| Library / Tipiṭaka / တိပိဋက • Tipiṭaka / စူဠနိဒ္ဒေသပာဠိ • Cūḷaniddesapāḷi |
၁၇. ပာရာယနတ္ထုတိဂာထာ
17. Pārāyanatthutigāthā
ဣဒမဝောစ ဘဂဝာ မဂဓေသု ဝိဟရန္တော ပာသာဏကေ စေတိယေ, ပရိစာရကသောဠသာနံ 1 ဗ္ရာဟ္မဏာနံ အဇ္ဈိဋ္ဌော ပုဋ္ဌော ပုဋ္ဌော ပဉ္ဟံ 2 ဗ္ယာကာသိ။ ဧကမေကသ္သ စေပိ ပဉ္ဟသ္သ အတ္ထမညာယ ဓမ္မမညာယ ဓမ္မာနုဓမ္မံ ပဋိပဇ္ဇေယ္ယ, ဂစ္ဆေယ္ယေဝ ဇရာမရဏသ္သ ပာရံ။ ‘‘ပာရင္ဂမနီယာ ဣမေ ဓမ္မာ’’တိ – တသ္မာ ဣမသ္သ ဓမ္မပရိယာယသ္သ ပာရာယနန္တေဝ 3 အဓိဝစနံ။
Idamavoca bhagavā magadhesu viharanto pāsāṇake cetiye, paricārakasoḷasānaṃ 4 brāhmaṇānaṃ ajjhiṭṭho puṭṭho puṭṭho pañhaṃ 5 byākāsi. Ekamekassa cepi pañhassa atthamaññāya dhammamaññāya dhammānudhammaṃ paṭipajjeyya, gaccheyyeva jarāmaraṇassa pāraṃ. ‘‘Pāraṅgamanīyā ime dhammā’’ti – tasmā imassa dhammapariyāyassa pārāyananteva 6 adhivacanaṃ.
၁၄၉.
149.
အဇိတော တိသ္သမေတ္တေယ္ယော၊ ပုဏ္ဏကော အထ မေတ္တဂူ။
Ajito tissametteyyo, puṇṇako atha mettagū;
ဓောတကော ဥပသီဝော စ၊ နန္ဒော စ အထ ဟေမကော။
Dhotako upasīvo ca, nando ca atha hemako.
၁၅၀.
150.
တောဒေယ္ယကပ္ပာ ဒုဘယော၊ ဇတုကဏ္ဏီ စ ပဏ္ဍိတော။
Todeyyakappā dubhayo, jatukaṇṇī ca paṇḍito;
ဘဒ္ရာဝုဓော ဥဒယော စ၊ ပောသာလော စာပိ ဗ္ရာဟ္မဏော။
Bhadrāvudho udayo ca, posālo cāpi brāhmaṇo;
မောဃရာဇာ စ မေဓာဝီ၊ ပိင္ဂိယော စ မဟာဣသိ။
Mogharājā ca medhāvī, piṅgiyo ca mahāisi.
၁၅၁.
151.
ဧတေ ဗုဒ္ဓံ ဥပာဂစ္ဆုံ၊ သမ္ပန္နစရဏံ ဣသိံ။
Ete buddhaṃ upāgacchuṃ, sampannacaraṇaṃ isiṃ;
ပုစ္ဆန္တာ နိပုဏေ ပဉ္ဟေ၊ ဗုဒ္ဓသေဋ္ဌံ ဥပာဂမုံ။
Pucchantā nipuṇe pañhe, buddhaseṭṭhaṃ upāgamuṃ.
၁၅၂.
152.
တေသံ ဗုဒ္ဓော ပဗ္ယာကာသိ၊ ပဉ္ဟေ ပုဋ္ဌော ယထာတထံ။
Tesaṃ buddho pabyākāsi, pañhe puṭṭho yathātathaṃ;
ပဉ္ဟာနံ ဝေယ္ယာကရဏေန၊ တောသေသိ ဗ္ရာဟ္မဏေ မုနိ။
Pañhānaṃ veyyākaraṇena, tosesi brāhmaṇe muni.
၁၅၃.
153.
တေ တောသိတာ စက္ခုမတာ၊ ဗုဒ္ဓေနာဒိစ္စဗန္ဓုနာ။
Te tositā cakkhumatā, buddhenādiccabandhunā;
ဗ္ရဟ္မစရိယမစရိံသု၊ ဝရပညသ္သ သန္တိကေ။
Brahmacariyamacariṃsu, varapaññassa santike.
၁၅၄.
154.
ဧကမေကသ္သ ပဉ္ဟသ္သ၊ ယထာ ဗုဒ္ဓေန ဒေသိတံ။
Ekamekassa pañhassa, yathā buddhena desitaṃ;
တထာ ယော ပဋိပဇ္ဇေယ္ယ၊ ဂစ္ဆေ ပာရံ အပာရတော။
Tathā yo paṭipajjeyya, gacche pāraṃ apārato.
၁၅၅.
155.
အပာရာ ပာရံ ဂစ္ဆေယ္ယ၊ ဘာဝေန္တော မဂ္ဂမုတ္တမံ။
Apārā pāraṃ gaccheyya, bhāvento maggamuttamaṃ;
မဂ္ဂော သော ပာရံ ဂမနာယ၊ တသ္မာ ပာရာယနံ ဣတိ။
Maggo so pāraṃ gamanāya, tasmā pārāyanaṃ iti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / စူဠနိဒ္ဒေသ-အဋ္ဌကထာ • Cūḷaniddesa-aṭṭhakathā / ၁၇. ပာရာယနတ္ထုတိဂာထာနိဒ္ဒေသဝဏ္ဏနာ • 17. Pārāyanatthutigāthāniddesavaṇṇanā
