནིབྦཏྟི ཧོཏི། ཨེཝཾ ཁོ, ཨཱནནྡ, བྷཝོ ཧོཏཱི’’ཏི། ཚཊྛཾ།
‘‘Arūpadhātuvepakkañca, ānanda, kammaṃ nābhavissa, api nu kho arūpabhavo paññāyethā’’ti? ‘‘No hetaṃ, bhante’’. ‘‘Iti kho, ānanda, kammaṃ khettaṃ, viññāṇaṃ bījaṃ, taṇhā sneho. Avijjānīvaraṇānaṃ sattānaṃ taṇhāsaṃyojanānaṃ paṇītāya dhātuyā viññāṇaṃ patiṭṭhitaṃ evaṃ āyatiṃ punabbhavābhinibbatti hoti. Evaṃ kho, ānanda, bhavo hotī’’ti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. པཋམབྷཝསུཏྟཝཎྞནཱ • 6. Paṭhamabhavasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦-༧. པཋམབྷཝསུཏྟཱདིཝཎྞནཱ • 6-7. Paṭhamabhavasuttādivaṇṇanā
