| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೫. ಪಾರಾಜಿಕಾದಿಆಪತ್ತಿ
5. Pārājikādiāpatti
೩೩೯.
339.
‘ಪಾರಾಜಿಕ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Pārājika’nti yaṃ vuttaṃ, taṃ suṇohi yathātathaṃ;
ಚುತೋ ಪರದ್ಧೋ ಭಟ್ಠೋ ಚ, ಸದ್ಧಮ್ಮಾ ಹಿ ನಿರಙ್ಕತೋ।
Cuto paraddho bhaṭṭho ca, saddhammā hi niraṅkato;
ಸಂವಾಸೋಪಿ ತಹಿಂ ನತ್ಥಿ, ತೇನೇತಂ ಇತಿ ವುಚ್ಚತಿ॥
Saṃvāsopi tahiṃ natthi, tenetaṃ iti vuccati.
‘ಸಙ್ಘಾದಿಸೇಸೋ’ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Saṅghādiseso’ti yaṃ vuttaṃ, taṃ suṇohi yathātathaṃ;
ಸಙ್ಘೋವ ದೇತಿ ಪರಿವಾಸಂ, ಮೂಲಾಯ ಪಟಿಕಸ್ಸತಿ।
Saṅghova deti parivāsaṃ, mūlāya paṭikassati;
ಮಾನತ್ತಂ ದೇತಿ ಅಬ್ಭೇತಿ, ತೇನೇತಂ ಇತಿ ವುಚ್ಚತಿ॥
Mānattaṃ deti abbheti, tenetaṃ iti vuccati.
‘ಅನಿಯತೋ’ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Aniyato’ti yaṃ vuttaṃ, taṃ suṇohi yathātathaṃ;
ಅನಿಯತೋ ನ ನಿಯತೋ, ಅನೇಕಂಸಿಕತಂ ಪದಂ।
Aniyato na niyato, anekaṃsikataṃ padaṃ;
ತಿಣ್ಣಮಞ್ಞತರಂ ಠಾನಂ, ‘ಅನಿಯತೋ’ತಿ ಪವುಚ್ಚತಿ॥
Tiṇṇamaññataraṃ ṭhānaṃ, ‘aniyato’ti pavuccati.
‘ಥುಲ್ಲಚ್ಚಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Thullaccaya’nti yaṃ vuttaṃ, taṃ suṇohi yathātathaṃ;
ಏಕಸ್ಸ ಮೂಲೇ ಯೋ ದೇಸೇತಿ, ಯೋ ಚ ತಂ ಪಟಿಗಣ್ಹತಿ।
Ekassa mūle yo deseti, yo ca taṃ paṭigaṇhati;
ಅಚ್ಚಯೋ ತೇನ ಸಮೋ ನತ್ಥಿ, ತೇನೇತಂ ಇತಿ ವುಚ್ಚತಿ॥
Accayo tena samo natthi, tenetaṃ iti vuccati.
‘ನಿಸ್ಸಗ್ಗಿಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Nissaggiya’nti yaṃ vuttaṃ, taṃ suṇohi yathātathaṃ;
ಸಙ್ಘಮಜ್ಝೇ ಗಣಮಜ್ಝೇ, ಏಕಸ್ಸೇವ ಚ ಏಕತೋ।
Saṅghamajjhe gaṇamajjhe, ekasseva ca ekato;
ನಿಸ್ಸಜ್ಜಿತ್ವಾನ ದೇಸೇತಿ, ತೇನೇತಂ ಇತಿ ವುಚ್ಚತಿ॥
Nissajjitvāna deseti, tenetaṃ iti vuccati.
‘ಪಾಚಿತ್ತಿಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Pācittiya’nti yaṃ vuttaṃ, taṃ suṇohi yathātathaṃ;
ಪಾತೇತಿ ಕುಸಲಂ ಧಮ್ಮಂ, ಅರಿಯಮಗ್ಗಂ ಅಪರಜ್ಝತಿ।
Pāteti kusalaṃ dhammaṃ, ariyamaggaṃ aparajjhati;
ಚಿತ್ತಸಂಮೋಹನಟ್ಠಾನಂ, ತೇನೇತಂ ಇತಿ ವುಚ್ಚತಿ॥
Cittasaṃmohanaṭṭhānaṃ, tenetaṃ iti vuccati.
‘ಪಾಟಿದೇಸನೀಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Pāṭidesanīya’nti yaṃ vuttaṃ, taṃ suṇohi yathātathaṃ;
ಭಿಕ್ಖು ಅಞ್ಞಾತಕೋ ಸನ್ತೋ, ಕಿಚ್ಛಾ ಲದ್ಧಾಯ ಭೋಜನಂ।
Bhikkhu aññātako santo, kicchā laddhāya bhojanaṃ;
ಸಾಮಂ ಗಹೇತ್ವಾ ಭುಞ್ಜೇಯ್ಯ, ‘ಗಾರಯ್ಹ’ನ್ತಿ ಪವುಚ್ಚತಿ॥
Sāmaṃ gahetvā bhuñjeyya, ‘gārayha’nti pavuccati.
ನಿಮನ್ತನಾಸು ಭುಞ್ಜನ್ತಾ ಛನ್ದಾಯ, ವೋಸಾಸತಿ ತತ್ಥ ಭಿಕ್ಖುನಿಂ।
Nimantanāsu bhuñjantā chandāya, vosāsati tattha bhikkhuniṃ;
ಅನಿವಾರೇತ್ವಾ ತಹಿಂ ಭುಞ್ಜೇ, ಗಾರಯ್ಹನ್ತಿ ಪವುಚ್ಚತಿ॥
Anivāretvā tahiṃ bhuñje, gārayhanti pavuccati.
ಅಗಿಲಾನೋ ತಹಿಂ ಭುಞ್ಜೇ, ಗಾರಯ್ಹನ್ತಿ ಪವುಚ್ಚತಿ॥
Agilāno tahiṃ bhuñje, gārayhanti pavuccati.
ಯೋ ಚೇ ಅರಞ್ಞೇ ವಿಹರನ್ತೋ, ಸಾಸಙ್ಕೇ ಸಭಯಾನಕೇ।
Yo ce araññe viharanto, sāsaṅke sabhayānake;
ಅವಿದಿತಂ ತಹಿಂ ಭುಞ್ಜೇ, ಗಾರಯ್ಹನ್ತಿ ಪವುಚ್ಚತಿ॥
Aviditaṃ tahiṃ bhuñje, gārayhanti pavuccati.
ಭಿಕ್ಖುನೀ ಅಞ್ಞಾತಿಕಾ ಸನ್ತಾ, ಯಂ ಪರೇಸಂ ಮಮಾಯಿತಂ।
Bhikkhunī aññātikā santā, yaṃ paresaṃ mamāyitaṃ;
ಸಪ್ಪಿ ತೇಲಂ ಮಧುಂ ಫಾಣಿತಂ, ಮಚ್ಛಮಂಸಂ ಅಥೋ ಖೀರಂ।
Sappi telaṃ madhuṃ phāṇitaṃ, macchamaṃsaṃ atho khīraṃ;
ದಧಿಂ ಸಯಂ ವಿಞ್ಞಾಪೇಯ್ಯ ಭಿಕ್ಖುನೀ, ಗಾರಯ್ಹಪತ್ತಾ ಸುಗತಸ್ಸ ಸಾಸನೇ॥
Dadhiṃ sayaṃ viññāpeyya bhikkhunī, gārayhapattā sugatassa sāsane.
‘ದುಕ್ಕಟ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Dukkaṭa’nti yaṃ vuttaṃ, taṃ suṇohi yathātathaṃ;
ಅಪರದ್ಧಂ ವಿರದ್ಧಞ್ಚ, ಖಲಿತಂ ಯಞ್ಚ ದುಕ್ಕಟಂ॥
Aparaddhaṃ viraddhañca, khalitaṃ yañca dukkaṭaṃ.
ಯಂ ಮನುಸ್ಸೋ ಕರೇ ಪಾಪಂ, ಆವಿ ವಾ ಯದಿ ವಾ ರಹೋ।
Yaṃ manusso kare pāpaṃ, āvi vā yadi vā raho;
‘ದುಕ್ಕಟ’ನ್ತಿ ಪವೇದೇನ್ತಿ, ತೇನೇತಂ ಇತಿ ವುಚ್ಚತಿ॥
‘Dukkaṭa’nti pavedenti, tenetaṃ iti vuccati.
