| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. পারঙ্গমসুত্তং
4. Pāraṅgamasuttaṃ
৩৪. সাৰত্থিনিদানং। ‘‘অট্ঠিমে, ভিক্খৰে, ধম্মা ভাৰিতা বহুলীকতা অপারা পারং গমনায সংৰত্তন্তি। কতমে অট্ঠ? সেয্যথিদং – সম্মাদিট্ঠি…পে॰… সম্মাসমাধি। ইমে খো, ভিক্খৰে, অট্ঠ ধম্মা ভাৰিতা বহুলীকতা অপারা পারং গমনায সংৰত্তন্তী’’তি।
34. Sāvatthinidānaṃ. ‘‘Aṭṭhime, bhikkhave, dhammā bhāvitā bahulīkatā apārā pāraṃ gamanāya saṃvattanti. Katame aṭṭha? Seyyathidaṃ – sammādiṭṭhi…pe… sammāsamādhi. Ime kho, bhikkhave, aṭṭha dhammā bhāvitā bahulīkatā apārā pāraṃ gamanāya saṃvattantī’’ti.
ইদমৰোচ ভগৰা। ইদং ৰত্ৰান সুগতো অথাপরং এতদৰোচ সত্থা –
Idamavoca bhagavā. Idaṃ vatvāna sugato athāparaṃ etadavoca satthā –
‘‘অপ্পকা তে মনুস্সেসু, যে জনা পারগামিনো।
‘‘Appakā te manussesu, ye janā pāragāmino;
অথাযং ইতরা পজা, তীরমেৰানুধাৰতি॥
Athāyaṃ itarā pajā, tīramevānudhāvati.
‘‘যে চ খো সম্মদক্খাতে, ধম্মে ধম্মানুৰত্তিনো।
‘‘Ye ca kho sammadakkhāte, dhamme dhammānuvattino;
তে জনা পারমেস্সন্তি, মচ্চুধেয্যং সুদুত্তরং॥
Te janā pāramessanti, maccudheyyaṃ suduttaraṃ.
‘‘কণ্হং ধম্মং ৰিপ্পহায, সুক্কং ভাৰেথ পণ্ডিতো।
‘‘Kaṇhaṃ dhammaṃ vippahāya, sukkaṃ bhāvetha paṇḍito;
ওকা অনোকমাগম্ম, ৰিৰেকে যত্থ দূরমং॥
Okā anokamāgamma, viveke yattha dūramaṃ.
‘‘তত্রাভিরতিমিচ্ছেয্য, হিত্ৰা কামে অকিঞ্চনো।
‘‘Tatrābhiratimiccheyya, hitvā kāme akiñcano;
পরিযোদপেয্য অত্তানং, চিত্তক্লেসেহি পণ্ডিতো॥
Pariyodapeyya attānaṃ, cittaklesehi paṇḍito.
‘‘যেসং সম্বোধিযঙ্গেসু, সম্মা চিত্তং সুভাৰিতং।
‘‘Yesaṃ sambodhiyaṅgesu, sammā cittaṃ subhāvitaṃ;
আদানপটিনিস্সগ্গে, অনুপাদায যে রতা।
Ādānapaṭinissagge, anupādāya ye ratā;
খীণাসৰা জুতিমন্তো, তে লোকে পরিনিব্বুতা’’তি॥ চতুত্থং।
Khīṇāsavā jutimanto, te loke parinibbutā’’ti. catutthaṃ;
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. পটিপত্তিৰগ্গৰণ্ণনা • 4. Paṭipattivaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পটিপত্তিৰগ্গৰণ্ণনা • 4. Paṭipattivaggavaṇṇanā
