| Library / Tipiṭaka / តិបិដក • Tipiṭaka / នេត្តិវិភាវិនី • Nettivibhāvinī |
៩. បរិវត្តនហារសម្បាតវិភាវនា
9. Parivattanahārasampātavibhāvanā
៧១. យេន យេន វិភត្តិហារសម្បាតេន សុត្តប្បទេសត្ថា វិភត្តា, សោ វិភត្តិហារសម្បាតោ បរិបុណ្ណោ, ‘‘កតមោ បរិវត្តនហារសម្បាតោ’’តិ បុច្ឆិតព្ពត្តា ‘‘តត្ថ កតមោ បរិវត្តនោ ហារសម្បាតោ’’តិអាទិ វុត្តំ។
71. Yena yena vibhattihārasampātena suttappadesatthā vibhattā, so vibhattihārasampāto paripuṇṇo, ‘‘katamo parivattanahārasampāto’’ti pucchitabbattā ‘‘tattha katamo parivattano hārasampāto’’tiādi vuttaṃ.
‘‘កតមេ សុត្តប្បទេសត្ថា កថំ បរិវត្តេតព្ពា’’តិ បុច្ឆិតព្ពត្តា ‘‘តស្មា’’តិអាទិ វុត្តំ។ យា ‘‘តស្មា…បេ.… គោចរោ’’តិ គាថា វុត្តា, តាយ គាថាយ យា សមថវិបស្សនា និទ្ធារិតា, តាយ សមថវិបស្សនាយ ភាវិតាយ អកុសលានំ និរោធោ ផលំ បយោជនំ ហោតិ, បរិញ្ញាតំ ទុក្ខំ ហោតិ, សមុទយោ បហីនោ ហោតិ, មគ្គោ ភាវិតោ ហោតីតិ បរិវត្តេតព្ពោ។ បដិបក្ខេន បន សមថវិបស្សនាយ អភាវិតាយ អកុសលានំ អនិរោធោ, អបរិញ្ញាតំ ទុក្ខំ, សមុទយោ អប្បហីនោ, មគ្គោ អភាវិតោ ហោតីតិ បរិវត្តេតព្ពោ។
‘‘Katame suttappadesatthā kathaṃ parivattetabbā’’ti pucchitabbattā ‘‘tasmā’’tiādi vuttaṃ. Yā ‘‘tasmā…pe… gocaro’’ti gāthā vuttā, tāya gāthāya yā samathavipassanā niddhāritā, tāya samathavipassanāya bhāvitāya akusalānaṃ nirodho phalaṃ payojanaṃ hoti, pariññātaṃ dukkhaṃ hoti, samudayo pahīno hoti, maggo bhāvito hotīti parivattetabbo. Paṭipakkhena pana samathavipassanāya abhāvitāya akusalānaṃ anirodho, apariññātaṃ dukkhaṃ, samudayo appahīno, maggo abhāvito hotīti parivattetabbo.
‘‘ឯត្តកោវ បរិវត្តនហារសម្បាតោ បរិបុណ្ណោ’’តិ វត្តព្ពត្តា ‘‘និយុត្តោ បរិវត្តនោ ហារសម្បាតោ’’តិ វុត្តំ។ យេន យេន សំវណ្ណនាវិសេសភូតេន បរិវត្តនហារសម្បាតេន សុត្តប្បទេសត្ថា បរិវត្តេតព្ពា, សោ សោ សំវណ្ណនាវិសេសភូតោ បរិវត្តនហារសម្បាតោ និយុត្តោ យថារហំ នីហរិត្វា យុជ្ជិតព្ពោតិ អត្ថោ គហេតព្ពោតិ។
‘‘Ettakova parivattanahārasampāto paripuṇṇo’’ti vattabbattā ‘‘niyutto parivattano hārasampāto’’ti vuttaṃ. Yena yena saṃvaṇṇanāvisesabhūtena parivattanahārasampātena suttappadesatthā parivattetabbā, so so saṃvaṇṇanāvisesabhūto parivattanahārasampāto niyutto yathārahaṃ nīharitvā yujjitabboti attho gahetabboti.
ឥតិ បរិវត្តនហារសម្បាតេ សត្តិពលានុរូបា រចិតា
Iti parivattanahārasampāte sattibalānurūpā racitā
វិភាវនា និដ្ឋិតា។
Vibhāvanā niṭṭhitā.
បណ្ឌិតេហិ បន…បេ.… គហេតព្ពោតិ។
Paṇḍitehi pana…pe… gahetabboti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / នេត្តិប្បករណបាឡិ • Nettippakaraṇapāḷi / ៩. បរិវត្តនហារសម្បាតោ • 9. Parivattanahārasampāto
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / នេត្តិប្បករណ-អដ្ឋកថា • Nettippakaraṇa-aṭṭhakathā / ៩. បរិវត្តនហារសម្បាតវណ្ណនា • 9. Parivattanahārasampātavaṇṇanā
