| Library / Tipiṭaka / તિપિટક • Tipiṭaka / સમ્મોહવિનોદની-અટ્ઠકથા • Sammohavinodanī-aṭṭhakathā |
૩. પઞ્હાપુચ્છકવણ્ણના
3. Pañhāpucchakavaṇṇanā
૪૮૨. પઞ્હાપુચ્છકે પાળિઅનુસારેનેવ બોજ્ઝઙ્ગાનં કુસલાદિભાવો વેદિતબ્બો. આરમ્મણત્તિકેસુ પન સબ્બેપેતે અપ્પમાણં નિબ્બાનં આરબ્ભ પવત્તિતો અપ્પમાણારમ્મણા એવ, ન મગ્ગારમ્મણા. સહજાતહેતુવસેન પનેત્થ કુસલા મગ્ગહેતુકા, વીરિયં વા વીમંસં વા જેટ્ઠકં કત્વા મગ્ગભાવનાકાલે મગ્ગાધિપતિનો, છન્દચિત્તજેટ્ઠિકાય મગ્ગભાવનાય ન વત્તબ્બા મગ્ગાધિપતિનોતિ, ફલકાલેપિ ન વત્તબ્બા એવ.
482. Pañhāpucchake pāḷianusāreneva bojjhaṅgānaṃ kusalādibhāvo veditabbo. Ārammaṇattikesu pana sabbepete appamāṇaṃ nibbānaṃ ārabbha pavattito appamāṇārammaṇā eva, na maggārammaṇā. Sahajātahetuvasena panettha kusalā maggahetukā, vīriyaṃ vā vīmaṃsaṃ vā jeṭṭhakaṃ katvā maggabhāvanākāle maggādhipatino, chandacittajeṭṭhikāya maggabhāvanāya na vattabbā maggādhipatinoti, phalakālepi na vattabbā eva.
અતીતાદીસુ એકારમ્મણભાવેનપિ ન વત્તબ્બા, નિબ્બાનસ્સ પન બહિદ્ધાધમ્મત્તા બહિદ્ધારમ્મણા નામ હોન્તીતિ. એવમેતસ્મિં પઞ્હાપુચ્છકેપિ નિબ્બત્તિતલોકુત્તરાવ બોજ્ઝઙ્ગા કથિતા . સમ્માસમ્બુદ્ધેન હિ સુત્તન્તભાજનીયસ્સેવ પઠમનયસ્મિં લોકિયા, દુતિયતતિયેસુ લોકિયલોકુત્તરમિસ્સકા બોજ્ઝઙ્ગા કથિતા. અભિધમ્મભાજનીયસ્સ પન ચતૂસુપિ નયેસુ ઇમસ્મિઞ્ચ પઞ્હાપુચ્છકે લોકુત્તરાયેવાતિ એવમયં બોજ્ઝઙ્ગવિભઙ્ગોપિ તેપરિવટ્ટં નીહરિત્વાવ ભાજેત્વા દસ્સિતોતિ.
Atītādīsu ekārammaṇabhāvenapi na vattabbā, nibbānassa pana bahiddhādhammattā bahiddhārammaṇā nāma hontīti. Evametasmiṃ pañhāpucchakepi nibbattitalokuttarāva bojjhaṅgā kathitā . Sammāsambuddhena hi suttantabhājanīyasseva paṭhamanayasmiṃ lokiyā, dutiyatatiyesu lokiyalokuttaramissakā bojjhaṅgā kathitā. Abhidhammabhājanīyassa pana catūsupi nayesu imasmiñca pañhāpucchake lokuttarāyevāti evamayaṃ bojjhaṅgavibhaṅgopi teparivaṭṭaṃ nīharitvāva bhājetvā dassitoti.
સમ્મોહવિનોદનિયા વિભઙ્ગટ્ઠકથાય
Sammohavinodaniyā vibhaṅgaṭṭhakathāya
બોજ્ઝઙ્ગવિભઙ્ગવણ્ણના નિટ્ઠિતા.
Bojjhaṅgavibhaṅgavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / વિભઙ્ગપાળિ • Vibhaṅgapāḷi / ૧૦. બોજ્ઝઙ્ગવિભઙ્ગો • 10. Bojjhaṅgavibhaṅgo