‘ದುಬ್ಭಾಸಿತ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Dubbhāsita’nti yaṃ vuttaṃ, taṃ suṇohi yathātathaṃ;
ದುಬ್ಭಾಸಿತಂ ದುರಾಭಟ್ಠಂ, ಸಂಕಿಲಿಟ್ಠಞ್ಚ ಯಂ ಪದಂ।
Dubbhāsitaṃ durābhaṭṭhaṃ, saṃkiliṭṭhañca yaṃ padaṃ;
ಯಞ್ಚ ವಿಞ್ಞೂ ಗರಹನ್ತಿ, ತೇನೇತಂ ಇತಿ ವುಚ್ಚತಿ॥
Yañca viññū garahanti, tenetaṃ iti vuccati.
‘ಸೇಖಿಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ।
‘Sekhiya’nti yaṃ vuttaṃ, taṃ suṇohi yathātathaṃ;
ಸೇಕ್ಖಸ್ಸ ಸಿಕ್ಖಮಾನಸ್ಸ, ಉಜುಮಗ್ಗಾನುಸಾರಿನೋ॥
Sekkhassa sikkhamānassa, ujumaggānusārino.
ಆದಿ ಚೇತಂ ಚರಣಞ್ಚ, ಮುಖಂ ಸಞ್ಞಮಸಂವರೋ।
Ādi cetaṃ caraṇañca, mukhaṃ saññamasaṃvaro;
ಸಿಕ್ಖಾ ಏತಾದಿಸೀ ನತ್ಥಿ, ತೇನೇತಂ ಇತಿ ವುಚ್ಚತಿ॥
Sikkhā etādisī natthi, tenetaṃ iti vuccati.
ತಸ್ಮಾ ಛನ್ನಂ ವಿವರೇಥ, ಏವಂ ತಂ ನಾತಿವಸ್ಸತಿ॥
Tasmā channaṃ vivaretha, evaṃ taṃ nātivassati.
ಗತಿ ಮಿಗಾನಂ ಪವನಂ, ಆಕಾಸೋ ಪಕ್ಖಿನಂ ಗತಿ।
Gati migānaṃ pavanaṃ, ākāso pakkhinaṃ gati;
ವಿಭವೋ ಗತಿ ಧಮ್ಮಾನಂ, ನಿಬ್ಬಾನಂ ಅರಹತೋ ಗತೀತಿ॥
Vibhavo gati dhammānaṃ, nibbānaṃ arahato gatīti.
ಗಾಥಾಸಙ್ಗಣಿಕಂ।
Gāthāsaṅgaṇikaṃ.
ತಸ್ಸುದ್ದಾನಂ –
Tassuddānaṃ –
ಸತ್ತನಗರೇಸು ಪಞ್ಞತ್ತಾ, ವಿಪತ್ತಿ ಚತುರೋಪಿ ಚ।
Sattanagaresu paññattā, vipatti caturopi ca;
ಭಿಕ್ಖೂನಂ ಭಿಕ್ಖುನೀನಞ್ಚ, ಸಾಧಾರಣಾ ಅಸಾಧಾರಣಾ।
Bhikkhūnaṃ bhikkhunīnañca, sādhāraṇā asādhāraṇā;
ಸಾಸನಂ ಅನುಗ್ಗಹಾಯ, ಗಾಥಾಸಙ್ಗಣಿಕಂ ಇದನ್ತಿ॥
Sāsanaṃ anuggahāya, gāthāsaṅgaṇikaṃ idanti.
ಗಾಥಾಸಙ್ಗಣಿಕಂ ನಿಟ್ಠಿತಂ।
Gāthāsaṅgaṇikaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಪಾರಾಜಿಕಾದಿಆಪತ್ತಿವಣ್ಣನಾ • Pārājikādiāpattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಸಾಧಾರಣಾದಿವಣ್ಣನಾ • Asādhāraṇādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಾರಾಜಿಕಾದಿಆಪತ್ತಿವಣ್ಣನಾ • Pārājikādiāpattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಪಾರಾಜಿಕಾದಿಆಪತ್ತಿವಣ್ಣನಾ • Pārājikādiāpattivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಪಾರಾಜಿಕಾದಿಆಪತ್ತಿವಣ್ಣನಾ • Pārājikādiāpattivaṇṇanā
